احاسيس مختلطه

احساس تافه: لما تحس ان شغلك يوقف لأنك فلان لفلاني

احساس بشع:لما تحس ان الناس تنتقم منك بالناس اللي حواليك

احساس مليق:لما تحس ان اللي فوقك افضل منك بالمال والحظ وما عنده لا مخ ولا عقل ولا تفكير

احساس يتلف:لما تحس ان شغلك اللي تعبت عليه يطلع بوووووش بشخطة قلم

احساس مدمر:لما تحس انك تعبت عاطفيا-نفسيا-اجتماعيا...ومحد حاس فيك

احساس خبل :لما اللي داير مداريك يجرحونك وانت تعتقد ان مو قصدهم (يعني يا حماره متى تفهمين)1

احساس يعذب: لما تحس انك منبوذ

احساس يدوده :لما تشوف الحب بين كل هالاحاسيس

احساس يونس: لما تشوف واحد يلاحظ كل هذا ويصرحلك

احساس يشجع : لما اييك واحد يراقبك من بعيد ويقولك انا معاك لي النهايه هذا اذا كان في نهايه

احساس يقمت: لما تحس انك تصرفاتك مراقبه من قبل جاسوس كبير

احساس يعور: لما يغدر فيك انسان قريب...كنت في يوم من الايام ملجئ لهمومه

احساس مؤلم:لما ما تقدر تشكي همك لأقرب الناس لك ....لأنك خايف عليه

احساس مؤذي:شعورك بالذنب بعد كل اللي صارلك واللي بيصيرلك

احساس برئ: لما تشوف حوالينك صغار انت مثلهم الأعلى....وشنهو انت؟؟؟!!؟؟

احساس مثالي: لما تتمسك بالصح واللي حوالينك غلط في غلط

احساس يجرح: لما تحس ان صدقك سبب مشاكلك

اسمعني

BY NON

ـــ هل أنت راض عن مدونتك شكلاً وموضوعاً؟

شكلا...شكلها زين كحلي امنقطه ...جنها غناية خالد الملا يا لابس الثوب لمنقط اسمك يا حلو ما فيه نقطه ...موضوعا ..هم راضيه عنها لأن ماكو موضوع ينزل مو برضاي ..:)

ـــ هل تجد حرجاً فى أن تُخبر صديقاً عن مدونتك؟

جدا ..وصارلي موقف حلو ان وحده زميله قعدت يمي وقالت لي دشي اقري بلوقي هههههههههههههههه ولا وحده من اللي معانا وسكت ولا قلت لها انا عتيجه عاد الحين بيشتغل الشك فيني عتيجه انتي فلانه وانتي علانه ككككككككككك

هل تعتبرها أمرا خاصا بك؟-

جدا ..مدونتي من خصوصياتي ..الى درجه ان وحده اكتشفت انا عتيجه ويتني وقالتلي انتي عتيجه ظايقتني ..دام انج اكتشفتي اني عتيجه لو ابي اقولج جان قلت لج ليش اللقافه افففففففف واتمنى انها الحين تقرالي

لاتبوق... لاتخاف

ـــ هل تسببت المدونات بتغيير إيجابي لأفكارك؟ أعطني مثال فى حالة الإجابة بــ نعم

اي ..حسستني ان موظفات البلد اللي قاعدين عالمكتاب وماكو شغل,, عندهم حس فني ابداعي بالكتابه ...وفوق هذا الرياييل اكتشفت ان وايد رياييل يحبون الكتابه ...وموراضين عن وضع الفساد الاداري اللي بالديره

.. ـــ هل تكتفي بفتح صفحات من يعقبون بردود فى مدونتك أم تسعى لاكتشاف المزيد؟

برنامجي مع المدونه ادش مدونتي ..واشوف المعلقين على موضوعي ..اروح اقرى مواضيعهم واعلق عليها في الغالب..تالي ازور السلسله اللي على ايدي اليسار عقبها اتمشى في عالم البلوق

ـــ ماذا يعنى لك عداد الزوار... هل تهتم بوضعه فى مدونتك؟

على حسب موضوعي ..اذا الموضوع هامني وايد اهتم اما اذا موضوع عابر ما اهتم

ـــ هل حاولت تخيل شكل أصدقائك المدونين؟

قليل جدا ...

ــ هل يزعجك وجود نقد بمدونتك ؟

ما يزعجني النقد ...يزعجني اللي يدش داخل قلبي ويشوف نيتي سبحان الله مادري شلون ..يقول انتي نييتج جذي ..وانتي قصدج جذي

حتى اللي يسبون ويقولون كلام مو شي ما يزعجوني لأن كلامهم يعود اليهم ولا حتى امسح تعليقاتهم او اعطيها اهميه

هل تخاف من بعض المدونات السياسية اوتتحاشاها؟

ما اخاف منها ولا اتحاشاها ..لكني ما افضلها ...لبلوق بالنسبه لي متنفس نفسي ومكان راحتي وحياتي كلها جد في جد وانا شخصيتي جد...فمليت وابي ارتاح في مدونتي

لـــ هل صدمك اعتقال بعض المدونين؟

الغير كويتيين لأ بس لو يصير للكويتين اكيد بيصدمني

ـــ هل فكرت فى مصير مدونتك حال وفاتك؟

اي وام نبيل ان شا الله بتمسكها من بعدي ...وراثه يعني ........وهكذا ...

ـــ آخر سؤال : تحب تسمع أغنية إيه- بلاش صيغة آمال فهمي دى

- ما الأغنية التي تحب وضع اللينك الخاص بها في مدونتك؟

غناية حبيبي ساكن الدسمه وقلبي ساكن وياه يحسبوني نسيت اسمه وانا عايش على ذكراه

وغناية غاب بدري الا يا من يجيبه لخليفه بدر

ــ اكتب أسماء خمسة مدونين ليقوموا بهذا الاستقصاء بعدك

امممممممممم

والله فكرت وايد وقررت التالي:

الاخ:مشاري

المدام: ريما

الآنسه: لوير

الست:كيتي

المغترب: بوصالح

ام عيون فتانه @@

والله مادري شكتب مادري شقول المهم خلوني اسولفلك لك عن خاطري او حوبتي او مادري شسميها بالظبط ...

خلونا نسميها عيني

هليام الوضع زايد شوي من جذي قلت خل اسولفلكم

بما ان هنيه يحقلي اتحجى عن نفسي

وامدح روحي على كيفي من جذي ياخذ راحتي اكثر هالمره

المهم

سبحان الله فيني ميزه ..مادري اهي ميزه اهي نعمه اهي نقمه اهي ابتلاء ...ابيكم انتوا تسمونها حقي

الموقف الاول: كان عندنا معرض ..الكافيه اللي يم معرضنا مو بالعنا لأن قاعدين نصبب قهوه حق الاوادم وطيحنا حظ قهوتهم خاصه ان قهوتنا عربيه المهم ...طاحت الفناييل ملوت القهوه وانكسروا وانكت منها على هدومي بس اشوه بارده ...التفت على الكافيه ولا اشوفهم يظحكون علينا ..وياني السنيير مالهم يتطنز قال بدكوون شي (بدنا نرقعك كف نعدل لسانك العوي)..رد عليه بو بدر لا ما بدنا شي ...انابس التفت عليهم وقعدت اشيل اللي طاح على القاع وبو بو بدريشيل معاي ...

طبعا تعرفون بو بدر ما يبيله

ما حبيت حركتهم ....وخليتها بقلبي...ولا دعيت عليهم ولا شي ما وعيت الا واسمع صوت طربااااااااااااااااااااااااااااااااااااااااااااااااااااخ

كاااااااااااااااااااااااخ

من الكافيه ولا طايح شي عندهم والعاملين راحوا يتراكضووون

صارت

جان بو بدر يقول

يابتهاااااااااااااااااااااا(تحسون واحد يعرفني)1

ههههههههههههههههههههههههههههههه

.

الموقف الثاني: بنفس اليوم رديت من المعرض عندي شغل بكمله بمكان شغلي وبما ان في معرض فمكانا فاضي ما فيه احد وعندي شغل ما اعرف اسويه محد يعرفله غير بو بدر- بالمعرض- ومصطفى - عنده عزى -ومحمد يلووي(كالعاده)1

تعرفون مصطفى .... ..تذكرونه ؟؟؟

المهم اتصلت في مصطفى :هاه وينك ..قال:.تامرين على شي ...قلت: والله بغيتك تعاوني بشغله بالكمبيوتر

مسكين مصطفى وايييني على بو بيساعدني

واثناء ما قاعد يسوي الشغل جان ايي الاخ اللطيف

البارد

الثلاجه

محمد <<< اللي على طول معاي

ومعاه بنات من اداره ثانيه ويقول حق مصطفى نزل لهم برامج على الكمبيوتر (الاخ يشتغل بساعد اخاك المسلم)1

طبعا بط جبدي محمد لأن فشله اكسر حجوته جدام البنات ...وبنفس الوقت مصطفى ما يقدر يرد الموضوع وانا شغلي واقف

يعني يخلص شغل الأوادم ويوقف شغلي

ويظبط كمبيوتر البنت الأولى

عاد البنت الثانيه ما تواطني ...جد يايها طشار مني ..وتقعد عشان يظبط لها جهازها ليييين صارت الساعه تسع ....وانا منبطه جبدي وساكته وقاعده احوس اظبط شغل ثاني

فجأه ولا اسمع مصطفى يقول اخخخخخخخخخخخخخخخخخخ

ولا ضرب جهازها مادري كمبيوترها مادري شصار لها فقيره مسكينه هههههههههههههههههه المهم ما ظبط اللي تبيه جنى اخترب جهازها

يقول محمد بجت الا ربع

امانة ما دعيت عليها لأن مالها ذنب ..اللي بط جبدي محمد وسوالفه

بطلعتنا من الاداره جان يقولون لي سويتيها ...قلت والله ما اجذب عليكم ..اللي بط جبدي محمد يعني الحين يعطل شغلنا عشان ناس ما يواطنوني ويحرجنا بحركاته القرعه ....ههههههههههههههههههههه

يقولي محمد انتي سيده ...ويقول حق الباجي ديروا بالكم تزعلونها

ويقولي مصطفى عينج حاره

ويقولي بو بدر عينج مو حاره دايما توصفين علي بس ما قط صار فيني شي

ويقولي وليد نييتج طيبه

وتقولي ام نبيل ..ظبطينا

ترى يا جماعه انا اذكر الله على الشي الزين

وماني حسوديه ولا انظل ولا شي ووالله عمري وبحياتي ما تمنيت زوال اي نعمه من ايد احد ...بس تصير معاي هالسوالف

هالسوالف شيسمونها ؟؟؟؟؟؟؟؟؟؟؟

افيدوني افادكم الله

فنون فلكلوريه

ساعات اشوف كتاب ..او ايميل او مقال يشدني اسمها او ينطبع بذاكرتي ...وايي اليوم اللي اقول اخخخخخخخخخخ عليج يا ام مضحي لو شاريته حق وقت العازه وايد احسن

بالفتره الاخيره حسيت اني بحاجه لكتاب اسمه

" قل لا من غير ان تشعر بالذنب "...

الصراحه اليوم حسيت ان هالكتاب ظروري اقراه ..او اشتريه او اقتنيه

دايم يأذيني هالشعور وان شا الله أول الله بس افضي او أمر يم مكتبة جرير بشتري هالكتاب لعل وعسى يعالج هالشعور البايخ اللي عندي...

عندي اختي الله يهديها ان شا الله

فيها طبع ملييييييييييق وباااااااااااااااااااايخ

لآزم تطلعني غلطانه ..حتى لو الغلط راكبها من ساسها لي راسها ..حتى لو وعدتني واخلفت بوعدها ..

ومن زود القراده يعني يا التعبانه يا عتيجه يا الدايخه انتي تدرين ان اختج عويه ..ليش كل مره تنقرصين منها

سبحان الله كل مره تطلعلي بفن يديد

ونجله يديده ....وماحب اقول لها لأ ..بعد اختي العوده ..مااحب اكسر بخاطرها...وان قلت لها ايي ..سوتلي فن يديد ..بط جبدي ...ورفع ضغطي ويابلي القولون

يعني احترت معاها ..ما يصير احقرها على طووول ...واسحب عليها مع اني اقدر ..ولا يصير اخليها تمشي حجيها علي

خاصة ان طبعي ما عندي شي اسمه زغير وكبير اللي يحترمني احترمه ..واللي ما يحترمني بالطقاق

لحية احشمها ولحية احشم نفسك عنها

مع هذا اهي تحترمني كشخص ..وتلجألي في اكثر الاحيان ..نسبة لطبعي الملجئي ..بس سبحانك يا ربي ما ان اختلف معاها بشي الا واقلبت علي ..وصرت انا النحيسه ..يمكن اهي ما تصرح اشكره لكن احساسي يقولي جذي ..ان قلت لأ وا ويلاه ..وان قلت ايي هم واويلاه ..احاول اخدمها ..وبالخدمه تطلعلي سالفه مادري شلون صايره

يعني مثلا تبرعت اني اوصل اغراضها لي مكان تقولي.. وعلى طريجج ..(وطبعا المشوار مو على طريجي) مري بيت فلانه ييبي بنتها انا مشاورتها ..عشان اخذ بنتها اوديها مع بنتي مادري وين ...

اقول بأسى يالله خل اكمل احساني ...انشا الله والغنيمه

امر بيت فلانه ..وتطلع ام البنت مو راضيه مثلا

او البنت موموجوده بالبيت

او ساعات تكون اختي مرت خذتها افففففففففففففففففففففففففففففففففففففففف صج صج احمق

واذا اتصلت وقلت لها ..ليش يا اختي ما دقيتي علي ..تقول كان تليفوني طافي

او ظايع

او ماخذته بنتي

والأدهى والامر اذا انا لبستني الغلط

تقولي مثلا انا قلت لج قبل ما توصلين هناك دقي تليفون

وهي تكون قايله هالكلام بقلبها

اكون عطلت مشواري وعلى بطييييخ

طبعا هذا احد الفنون الفلوكلوريه اللي تسويها فيها ...والمشكله اني اكون حذره منها بهالنقطه ..تطلع علي بسالفه يديد ما اكون توقعتها من قبل

مثلا ...

عتيجه وين بتروحين

عتيجه:والله بروح عندي شغل ظروري بفحيحييل (مكان بعيد نسبيا بلكويت)1

ام لميا: خلاص بيي معاج لأن مالي خلق اسوق وابيج تمرين فيني الخياط بالرده

عتيجه : حياج

وبعد ما مسكت الخط السريع

ام لميا : عتيجه خليني نمر الخياط قبل ..لأن (تطلع عذر)ظهره يحكه ...ناسي يتغدى...يصك بسرعه ...

عتيجه: بس انا قلت لج مشواري بفحيحيل ..

ام لميا:(طبعا تصغر موضوعي) ..اي عادي فحيحييل فاجين لي الساعه 11 بالليل والحين تو الناس وهذا خياطي مدعوس وانا اخاف اروحله بروحي (طلعت الصجيه)وشدعوا عتيجه خو كلها نص ساعه تخيلي نفسج تترسين بانزين بمحطه مزدحمه

هنيه عتيجه تبدي تحس بالذنب وبطت الجبد في آآن واحد

اوديها حق خياطها

الخياط : ماما انتي شغل يبي خام زياده ..عشان يخلص بعد يومين

ام لميا:اي الحين نييبلك خام

عتيجه:@!@وطبعا ساكته مابي افشلها جدام الريال

نطلع من الخياط: عتيجه سوق الخام مو بعيد كاهو على ريولنا نييبله قطعه الخام ونخلص مره وحده

ويطووووووف الوقت ساعه تلو الأخرى

وآخر شي يصك المكان اللي انا بروحله وعقب ما تخلص شغلها تقولي يالله الحين نروح فحيحييل (عقب ما خربت البصره)

بأبتسامه صفراء اقول لها لا ماله داعي لأن المكان صك

تقولي وليش ما قلتيلي ؟؟؟؟؟؟؟؟؟؟؟؟؟؟؟؟؟؟؟؟؟؟

فنووووووووووووووووووون فلكلوريه

وطبعا هذي احد الفنون الشعبيه اللي تسويها فيني

في طبعا فن الطمبوره

الى درجة ان امي حبيبتي تسميه فن العره ..يعني مثلا تروح البر بعز الصيف ..

في الفن السامري

هذا تالي الليل

وديروا بالكم من االفن النقازي

هذا اذا متنرفزه

في فن المخولف

هذا فن عجيب غريب اقولكم موقف توه صارلي

اهي تعبانه

اتصلت انا فيها: هاه وينج

اهي:بالبيت

عتيجه:يالله ماتبين تطلعين

اهي: لا والله مريضه

عتيجه:ادري بس لازم تغلبين المرض ..

وبعد شد ورد توافق انها تطلع عشان تغير جو وتيي معاي وين ما ابي

بعد ما تركب السياره ..

ام لميا: وديني المكان لفلاني ..ولفلاني ..ولفلاني ...

عتيجه:انا بروح مكان غير

هي هي هي هي

هو هو هووووو

هاهاهاهاهاهاها

الشرهه مو عليج الشرهه علي انا لحماره والله

في فن الليوه

هذا اللي تهيج الرأي العام

عتيجه ما ودت بنتي وهي واعدتني انها بتوديها وانا ما عمري طلبتها ويوم طبتها شدعوا قالتلي عندي شغل اش هالشغل اللي مايخلص و و و و و

وتييني امي ..شدعوا يا بنيتي الحين اختج تبيج تودين بنتها و و و << متعاطفه معاها

انا: يما عندي شغغغغغل

امي: يتاجل

انا : ان شا الله زين اهي ليش ما تودي بنتها

امي : عندها استقبال ؟؟؟

؟!!!!!!!!!!!!!!!!!!!!!؟؟؟؟؟؟؟؟؟؟؟؟؟؟

اشق ثيابي

في فن بحري ..

هذا اسمه فن بحري تخلي المايه كلها علي ...

الله المستعان...وعسى الله ياجرني

اللهم أأجرني في مصيبتي واخلفلي خير منها

بس جد جد

؟؟؟؟؟شلون أقول لأ من دون ان اشعر بالذنب ؟؟؟؟؟؟؟؟

اهداء

لأختي وامي والقراء

http://songs.njom.net/music/gulf/ram/abdelkareem/abdelkareem2.ram

الحب خيانه!!!

الموضوع اللي بتحجى فيه اليوم جدا حساس وكلنا نفكر فيه ونحبه بس بطريقه مختلفه نوعا ما
الا وهو
الحب
شفيها اذا حبينا؟؟ ..وشفيها اذا انحبينا ؟؟..شي حلو ان الواحد يحب ويتعلق قلبه بمحبوبه ..وشي حلو ان الواحد يلاقي اهتمام مختلف من شخص واحد بالنسبه له مختلف
طبعا اللي اقصده هنيه الحب بين جنسين..والأحلى اذا تتوج هالحب بزواج ..وبأسرع وقت ممكن سواء كان حب من اول نظره او من عاشر نظره ..
يمكن انا مو من المؤمنين بالحب من اول نظره لكني مؤمنه بالحب نفسه ..وصعب جدا اني اعيش مع ناس ما احبهم ..او اشتغل مع ناس ما احبهم ..او ما يحبوني ..صعب علي لكن اقدر ولله الحمد
والمثل يقول اكل كره واشرب كره بس لاتجابل كره ..
خلنا بالحب الحين
الحب بين الريال والمره ..حب جميل.. نوع مختلف ...صعب يتكرر ..
ساعات المره ترسم
وساعات الريال يرسم
يرسم لأن يحب ..يخطط علشان يوقع محبوبته بشباكه وتحبه لأن يحبها وعلى الاقل يبيها اتقبله وكذلك بالنسبه للمره ترسم وتخطط لأنها تحبه ..تحبه فقط
ولكن
هل من الممكن ان تحب المره ريال متزوج؟؟ ..فيها شي!!! ..ماتبيه يطلق مرته ولا شي ..والشرع حلله اربع ..تبي تكون زوجه ثانيه او حتى رابعه لأنها تحبه ..فيها شي؟؟ ..ولا لعزوبي عادي والمتزوج مو عادي ؟؟..

الحب ما يعرف صغير وكبير وانا اقول بعد ما يعرف متزوج و مو متزوج ..وايد متزوجين ما يحبون ازواجهم وكان الرسول عليه الصلاة والسلام يقول هذا عدلي فيما املك فأغفرلي فيما لا املك يقصد العدل فيما يملك المصروف والمبيت والكسوه وغيرها وما لا يملك المحبه فكان يحب السيده عائشه اكثر من جميع زوجاته ..وقلبه يميل لها اكثر ..
والأنسان ما يملك قلبه من مره او ريال ..فشيسوي الواحد اذا حب وحده غير زوجته ..يتزوجها افضل من ان يخون زوجته
وشتسوي الوحده اذا حبت واحد وطلع متزوج ؟؟؟ ترى سؤال يحير والله
واللي يحير اكثر اذا وحده متزوجه وحبت واحد ..شترقع بعمرها ..
وقال بشار ابن برد
يا قوم اذني لبعض الحي عاشقة ....والاذن تعشق قبل العين احيانا
طبعا الموضوع حساس حييل ويعور القلب اكثر ..وصعب جدا وقعه على النفس
بالمناسبه ..طرت علي وحده احبها حييل كانت مو متزوجه وانسانه طيبه حيل تقول اعجبت بأنسان طيب ويخاف الله ومحترم لأبعد الحدود ..وذرب وكل شي والكل يمدح فيه وحسيته يبادلني الشعور ..قليل الكلام وما يسولف مع الكل وايد ..سأله ذاك اليوم واحد عسى ما شر ليش مو مداوم ..قال والله بنتي مريضه ..تقول انا انصدمت بس عادي تقبلت الموضوع ..وحاولت ابتعد عنه اكثر علشان ما يعجب فيني اكثر وانا بعد واصير سبب في خراب حياته الزوجيه ..
سؤال يطرح نفسه :هل البنت مجرمه في هذا الموضوع ؟؟
الحاله الاخرى: واحد حبيب وطيب يقول تزوجت بعد ما اشتغلت وحده من الاهل طيبه وحليوه تهتم بنفسها وايد كل يوم والثاني رايحه صالون علشان تكون حلوه في نظر نفسها ونظري..مثقفه متخرجه يبت منها عيالي كلهم لكني للأسف قلبي ما حبها ..ولقيت انسانه حبها قلبي ..وتعلق فيها الى درجه ما اتصورونها ..وحسيتها تبادلني نفس الشعور ..حاولت ابتعد عنها ما ابي اخون زوجتي اللي ما عمرها خانتني ..ولا اقدر اتزوج عليها لأن الزواج من الثانيه بمجتمعنا وبيئتي يعتبر خيانه وخاصه ان زوجتي من الاهل ..ودي اتزوج البنت ..وادري انها راح توافق لكن هل اللي صارلي فيه خيانه؟؟
نفس الموضوع يتكرر ..مع الجنسين ..هل الحب خيانه ؟؟؟وكيف يبرر الحب في مثل هذي الحالات ؟؟
وهل هو حب حقيقي ..؟؟؟ام بطيخ

ام نبيل SAID...

محدثتكم ام نبيل اليوم من بلوقي ...وهذي احد تعليقاتها على قصة حب اربعيني مع تعديلات طفيفه

ام نبيل said...
السلام عليكم محدثتكم ام بلبل

ابيكم شهود

يرضيكم الي سوتى اختي عتوج فيني

تصورو ذاك اليوم من قرادت حظي نخيتها بشغله بما اني ما احب اسوق الصبح بهالقيض فطلبت منها توديني مشيوير...المهم يزاها الله خير ودتني... وعقب ما طلعنا جان تقولي امشي معاي الدوام بروح اقضي شغله وعقبها اوصلج البيت ..قلتلها تم

ومن غبائي وافقتها...وعقب ما طلعنا من الدوام وبعز هالحر الظهر والشمس تفظخ الراس وتقسمه نصين ....ما اشوف الا والسيارة قامة تمشي بالعدال ...اقولها عتوج شفيج؟؟؟؟؟؟ .....تقولي سلامتج ....

ما وعيت الا والسيارة توقف علين؟؟؟....الا وتقولي نزلي دزيها معاي!!!!طاش

طاش

طاش ماطااااش

وتخيلوا يا اخوان نزلت ادز معاها بهالحر ليما لفينا فوق تحت....ههههههه وكان الشارع منتجل-مايل- فما قدرنا نستمر... ووقفت بالشارع بين الحارتين وانهدت علينا الاشاره ....بقينا نروح جفي ؟؟؟اشوا يانا شرطي بالوقت المناسب مو عادتهم بس اخيرا جان يقولها "ادفها..قعدت بسلامتها تفكر!!! جان اقولها ما يبيله تفكير دفها وخل تنخفس عاد من حلاتهاواشوه يزاه الله خير دفها لين وصلنا المحطه ويو الفلبن يتراكظون هههههه وانا بقلبي اقول "ياحلو الخصخصه واخرتها طلع ترسها ب3 دنانير...وانا اقولها يا الحزره مرمطتينا على 3 دنانييرجان تقولي شسوي كنت مستعيله بنزل الجزء الثالث من قصة حب اربعيني حق بلوقراتي واثاري كل هالمرمطه حق البلوق تصدقون ما بطت جبدي عتوج كثر ما بط جبدي المصري وحنا ندز السيارة وهو صافط عند الاشارة وغولته ترفرف من هوا المكيف وقاعد يشوفنا ويضحك ...ولا فكر يساعدنا حسبي الله عليه عسى اشوفه بنفس حالتناوالسامع يقول امين

NO COMMENT

اكره

اكره الاستهزاء بالاشكال
اسمر
ابيض
اسود
فلان غامج
وفلانه فاتحه
نعيب عالامريكان
شخلينا احنا
يبيلنا كيندي
ويبيلنا مارتن لوثركينج مع العلم ان عندنا ما هو افضل منهم

القرآن

و

السنه النبويه
وهم ماكو فايده
عالم ثالث
جاهليه
بل قمة في الجهل
صدق رسول الله حين قال
ثلاث من امتي من امر الجاهليه

التفاخر بالاحساب

والطعن بالانساب

والنياحه
كما قال لا فرق بين اعجمي ولا عربي الا بالتقوى والعمل الصالح
بس همممممممممممممممممم
ماكو فايده
وكل ما قلنا يا ناس قال الرسول لا فرق
قالوا تخيروا لنطفكم فأن العرق دساس
وشنهو يعني تخيرو نطفكم
!!!؟؟؟ممكن توضيح !!!؟؟؟
لايدخل الجنه من كان في قلبه مثقال ذرة من كبر

وكل ما قلنا الرسول قال انا سيد ولد آدم ولا فخر

قالوا قال انا الرسول لا كذب انا ابن عبد المطلب

حتى بالشرع يدورون عله وعلثه لكبرهم ..وجاهليتهم

ماكو فايده

ماكو فايده