Thursday, March 22, 2007

الطفوله


نعيش اول ما نعيش اطفال صغار
دوم نلعب بالسكيك وما تتعبنا الافكار
نقول يا رب متى نصير مثلهم كبار
وليمن كبرنا تمنينا لو ردينا صغار
__

يوم كنا صغار يا كثر الالعاب
من كثر لعبنا ما تفرق بين بشرتنا ولتراب
مانروح للبيت الا للنوم و الاكل
العاب إنست تلقاها اليوم مكتوبه بكتاب
......
الطفل ليمن لقى طفل مثيله
مستعد يلعب معاه ليمن تطيح ريله
ولي لعب ما يحس باليوع و التعب
وينام في اي مكان لين ايي من يشيله

.......
سبحان ربي خالق الفكر و الابصار
ما اذكر اللي صار امس وشلون صار
والبعيد اللي مرت عليه سنين طويله
اذكره زين بتفاصيله وترده الافكار

........
كانت ايام اول اطول من هالايام
السنه من طولها جنها عدة اعوام
ليشن ايامها ما تشابه بعض
وكن ايامها مرت علينا خيال واحلام

........
ايام ما عرفنا فيها ازمات وشده
بالنهار نلعب وبالليل ندور المخده
حتى الدراسه و المدرسه ما نشيل همها
لي دخنا الصبح المدرسه نفكر بالهده
,,,,,,,,,,,,,,
ايام الطفوله ما تفارق فكري و الخيال
كلها فرحه وحب وبراءه وجمال

ولكني اقول احسن مافيها

الامان والعز مع راحة البال

............

اتذكر و اعيد احداثها كنها فيلم

اتذكر المهم فيها زين وغير المهم

ماكن مرت عليها سنين طويله

مطبوعه في راسي ومرسومه رسم


............. والد عتيجه

Labels: ,

Monday, March 19, 2007

حوار مع ابوي 2

ليال تسأل:الدرس اللي تعلمته من الحياة وما راح تنساه ؟؟؟شي من علي ايامكم تفتقده الحين ؟؟
ان الانسان ما يشتغل شغله ما يحبها لأني هاد التدريس من 21سنه اذا مو اكثر لي الحين اييني ياثوم -كابوس-موذي اني داش الحصه ومومحضر ولا قعدت من النوم استااااااااااااااانس واقول اشوه انه حلم ,واللي افقده هليام البساطه
وايت وينق:اسئليه الله يطول عمره اشرايه بالكمبيوتر والثورة الالكترونية؟
ما اثق فيها ودايم لا قفلت السياره بالريموت ارجع اتأكد انقفل الباب ولا بعد ...اتخيل دايم لو تنقطع الكهربا او تطفي فجأه بس شحادك يالمسمار قال المطرقه
ولد لكويت:أفضل مكان كان يروح له و يحس انه ترد له الروح إذا كان في مشكلة في البيت !؟
عمري ما انحشت من بيتي اذا في مشكله دايم ارجع بيتي-اذاكان خارج البيت- اواجهها واحلها واذا كنت مهموم اقط همي بحضن محمد-رفيجه-دايم اشوفه بالبر
الماس:سإليه: ليش حب ألحين مو مثل حب قبل؟؟؟؟
لأن الماده دشت بالموضوع وقبل كلنا فقارى محد احسن من احد الزين منا عنده دكان بسوق لسلاح وكلنا عيال قريه وكلن يعرف اخيه اضافه لأن الحب قبل هدفه الزواج مو الجمبزه و الفضاوه
جنون احساس:شرايك في بنات هالوقت, ينفعون يكونونأمهات؟
والله بناتنا ماكو احسن منهم الا فئه قليله جدا وهي السذج وفعلا الريال اللي ياخذ من برا الديره غبي لأني ما شفت ريال خذى من برا الا وتوهق ,ثقافه وتعليم وجمال ونظافهوسنع ومنع وكلن له عيوبه وشدعوا عاد عيالنا امسمسمين قبل كانوا اهم بحاجه لنا الحين احنا بحاجه لهم وبنات هالوقت كأمهات احسن من بنات قبل بس قبل لا تضمها اسئل عن امها
برااك:شرايك بكتابات بنتك ؟
ما قريتلها ...لكن هقوتي انها احسن من اللي اشين منها ...سمعت لها بعض الزهيريات واستانست
سلوقا:شنو الفرق بين أيام السبعينات وأيامنا الحين؟
بالسبعينات كنا كويتيين والحين صرنا مصاروه
الخاطر:شرايك بالشاعر زيد بن حرب؟
ما اعرفه
سالفة قلب:من مِن الشعراء يستمتع بالقراءه له؟
صقر الشبيب,فهد العسكر,احمد شوقي,فهد بورسلي,خالد الفيصل....والله وايد
احلى انجنير:اكثر شي صعقك بكويت اليوم يعني شي مهوول ما هقيته من اهلها من حكامها من ايا كان .. بس ما كان واضح جلي .. انما يااااا على غفلة اذا مو غدر؟
المجلس الوطني بط جبدي ذيج الايام وعقبه على طول صارموقف الغزو شلون صار وشلون ما اتخذوا الحذر وكنت متوقع الغزوو والشي اللي ماهقيته يصير ضعف موقفهم من اللي كانوا يبون يسوون انقلاب بالثمانينات وبو عبدالعزيز يعرف السالفه كلها احسن مني (احمدالسعدون)ا
نصيحه للشباب ؟
كل ما كبرت المره زادت فرص الاسقرار ولاتدلل المره قبل لا تبخصها
نصيحه للبنات؟
عن الطفاقه وتزوجي عقب ما تشتغلين
نصيحه للحريم؟
المره السنعه ما تهد بيتها الا اذا كانت جد بايعه
نصيحه للرياييل؟
خير متاع بالدنيا المرأه الصالحه
الجماعه اللي طلبوا شيء من الشعر....ان شا الله في البوست القادم اشكر تواصلكم

Labels: , ,

Saturday, March 17, 2007

حوار مع ابوي


تاق مع الوالد


اشرايك بالحب؟
احسن من الزقاير
اشرايك بالصداقه؟
بين الاهل اذيه ومع الغرب تشره
تؤمن بالحوبه؟
جدا وخاصه من الحريم
شرايك بالاولاد؟
مادري ليش يفرحون فيهم...
شرايك بالبنات؟
ملح البيت والبيت اللي ما فيه بنات يأجرونلهم
شرايك بأم كلثوم؟
ذوق كبار
وعبدالحليم؟
ذوق الكل
وعبدالوهاب؟
ذوق محدود لكنه مؤدي
منو تحب من الاصوات الحاليه؟
احلام صوت واداء ومقامات, محمد المسباح بس صوته تغير يوم غنى الفريه,رويشد اداءه غير عادي,وميحد حمد اعتبره بعد عبدالحليم بجمال الصوت على طول
منو المطرب اللي عندك كل اشرطته؟
فيروز...سابقا
اكثر فن شدك؟
السامري
شرايك بالزواج؟
بدايته صعبه لكنه يحلي ايام المتقاعد .
شرايك بالتقاعد؟
موت
شرايك بالبحر؟
يثير الاعصاب
والبر؟
هدوووووء
والمباركيه؟
سوق المتقاعدين
اكثر قرار تحسف عليه؟
اني ما درست طب
واحلى قرار اتخذته؟
انتقالي لبيتي الحالي
حبيت من قبل؟
يالخبيثه...ماحبيت كثر امج
ناس دايم تحلم فيهم؟
امي وابوي
طاري يبجيك؟
قصيدتي بأمي
عندك مشكله بالبجي؟
لا ابدا ...ومعروف اكثر واحد ابجي عقب الدفان بالمقبره
طاري يضحكك؟
قصيدتي بأول حفيده
ليش؟
لأن ماعجبتها وقالتلي بالحرف تييب اليهد وغيرت جم شطر فيها عشان ما تزعل
ليش كتبت بالناس كلهم قصايد الا انا؟
لأنج احلى قصيده

شنهي اسباب الطلاق حاليا؟
الريال ما يعرف للمره
وشرايك بالجيل الحالي؟
فيهم الخير كلهم والله
يقولون انهم امدللين؟
ولا مدللين ولا شي محد مدلل كثرنا حتى اللي ما عنده شهاده يلاقي احسن الوظايف بس خبرج الاولي لاعب والتالي تاعب
انسان كان ودك تقعد معاه اكثر؟
الوالد
انسان تحسفت انك ما شفته؟
رفيجي حمد قبل لا يتوفى وكتبت فيه مرثيه حمد

للقاء بقيه

اللي يحب يوجه اي سؤال للوالد ترى حاضرين

Labels: , , ,

Wednesday, March 14, 2007

صيده ما صيده



بكسر الكمبيوتر لأني هذي المره الثالثه اللي اكتب فيها هالبوست ...
.......................................................................
احلى الصدف بأحلى الناس ,,, نجمع بناس وايد ولما نقعد نسولف معاهم شوي نطلع نعرفهم
من بعيد
من جريب
مو هذا المهم ...المهم ان كلنا عيال قريه
وبما ان اغلب افراد مجتمعي عندهم اكثر من نشاط على صعيد العمل او على صعيد التطوع و الانماء تجاه المجتمع فتلاقي الصدف تزيد
اليوم كان عندي معرض والله ما كثر المعارض هليام ....وبيني وبين مشرفة النشاط علاقه حلوه تربطني فيها من حوالي سنه ...واثناء حديثنا مع بعض ...قلت لها عن موقف طريف صارلي مع مدير موجود في دوامها لكن بمكان ثاني وظحكنا؟؟؟؟
اسئلتني: من وين تعرفينه ؟؟؟-اي المدير
قلت لها: رئيسي -بدوامه الثاني طبعا-وزميلي بنفس الوقت
قالت:تدرين عتيجه
قلت:خير؟؟؟؟
قالت:ترى فلان زوجي
انا: معقوووووووووووووول بو محمد لالالالالالالالالالا
ونظحك شلووووون
تقول: انا طول عمري اناديج عتيجه و هو يناديج ال ........ (اي اسم العاليله فقط)وعمري ما فكرت اربط الاسمين مع بعض علما بأني انا وياه نعرف اسمج الكامل...بس تدرين عتيجه
انا:لامادري ...خير
اهي:ترى ريلي يمووووووووووووووووووت عليج
@@
طبعا الويه صار اشارة مرور
برقعها ...لالالالالالالالا شلووووووووون
تقول:يقول ال .......قالت و ال..........سوت ودايم يسولفلي عنج اكثر من الباجي رغم انه ما يسولفلي وايد عن شغله.....لكن ما يناديج الا بعايلتج جنج واحد من الشباب
انا:تدرين كلا رياييل وانا صايره بينهم الزميل السادس
وتدق عليه وتحطه سبيكر تقوله:شلونك فلان ماراح تييني المعرض
يقول: وحبيبتج عتيجه ما يت
انا:@@!!!!!!!!!!!!!!!!!!!!!؟
اثاري حتى اهيه لاجته فيني
تقول:تعال عندي لج مفاجأه حلوه وانا ويا المفاجأه ننطرك بستاربكس ....
يرد: والله مشغول ان شا الله اييكم العصر ...
تقوله:كيفك بس في مجال لتأجيل المفاجأه وتطالعني تبتسم
سبحان الله اثنينهم يسولفون عن النفس الشخص اهي تسولفله عن عتيجه اللي معاها بأحد الانشطه وهو يسولفلها عن عتيجه الزميله او ال........وما فكروا انهم يسولفون عن نفس الشخص
عجبتني ردة فعلها
جدا حلوه وجدا طبيعيه ......ذكرتني بزوجات الزملا اللي تنقسم ردود افعالهم معاي على قسمين
القسم الاول تحاول تعرفني على زوجها اكثر شيحب شينرفزه شياكل شيشرب جني ما اعرفه يا معوده كافي اهوه معور راسي تيين انتي تعورين راسي فيه ...واحلى شي اذا انا اكون اعرف عنه شغلات اكثر من اللي اهيه تعرفها ههههههههههههههه والادعى والامر اذا اهوه مسولفلي عن بقارتها - من وجهة نظره طبعا-مع العلم انه مو دايم يكون محق
القسم الثاني كارهيني من غير ما اسوي لهم شي ويسلمون علي يصافحوني وانا عناد اتلهم وابوسهم حتى لو ما اواطن رياييلهم ههههههههههههههه ما ادري اختي احد قايلج ريلج ألين ديلون
اما ازواج الزميلات هذيله اللي ودي فناقر اعطيهم ...داااااااااااااايم يطلعون انه زوجاتهم بقر واهم الفاهمين علما بأني غالبا ما اجد العكس ....واشوف ان اهمه الثيران اللي ما يدرون وين الله قاطهم..بس عدم ثقه ويبون ينزلون من قيمة زوجاتهم شيسووون ...يطلعونهم بقر ويفتكون....
وبما ان ذكر الشيء بالشيء يذكر ذكرت صديقتي وبنفس الوقت خالتي ....طرت علي انها قالتلي انها تعرف زوجة رئيسي بو محمد ....جان اقول حق رشا
انا: يعني تعرفين فلانه الفلاني
جان تبطها ظحك
قلت لها خيييييييييييييييير؟؟؟
قالت: توها معطيتنا فاصل فكاهي
مادام فاصل فكاهي يعني لازم انا معاها
انا:شعننه ؟؟؟؟
قالت:عندها بنت اخت طماشه اذا وقفت عليها السياره دزتها بالشارع
هههههههههههههههههههههههههههههه خير
انا :رشا؟
رشا تضحك : هلا




انا: ترى اللي تدز السياره انا
هههههههههههههههههههههههههه
يا المفضوحه يا عويش حتى هالسالفه قلتيها
انا اورييج

Labels: ,

Sunday, March 11, 2007

اعتراف واسف


من الصعب على الانسان ان يعترف بأخطائه ...ولكن من الافضل له ...فلم اكون عتيجه حتى اسخر من
شكل
لبس
خلقة رب العالمين
وانا شخصيه غير معرفه بأل من خلال مدونتي ...فقد ارفقت خبر وصوره .....وكنت انتظر مجموعه تعليقات تخص الخبر والصوره جاهلة اننا مجتمع بصري يدقق بالصوره وينسى الخبر
بالاضافه الى اننا كويتيين ....يعني (مايصير ما انتطنز)اعلم انني اخطأت في ايصال الفكره وانا آسفه جدا
واعترف اني لم اوفق في ايصال المعلومه


الا لمدون واحد

  • Labels: ,

    عفوا عطل فني

    كنت اعلم اني عائده وبقوه .....اللي حصل ليس خلل فني انما خلل حريات سياسيه بالبلد
    ما فييييييييييييييييييش فايده
    شكرا عبداللطيف الدعيج
    شكرا دكتور انس الرشيد
    اشكر كل اعلامي وغير اعلامي ساهم في عودتنا من جديد
    وليعلم الجميع ان الحريه اساس البلد
    ...............................

    Labels: ,

    Saturday, March 10, 2007

    هل لديك تعليق ؟؟؟؟؟

    Labels: ,

    Thursday, March 08, 2007

    ظحكات

    قبل لا آوي الى سريري ....قعدنا قعده من زمان مو قاعدينها ....ومادري شياب طاري سوالف الغزو والتحرير على راسنا طبعا كانت في مواقف ما اقدر انساها ....تموت من الضحك ...
    اول ايام الغزو عندنا ريال عووود بالفريج اللي ورانا اسمه بو نايف ....شاف ولد يرانا عاد ولد يرانا هذا شايف رووووووحه وعنده من نفسه ملك وما يعطي ويه يعني مغرور حده ومملوح ملح هنود اسمر واشابيهه حيل دقاق وشعره ناعم ....يحليله ونص بنات الجامعه ودهم يطالعهم امطالع .....لمراد عاد ...ابوي كان قاعد يسولف مع بو نايف عند باب البيت ومر المغرور عليهم وكان لابس وزار و وطاقها جريمبه .شكله قاعد ينقل اغراض او شي جذي...سلم عليهم ووقف معاهم يسولفون عن منو بيطلع من الديره ومنو بيقعد ولوهله ....بونايف قاعد يطالع المغرور
    جان يقوله :يا ولدي انا عندي لك نصيحه
    المغرور:خير ؟؟
    بونايف:اذا يووك لعراقيين يبون ياخذونك قولهم آنا مهري
    هههههههههههههههههههههههههههههههههه
    المغرور: لابوقولهم انا كويتي واللي فيه ............الخ
    بونايف:طيعني يا ولدي ترى صدام زين مع اليمن
    ذاك عنده من نفسه وين ووين وبونايف يقوله قول لهم انا مهري
    عاد والله يابها صج صج شكله من هذيله اللي يلقطون قات
    ههههههههههههههههه
    وبالمسيره ...كانت الرغوات قليلة ...جداجدا ..المهم يا واحد ما نعرفه ولا يعرفنا يبارج حق عمتي الله يرحمها-قاعده جدام مبطله الدريشه-وعمتي مره عوده يقول لها مبروك عليج يا خاله التحرير والاستقلال-طبعا الحبيب يبي وحده من اللي معاها يعطونه ويه- وان شا الله ينعاد عليج بالافراح ويهذر ويهذر ويهذر
    عاد طولها وهي قصيره
    ....جان تطلع وحده من اللي قاعدين ورى ايدها من صوب عمتي -الله يرحمها-وترش على ويهه رغوه
    ههههههههههههههههههههههههههههه
    .
    مو هنيه الضحكه
    جان يقوم ويشيل الرغوه اللي على ويهه
    ويمشها بويه عمتي
    @@
    ههههههههههههههههههههههههههههههههه
    ابيه مت ظحك
    الاقيكم في بوست ثاني ان شا الله

    Labels:

    Tuesday, March 06, 2007

    كيف تصبح حمارا!!!!!!؟؟

    لا اعلم لماذا؟؟؟؟
    ولا اعلم لم هكذا ومالتركيبه الفريده التي يكون مسماها نهاية الامر عتيجه؟؟؟؟؟؟؟؟
    ابيخ مافي شخصيتي .....ان علاقتي بالناس مهمه عندي
    مهم انهم يحبوني
    يحزني اذا حسيت انهم ما يحبوني
    واكره شعور الواحد يواجهه القتل ......القتل اثناء الحياة
    لما تلغي ستين الف موضوع من حياتك في سبيل موضوع واحدوتسخر نفسك وجهدك ووقتك حقه وحتى صداقاتك وعلاقاتك تسخرهم حقه
    لما تحب مكان او موضوع اكثر من بيتك وتروحله صبح وعصر
    لما يضيق خلقك وتلقى ظالتك بالمكان اللي تحبه
    لما تحب كل شي يربطك بهالمكان
    لما يعطيك هالمكان كيان اجتماعي ...
    لما يكون وقتك معروف لهالمكان من الساعه لفلانيه لغاية الساعه العلانيه من غير اي نقاش
    لما تكشت بالدنيا كلها عشان هالمكان...وتطوف ستين الف واجب اجتماعي
    ترى انت في النهايه
    خبل
    ......
    بدايه ما ارتحت لك ....ومازلت ما ارتاحلك ...لكن خذيت الامر معاك بالظاهر وعديتك مثل اخوي ويمكن اكثر ....قمت معاك وقعد معاك وعزمتك وعزمتني عالحلوه والمره والشينه والزينه .....استحدثتلي منصب ما فكرت ولا طمعت فيه ....شكرتك وحبيت ربعي يكونون معاي....استحدثت لهم مناصب وشكروك اشتغلنا يميييع وحبينا بعض يميييع ....تليفوناتنا ما توقف حتى يوم اليمعه
    صارت قصص
    صارت سوالف
    صارت حزاوي
    خدمتك كثر ما اقدر
    ضيعت اكثر من ثلاث سفرات
    وبديت نفسي على المجموعه...وحمدالله بدون اي ماديات
    كنا احنا اهم شي عندك ...على ما تقول .....وكانوا يقولونلي ترى مصلحجي ويستغلج
    وكنت اطوف الحجي
    واذن من طين
    واذن من عيين
    ياك جلب المدير ....وغير مفاهيمك صوبي ......ولأن جلب المدير مدير....صرت اخس منهم او من الاساس انت جذي.....وما ان تغير مسماك ....ووصلت للي تبيه حتى الغيت كل المناصب
    بطريقه دنيئه ....كأنك تنتقم مني
    و اولهم منصبي
    ماهمني المنصب
    يهمني البشر
    وبعدة طرق خايسه تغيرت علي النفسيات ....سواء منك
    ولا من جلب المدير
    تالي تييني وتقولي عليج شكاوى
    ومن زووود لخبال ما فهمت شتقصد بحجوتك هذي
    ما توقعتك بهالدونيه
    وظليت اشتغل لمجموعتي بطريقتي
    واخرتها تطلع علي اشاعه
    واتصدقها
    وتخلي اللي حوالينك يصدقونها
    يا ربي شلون في ناس تنسى الطيب؟؟؟؟
    شلون في ناس تنمسح ذاكرتها بهالطريقه؟؟؟؟
    شلون في ناس تنسى الاكل بنفس الصحن؟؟؟؟
    معقوله في ناس تتعامل مع البشر مثل ما اتعامل مع الموبايلات
    يستفيدون منك كثر ما يقدرون ولا خربت وشافوا غيرك بمواصفات احسن ....بدلوك ..؟؟؟؟؟؟؟؟؟
    واذا لقوا مواصفات احسن ردوا بدلوهم؟؟؟؟؟
    ....
    وبدى شغلك على ناس وناس
    وللأسف كان شعارنا ......المساواه
    كنت غبيه اعترف
    وماراح اصير ذكيه
    تذكرت كلمة ابوي ....ديري بالج من هالريال......وما عطيت لكلمته بال
    قالها ...وهو مو مدرك معناها.....لكن توني عقب سنه وشهر بالظبط ادركت معناها
    واكبر مشكله ممكن يعاني منها الانسان ...ان تصير له كل هالسوالف وهو سااااااااااااااكت
    او يتحجى وهو ساكت
    عمركم شفتوا احد يتحجى وهو ساكت
    اشكثر انا غبيه
    اشكثر انا ما افهم البشر
    ولما تعد واحد اخوك الصادق الصدوق ويتغير عليك بكلمه ...يمكن انك غلطان عليه لكن يظل حبه بقلبك ....وتظل في ذكريات حلوه....وفجأه يلغيك الاخر بتصرف اقبح
    شتسمي روحك حزتها
    مو حمار احلى لقب ؟؟؟

    Labels:

    Monday, March 05, 2007

    يكفيني ان تسمعني

    ما اجذب عليكم ...
    ميلادي اللي طاف ...كان ظايق خلقي
    وميلادي هذا نفس الشي
    مادري شسالفة ميلادي مع الوفيات
    انا ما اعتقد اني قبسه ...ولا اعتقد ان للتاريخ علاقه
    لكن اتضايق لما ميلادي يرتبط مع وفاة ..ومو وفاة عاديه وفاة عميييييييييييد..من حقي ولا لأ؟؟؟؟؟؟
    السنه اللي طافت كتبت البوست من هنيه ...ياني خبر وفاة عميد عايلة امي وعمها ...كان ريال حبيب وتحسفت اني ما شفته بساعاته الاخيره..بس الحمد الله كنت شايفته قبلها بأسبوع
    والسنه هذي ...عميد عايلة قريبه علي حيل..-عيال خالتي-...كنت احبه و ازوره مخصوص لأن جد جد حبيب واخر زياره كانت لي بعيد الاضحيه وكان حايشه خراف وكان خرافه على الصلاة ما شا الله... ويوم دريت انه بآلآخر ايامه وانه امتكلف اقول حق عياله روحوا حق ابوكم
    باجر اتحسفون
    قعدوا يم راسه
    ادعوا له
    شوفوووه
    بس ما توقعت انه وفاته بتصير بيوم ميلادي.....سبحان الله...
    اللهم لا طير الا طيرك ولا خير الا خيرك ولا اله غيرك
    اللهم ارحم مواتهم واغفر لهم ولنا ....
    ظيجت خلقكم ادري ....بس حبيت انكم تشاركوني الاحساس

    Labels:

    Sunday, March 04, 2007

    خسوف وميلاد

    غاب بدري الا يا من يجيبه
    ياخذ اجر المولع في هواه
    كل حبيب تسامر مع حبيبه
    وانا مالي حبيب اسمر معاه
    من هو المطرب؟؟
    اليوم اللي الواحد يحس انه يومه هو اول يوم من كل شي او في اي شي مميز حيث يشعر بشعور مميز


    اول يوم بالحياة
    الميلاد
    اول يوم زواج
    العرس
    اول يوم عمل
    الكرف
    اول يوم دراسه
    المستقبل

    وفجأه وانا اقلب بالمحطات طلع برنامج ذكرني بأول يوم روضه ..كان غير عن اليهال لأن ما يجيت ولا صحت كل الموضوع ان امي ودتني لي صفي وقلت لها مع السلامه واليوم الثاني خذاني الحارس من ايد امي وسويت لهامع السلامه بأيدي طبعا امي ذاكره التفاصيل لأني ما بجيت ولا صحت من بد اخواني ....وروضتي كان يمها فرع ومسيد واذا اهلي مالقوني انطرهم دوروني بالفرع ...وهكذا و اول يوم ابتدائي صورني ابوي بكامره كانون توه شاريها ب 85دينار اذكر سعرها ...كانت حلوه وصورها عجيبه لكنها خربانه الحين ولي الحين محتفظه فيها ويوم بغيت اصلحها قالولي تغير الوكيل !!!!! واول يوم متوسط حسيت اني كبرت وصرت عوده ....واذكر مس الانجليزي يوم اسئلتنا متى عيد ميلادكم ...بيني وبينكم ماكنت ادري وقلت لها 2 -11 شكو مادري بس جني ذاكره جذي ويوم رحت البيت سألت امي قالتلي ميلادج 4\آذار-مارس .....يعني مااااااااله علاقه بيوم الميلاد اللي توقعته او اخترعته ههههههههه لمراد......

    كل عام وانا بخير ...اكثر ما ميز ميلادي خسوف القمر....

    وثاني ميلاد معاكم

    احبكم كلكم


    شنو سويتوا بأول يوم مدرسه قولوا الصج ؟؟؟؟

    Labels: