Thursday, November 30, 2006

زمان الغناوي


ملاحظه: اذا انت مشغول ولا عندك شي لاتقرا وتضيع وقتك لأن قرقتي اليوم على غير معنى
اشكي المحبه
والامل
والحبيب المهاجر ...مادري شخلى هلغنايه الموقديمه وايد تطري علي
اي مو قديمه وايد
من 1994م يعني من اكثر من 12 سنه هههههههه يمكن لأن كل اللي اسمعه اقدم منها
مع ان ما عندي حبيب مهاجر ولا شي بس الغناوي ذكريات
هليام معاي ارق وهو يقول فيها انا السهران لجفون النهار الظاهر علشان جذي هههههههه
عندي قعده الساعه ست الصبح ...يا ربي ليش المأساة :(
والحين الساعه اربع ونص يا سلالالالام عليج يا عتيجه
مرت علي فتره ما استغنى عن اشرطة رويشد الحمدالله والشكر
فترة وعدت وكانت عندي غنايه الحمد الله والشكر مسجلتها عالشريط ثلاث مرات هههههههههههههه حتى بالرومنسيه في خبال
ومره من المرات عفست تسجيلات عبدالله الرويشد على غناية ..كنت اتسائل شلون هلغنايه مو عندي .؟؟ وانا اللي عندي اشرطة رويشد ومهرجاناته من اول ما طلع وحتى مره اشتغل معاي ولده بمكان مؤقت...قلت له اتصدق ان عندي غناوي يمكن ابوك ناسيها قعد يضحك قالي والحين قلت الحين ابوك ينزل شريط ما ينزل كلا سيم سيم ....قعد يضحك يحليله خالد والله كان ولد مؤدب جدا رغم صغ سنه ومحترم عاد على هالطاري من جم يوم شفت بالوفيات خالد عبدالله محمد الرويشد ....وكان عمره 22يعني من طقت خالد ولد الرويشد بس ما كان اهوه لأن اسمه خالد عبدالله عبدالرحمن ..بس سبحان الله نفس الاسم والعمر ..حتى بداية ضاق خلقي تالي تذكرت
وآخر شريط شريته كان اللي فيه حلاتج يا نظر عيني مطر يروي العطش ويخضر الديره
الباجي مادري عنهم دمعة المسحور مادري شنهو..وحتى اللي غنى مع نوال احس بطيخ يعني ولا شي
رويشد راح وراحت ايامه ...انا اقول لو ييسوي نفس عبدالمحسن المهنا ويحافظ على غناويه وينسحب شوي شوي وايد احسن
وعموما شخباري اشرطه ومادري شنهو ...آخر شريط شريته والله نسيت صارلي فتره طويله ...مو شاريه شريط الحين ما اسمع الا محطة الغناء القديم 87.9
او البرنامج الثاني 97.5
وقناة القرآن الصبح 89.9
وساعات احط قناة الموسيقى لكلاسيكيه اعتقد 92.3
وشريط واحد غناوي بسيارتي ...
صوووووووووووووووووت السهارى
والباجي مو غناوي شي قرآن وشي سيره والذي منه
الساعه الحين 4:55مادري شلون بسوق لي اقصى الدنيا
اظنتي بيصير شكلي نفس اللي بالصوره فوق

Labels:

Tuesday, November 28, 2006

رساله من صديق عراقي

هذي الرساله اتتني بالايميل من صديق عراقي كان عايش في قطر قبل تحرير العراق او قبل احتلال العراق بالظبط مادري ..فأخترعت مفهوم جديد وهو تحرير واحتلال العراق عشان محد يزعل
والمشكله انها يتني بالعيد ومادري ليش محتفظه فيها لي الحين يمكن لأني عاجزه عن فعل اي شي الى الآن والله المستعان..فلعل نقلي لهذه الرساله يحدث اضعف الايمان في قلوبكم كما احدثه في قلبي
هذي اهي الرساله حرفيا وحتى البدليات ما عدلتها:
.
.
بسم الله الرحمن الرحيم السلام عليكم ورحمة الله وبركاته
عيدكم مبارك وكل عام وانتم بخير وعساكم من عواده
حبيت اعايدك يااختي الفاضله صارلي زمان ماداش النت ولا شايفك علما اني اكلمك من سوريه وليس من العراق تركت العراق مع اهلي بتاريخ 6\8 وسكنت في حلب بسبب الاقتتال الطائفي الوالاوضاع المعروفه في البصرة والعراق ماقدرنا نعيش هناك المليشيات المواليه الى ايران مسيطره بالبصرة وتحكم وتطهن اهل السنه وتقتلهم وتقتل الائمه والمؤذنيين والمصلي لو قتل لو تعذيب وسجن من غير وجه حق بسبب ان سني العيشه صارت صحبه يااختي ومع ذلك قلبي يحن لزبير وايد هني لانعرف احد شغلنا بالعرق تركنا حلالنا كان عندي طموح واحلام تناثرة مع الريح بسرعه لافي اصدقاء هني لاندل بالبلد كلامهم في صعوبع اكلهم مو نفس اكلنا وايد فروقات لكن في امان والحمدلله على كل حال نحمدلله ونشكر كثيرا وحلب المساجد عامره بالمصلين ماشاءالله وبلد محافظ احسن من دمشق حسب ماسولفولنا وايد ناس رايحيين لدمشق والحمدالله على كل حال والسلام عليكم اذا عندك رساله لي حاول تكتبيلي على البالتوك لان الهوت ميل هني بصعوبه يتحصل او على الايميل الياهو
.....انتهى
؟؟؟؟؟؟؟؟؟؟

Labels:

Sunday, November 26, 2006

حكمتي ..على قدي


"عندما تشعر بطرقة حب خفيفه على باب قلبك فتظاهر بعدم سماعها ...وانتظر الاقوى"
"عندما تريد معرفة اعجاب الناس بك...فأكتشفها في عيون المراهق"
"عندما تحب عتيجه فأيقن انها تحبك"
"قد لا اكون مقتنعه..ولكني سأنفذ"
"يكذب الانسان في صمت ..حين يفقد الثقه"
"يلتمس المسلم اكثر من سبعين عذر ...اذا كان واثق ...ولا يلتمس نصف عذر اذا فقد الثقه"
اخيرا وليس اخرا ..هي عبارات رددتها بيني وبين نفسي ..تعكس حالاتي التي امر بها ..ولدي منها الكثير واجملهن "قد يكفي المرء معرفة حقيقة نفسه ان لم يعرف حقيقة من امامه"

Labels: ,

Tuesday, November 21, 2006

الأصيل!!!


سبحان الله الواحد يفتح صفحة البوست ويكون على باله جم شغله يكتبهم يقوم ويكتب شغلات ثانيه ..صار في ارتباط وثيق بيني وبين ربعي البلوقريين والبلوقريات ..الى درجة اني بعض الاحيان اشك لما اشوف تصرفات من شخص يمي بالقهوه او جدامي عند المحاسب او غيرها ...وخاصه بعد المصادفات اللي ما افصح عنها واكون متأكده منها ..
شنسوي يا جماعه لكويت زغيره وكلنا عيال قريه...وهدفي الاساسي مو اتعرف على الناس برا هالعالم من جذي ما اعرفهم بنفسي ...
خلنا من هالسالفه اللي مادري شلون قايله
اتصدقون
ذاك اليوم قاعده اهذر مع صديقتي وبنت خالتي امويضي -يعني موضي-عاد وكانت هذرتنا سوالف حريم تذكرين فلانه يوم خطبتج حق ولدها وتذكرين فلان اللي قال تنورة بنتكم ظيجه وتعال يا ظحك ...
طبعا امويضي كانت متزيبقه عالريل ولو ما تزوجت لي الحين جان انقلبت ريال عاد من عرض الحجي الله يسلمنا وياكم (امويضي الحين متيوزه ومستقره ولله الحمد وعندها كوكش)وانا دايم اسميها الام المثاليه -طل بعين عدوها- المهم يبنا طاري وحده من اهلج يا امويضي -من اهل ابوها-ناعتتها-مرشحتها- حق ناس(اصيلين) المهم وبنفس الوقت دقوا ناس يخطبونها -زوجها الحالي-وكانوا مو اصيلين ..وصارت سالفة طويله عريضه وآخر شي امويضي وافقت على الثاني ..والكل قال لها يا مينونه شلون تخلين الاولي(الاصيل)وتروحين تاخذين مو اصيل ومادري شنهو....اهي كانت مو مرتاحه من الاولي ....سبحانك يا رب وتم الزواج ...والكل لامها بذيج الحزه الي مضت واندثرت
الحين انا ليش قاعده اقول هالسالفه ؟؟؟؟؟؟؟
من بين هذرتنا جان تقولي تدرين ان الأولي (الاصيل)توفى ...قلت لها ويييييي الحمدالله ما خذيته جان ترملتي صغيره...جان تقولي تصدقين عتوج شتوفى فيه ؟؟؟؟؟؟!!!!!!!!!!!!!؟؟؟
قلت لها شنهو..عسى مو حادث؟؟؟
جان تقولي :لأ ...جرعه زايده
قلت: غبراااااااااااااااااااااااااااااااااااااااااااااااااااااااااااااااااااااا هذا اللي الكل قالج اشلون تهدينه عسى الله يرحمه ويغفرله
قعدت اقول بقلبي طبعا عشان ما اتشيحط علي سبحان الله الكل قال لها شلون تهدين الأولي وتاخذين الثاني ..والثاني ولله الحمد وعسى الله يتمم عليهم ..يحبها ويحب عياله و مومقصر عليهم امصلي امسمي ..وخايف الله فيها وفي عياله واهله واهله يحبونها وام محمد قالت وام محمد سوت وشايلينها من القاع ..سبحانك يا رب ...صج لا فضل لعربي على اعجمي ولا اسود على ابيض الا بالتقوى والعمل الصالح
يعني صحيح لو تفتح عمل الشيطان بس لو المنقوزه بنت خالتي ماخذه الأولي ..جان هقوتي الحين ....يالله سترك عدد ذكرك ...
جني قمت اتحلطم وايد

Labels: ,

Wednesday, November 15, 2006

جنقر


ايام حافله ....
او انا حافله (لا باص مواصلات)أو مادري شقصتي
يمكن اللي يعرفني ...يقول هذي شفيها كلا لو يه وحوسه ومشغوله
شفيها كلا مضغوطه
هذا شقصتها
هذي شسالفتها
مع اني والله وبالله انسانه جدا بسيطه...لكن فيني عيب شرعي كلا عبالي ان الوقت يمدي وكلا عبالي اني اقدر اسوي كل شي
وكلا ما احب ارد احد
يعني المشكله مني وفيني
مع ان حتى جنقر مات بآخر حلقه
خلنا من جنقر وخلني اهذر عليكم ايامي الي طافت شغبرت
كان عندنا دوره وكان بالدوره من كل دوله خليجيه ناس مشاركين
وطبعا بما اني بلكويت ولعلاقتي القويه مع رئيس البرنامج لازم اطق السدر
واطلع فيها سبع البرمبه ...(تعرفون منو سبع البرمبه)؟؟؟؟؟
اول يوم وما ادراك ما اول يوم
كان عندي مشوارين الصبح
ويبدي البرنامج الساعه عشر صباحا
قضيت المشوارين واللي اولهم كان مطراش ....عادي محد قالي اصير مطراش؟؟؟عدل
عدل
حضرت الافتتاح ..والبرنامج الصباحي اللي انتهى بأذان العصر
رديت بيتي غيرت لبسي الرسمي ولبست لبس سبورت يتلائم مع الجوله المسائيه
وبعدها جوله مسائيه مع الاخوه والاخوات الخليجيين
وديناهم الشسمه ..لازم صار فرمان
المركز العلمي ...الاكواريوم
عقبها حضور فلم
والله خير مادري ليش نظاراتهم تخلينا نصب حوله ....نصك عين ونبطل عين وهذي قعدتنا من الصبح والفلم طول بيني وبينكم
جان انام
هههههههههههه
ابيه تحفه
اثري رئيس البرنامج هم نام ..خنت حيلي
المهم يوم خلص الفلم وبطلوا لترياكات استوعبت اني نمت
ثم وديناهم مرينا
وعقب مرينا لالالالالالالالالالالازم مادري ليش الابراج الله يزيد النعمه والفضل
عقب الابراج ياتني نزله معويه ..انا ورئيس البرنامج ..والخليجيين ما شا الله ماكو احسن منهم مادري هم ليش؟؟؟؟
لاتاكلون من الابراج نصيحه
زفتني خدامتنا الصبح وقالتلي انت ما يروح برا
ما رحت برا الصبح بس العصر انحشت ,,ويضا جوله اخرى مسائيه لكن اشوه ما اكن فيها عشى ولا جان الحاله كسيفه....وكملت شغلي ورديت
ونفس الشي اليوم .....
يمكن قاعده اهذري وايد بس ارجو المعذره معاي فلونزا جميله لطيفه ظريفه تجبر المرء على الحديث هكذا
نصيحة اخت لاتاكلون من الابراج
:(

Labels:

Saturday, November 11, 2006

خربرطه


الحياة عباره عن خليط من التناقضات ...
وانا احد اركان هذه الحياة
كيف؟؟؟
كانت في يوم من الايام صديقه ..واخت وحبيبه...واليوم حين امر مسرعه اتجاهل وجودها حتى لا تعطلني؟؟؟؟
لديها صديقات عدة ..وتناست صداقتي التي باتت تربطها بي مسجات العيد ولكن اذا شعرت بحاجه .....رفعت السماعه وطلبتني..؟؟؟؟
كان لايمر يوم دون ان يتصل بي ..واليوم لا يباركلي بالعيد؟؟؟؟؟
كان يحاول معرفتي عن قرب..وحين عرفني ابتعد عني؟؟؟
لصدقي احب عملي ....ولصدقي ابتعد عني؟؟؟؟
كنت احبه في يوم من الايام ...و اليوم نقطه سوداء في حياتي؟؟؟
كنت رمزه للسعاده ...و اليوم رمزه للتعب؟؟؟؟
كان صديق ..واليوم لاشيء؟؟
كنت اخته ...و اليوم ألد اعدائه؟؟؟؟
كنت الكل بالكل...و اليوم مصدر قلق؟؟؟
كنت فقيره...و اليوم اغنى الاغنياء!!!!!!!!!!!!!!؟
اراه عظيما ...ويراني عتيجه؟؟؟
اشعر به أمن ...ويشعر بي خوف؟؟؟
كنت أشرفه ...و اليوم لايذكرني؟؟؟
كانت ابنتي ....واليوم اصبحت غريبه عنها؟؟؟
كان معجب...واليوم اصبحت وصمة عار؟؟؟
كنت شيء جميل ...واليوم ذكرى سيئه؟؟؟؟
ملاحظه:اذا لم يفهم ما تمت كتابته فباستطاعتكم اعتباره "خربوطه"ا

Labels:

Sunday, November 05, 2006

الصباح


مادري شنو شعور كل واحد اذا غاب عن دوامه
يا جماعه احس ان يومي تافه
سخيف
ماله هدف
طااااااافكم
من جم يوم وقفت علي السياره ....وطبعا تدرون الرياييل وايد بهالديره ..المهم طقيت فلشر ..والمشكله والمصيبه العظمى اني ناسيه تليفوني بالبيت
ووالسيايير طايريين مشاخيط ...وام نبيل مو معاي يعني مافي مجال ندز السياره هههههههههههه نفس ذيج المره
المهم طبعا حول الساعه محد وقف وانا اصلا مابي احد يوقف المهم وكل ما مر تكسي اشرتله
اخر شي اشرت حق تكسي فاضي وقف
ما قصر يحليله صعيدي اسمه الصباح عبد ربه
وصلني وخذى مني دينار وربع بس والله وانا بالتكسي قاعده اقول يزاك الله خير يا الحميدي على سالفة الجواله
اي والله
وذاك اليوم تقول كويتيه دكتور ان الرياييل يوقفون دور
اي دور
اي فلور
اي بطيخ
اي زرنيخ
وانا صايره أأشر جني من هذيله اللي حرروا الفلوجه
يالله ما عليه مقيوله
راحوا الرياييل اللي يدزون الدروازه ما بقى الا رياييل المطنزه والعازه
سوري والله يا جماعه بس اللي يسمع غير اللي اييرب
ورحت البيت ناديت ابيي حبيبي خنت حيلي
وعالجنا المعضله
وكنا صيام
والشمس حنانيه
و السيايير بس شطار يطقطقول هرنات
ما يعرفون يوقفون
وتمر علي جميع انواع السيارات
الراقيه منها والغير راقيه مثل حالاتي
تدرون بعد بنت فقارى محد يوقفلي
يقولون الموضه انهم يوقفون حق سيايير البنات الكشخه
اما سيارتي اللي جنها سيارة موزع بالوطن محد يعطيها ويه
خنتي حيلي يا عتيجه
صج انج عتيجه
المهم عاد ...شنو شعوركم اذا غبتوا عن دواماتكم
شعور حلو
مو حلو
انا احس اني تاااااااااااافهه ومالي قيمه بالمجتمع
وانتوا؟؟؟؟

Labels: