Monday, April 30, 2007

ابي اطبخ

هالصوره وايد احبها ومنزلتها بموبايلي من كثر ما تظحكني ماخذتها من النت طبعا
...............
البلعه :

لي علاقه معاها مو طبيعيه يوم اقول يا حلو اكل البيت ويوم اقول يا حلو اكل المطاعم لأن الاثنين يرضوني واحلى شي اني لا دشيت مطعم يديد احب ايرب شي يديد واحط عيني على طلب مشهور عشان اذا ما عجبني رديته وطلبت غيره

اي رديته

ارده وجنى العيد

وعلى طاري الرده ابوي فيه طبع جدا جدا مو حلو وبايخ من واحنا صغار اذا شرينا شي لو غالي لو شنو لو نموووووووووووووت ما نرده وناخذ شي غيره...وبعض الاحيان لما نوصل المحاسب ومادفعنا ما يرضى نرد شي فالله يسلمنا وياكم ياتني ردة فعلا مخالفة بالاتجاه .... ما اذكر في مطعم ما رديت اكلهم ...عندي ربع خذوا هالطبع مني واهلهم استغربوا هالطبع...لأني بكل صراحه قاعده بفلوسي وماني مطره ادشش شي الى معدتي مو عاجبنني او غصبا علي .... مره من المرات قلت له نفسيا ما عجبني الاكل.!!! كا ن شكله مو حلو

ومن كثر هالسوالف اللي اسويها عندي وايد ربع وزميلات وزملا اذا راحوا مطاعم يتصلون علي او يدزون مسج

شنو احلى شي عند المطعم لفلاني؟؟؟؟؟

شكلي بسويلي خدمه مع الام تي سي حق البلعه و الطب البديل

;p

...بالنسبه لي ذوقي جدا خاااااص بالاكل اكل كل شي بس من غييييييييير طماط وماتعجبني الوجبات السريعه خاصة

برجر كنج-كنتاكي-هارديز مادري الصراحه اعتبرهم اكلل دكاكين مو صحي كلللللش واحس وانا اكلهم اني قاعده اكل دهن وادري اني بيصير في بطني شي .... بعض الاحيان اذا يوعانه ومستعيله اخذ من مكدونالدز احس انه افضل منهم ...بس اللي صج احبه عالسريع

البيتزاااااااااااااااااااااااااااا

ودرجه اولى عندي بيتزا بيتزا حتى امي وابوي حبوها لأني غثييييييييييييييتهم فيها بالعشر الاواخر ...ما يمديييييييييي شسوي....

.ومع كل اللي قلته الا اني فعلا اتلذذ بأكل البيت

وما اعرف اطبخ ولا احب اطبخ

وكل ما يابوا طاري الطبخ فلت يا جماعه الناس مقسمين الى فئتين

ناس تطبخ

و ناس تاكل

وانا من النوعيه الثانيه....... لكن فعلا ياني شعور ودي اطبخ

وما اعرف شي

فشله لا اعرف اطبخ عيش ولا سمج ولا شي ...... الوالد يشجع ولو احرق الاكل بيقولي حلو ادري لكن الوالده الله لا يوريكم كلا تخاف على هنودها وعلى مطبخها مادري عبالها بفجره ولا شالسالفه........ مره من المرات قلت لها يما بطبخ مرقوق

قالت : ما تجيسين مطبخي

قلت لها مو مشكله اطبخ بالحوش

المهم عقب ما حطيته ابراسي وعقب الدوام وعقب صلاة العصر ويومها كنت صايمه....حطتلي اغراض المرقوق بمطبخ التحضير الداخلي

وخلت وحده من لهنود تنطرني بالمطبخ ..... مادري شبسوي قوزي

كلا مرقوق

وطبعا انا ما اعرف ولا شي

قلت لها انتي وجهي وانا اسوي عشان اتعلم المهم اني لقيت كل شي امقصص يعني ما جست السجين

اللي سويته بس اني حطيت للحمه بالجدر وحطيت عليها طماط وبصل و ..........الخ

وبعد نص ساعه اظن حطيت خبز صاج وصكيت الجدر

وتالي طلعت مرقوقه تييب اليهد

كل خبزه لازقه بالثانيه

محد كلاها الا انا وابوي

وابوي يقول تخبببببببببببببببل ...على قولته

وهي لا تخبل ولا شي

هالسالفه من ثلاث سنين حوالي

وحرمت ادش عقبها المطبخ لأني تعبت نفسيا من امي واللي تسويه معاي كل ما بغيت اطبخ

وكرهت الطبخ

وكل شي له علاقه بالطبخ

وفتافيت

بس و الله مو حاله

ابي اطططططططططططططططططططططططططبخ يا ناس

____________

شنهو المطعم اللي تحبونه وشنهي الاكله اللي تفضلونها فيه؟؟

Labels: , ,

Saturday, April 28, 2007

طواريء



اسبوع مليئ بالمفاجآت

و

دقات قلبي كادت ان تقف ..... هذا ابلغ ما استطيع قوله

في نفس الممر ونفس الكرسي جلست للأنتظار ليس بى تلك المشاعر ... الا شعور يجبرني للأنسحاب

الا وهو النعاس .....ولكن

عندما تكون من هي في غرفة العمليات

رفيقة دربي

صديقتي

اختي

التي طالما تجادلت معها واحبب تواجدها متظاهرة بضيقي منها ....فتصبح الكفه متأرجحه غير متساويه

اعتصرتني الدمعه فدخلت الى دورة المياه لأفرغ مافي عيني وجعبتي من آالام القلق واغسل وجهي لأعود مجددا......حيث اني لا اجيد التصنع كثيرا...

عمليه قيصيريه...................... لييييييييييييييييييييييييييييييييييييش؟؟؟

الطفله تعبانه

لالالالالالا الــــــــــــــه الا انت سبحانك اني كنت من الظالمين

ارددها

ارددها

يذهب اخي....عفوا زوج اختي للصلاة و الدعاء في مصلى المشفى يرافقه والدي

يخرج طبيب ذو هيئه مريحه مرتديا لبس العمليات

يسأل اين الوالد

اركض باتجاه مصلى الرجال اجده يصلي ووالدي يقرأ القرآن ااشر له يأتي خلفي راكضا

ليقول الطبيب

الحمد الله عالسلامه

الام شلونها

يرد:بأحسن حال...البنت شاربه ماي وحمدالله الحين احسن

ابكي

و ابكي

وابكي

يبكي معي اخي -زوجها-يشاهدنا الجميع وعلامات الاستغراب تعلوا وجوههم فلا يجب علينا البكاء في مثل هذه المواقف......

احلى هدية ان تكوني

خاله

فخالاتكم امهاتكم

والخال والد

مبروك ما يانا .....

صرت خاله للمره الثانيه بعد عشر سنوات

Labels:

Friday, April 20, 2007

حواي



قرائاتي الليله كثيره والله ودائما الانسان اذا ما لقى شي يكتبه ما يكتب احسن له ولا يكتب لمجرد الكتابه مثل اصحاب العواميد بالصحف اللي لالالالالالالالالالازم يكتب يومي ولا ما يكتب ... من جذي الكثير منهم يطيح بأخطاء بعكس اللي يكتب عند الحاجه .. مو لمجرد ملئ فراغ شاغر .... لمراد ...كلن بعقله راضي وماني افضل الناس بالنهايه ...
خلونا بقرائاتي الليله قبل المنام ...
الله سبحانه مبتليني بالقرائه ... وفعلا فعلا اذا مر علي شهر ما قريت فيه كتاب عالاقل احس اني بتراجع ومن اكثر المواضيع اللي ابحرت فيها الطب البديل والعلاجات الشعبيه وصارلي موقف حلو .....

كان عندي زميله جهراويه امها معاها خشونه ... ووصفت لها وصفه طبعا مو من مخباتي ولكنها وضفه متداوله في الجيك والام تحسنت حالتها او طابت ما اذكر بالظبط لأن السالفه قديمه ودقت علي امها وقالتلي اللي تامرين فيه انا حاضره

قلت لها ابي بيت مساحته الف متر على ثلاث شوارع ... هههههههه

اتغشمر معاكم ... قلت لها ابي دعائج ...جكككك بوووم اهتميت اكثر بهالموضوع وزادت قرائتي اكثر و اكثر وقمت اضرب على كبير الى ان صرت بمنزلة الاستشاري للبعض من الاهل و الاصدقاء وغيرهم ....و البعض الاخر يعتبرني ماعندي سالفه .... الشافي الله ...وهو المعافي

ومن اسبوعين صديقتي قالتلي بطني اذاني كلا غازات ...وصفت لها العشرج ...لا ووديته لها وعينك ما تشوف الا النور ههههههههههههههه مسكينه قلت لها نقعيه ست ساعات بماي مغلي وشخليه وشربي قلاصين ...اهي نقعته 12 ساعه وشربت ثلاث قلاصات كوكتيل ههههههههههه الامور صارت هدادي .. الله بالخير عندها ...بس اهم شي انها طابت .....زين يالملقوفه ليش هالكثر....تبي تشوف المفعول دايركت ....بس تقول انها تشعر براحه عقبه ولله الحمد .... والله فجأه صرت حواي ... فعلا فعلا ...يعني صحيح شي يونس وبنفس الوقت مسؤوليه ...وساعات بعض الاوادم فيهم نقص صرت بالفطره احفظ الفواكه والخضار واللي يسمعني يقول اسكت .... فمن باب العلم ... اللي يبي شي او يسأل عن شي ترى انا بالشوفه .....لأ ما يجوز ان الانسان يكون عنده علم ويكبته. واخاف اموت ولا شي فأستفيدو مني قبل لا انقرض

....دمتم سالمين

الحواي عتيجه

Labels:

Sunday, April 15, 2007

لمفلس

اذا كان الفكر فاضي
فالعقل بيكون فاضي
والقلب فاضي
فأكيد الجيب فاضي
.....
تفتح البوك يرد عليك بحسره
وانت ميت من الحره
لاتقدر تطلع ولااتسلف ثاني مره
بسنا سلف يا ناس
ضعنا بالطوشه وطاح الفاس بالراس
كلا من الحكومه...لالالامن المجلس
دايم يطالب ويأملنا ونفلس
وانيمع الخرده اللي بالدرج
والحصاله اذا مافيها حرج
....
صعبه بهالسن تطر من امك
واذا طريت سمعتك اللي يسرك
وصعبه اتطيح عن ابوك
لا طلبته صكك على راسك بالبوك
ياحلو صمونة بطاط وفلافل
ماكو غيرها اذا الحال قافل
...............
احلى شعور يوم التفليسه
لارفعت تليفونك وسمعت رصيده
لاقمت تاكل بالبيت متجاهل بيتزا بيتزا
لاقلة طلعاتك والتليفون من اول رنه تشيله
.............
لاحطيت في بالك تسدد لديون
لاقررت انك ما تعيش مديون
لاواعدت نفسك ما اتسلف
وعلى نفسك ما اتكلف
وعن الدفع ما اتخلف
لأن الدين عمات عين يقولون
ولا دقيت على البنك تليفون
مو بالحزه اللي يدقون
وقال الكمبيوتر: ادخل رقم حسابك
تدقه وانت مغمض ..كأنك للمعاش ضامن
وقلبك يرقع ويرقع
خايف على بوكك لمقرقع
اللي يشوفه يحسبه كلا فلوس
مايدري انه بلكروت متروس
وتنطر الكمبيوتر ينطق بلهفه
جنك بتموت ورقبتك على السماعه ملتفه
يطول بالرد هالمره ولد الذينه
متى تنطق هالخزينه
بعد ما المركب يوصل المينا
وتبدي تشكل بالدعاء
اللهم ارزقني رزقا طيبا
اللهم افتحلي ابواب رحمتك
اللهم ارزقني من حيث لا احتسب
وينطق بعد ما قزرتها دعاء
وحالتك صارت اعياء اعياء
لديك ....يقولها بإزدراء
ثمان مئة ...والفرحه خذتك للسماء
ويكمل الجمله البنك الحنون
بكلمة تصحي المينون
فلـلللـــــــــــــــــــــــس .......يقولها بكبرياء

عتيجه ابريل 2007

Labels: ,

Thursday, April 12, 2007

احبكم



عدنا و العود احمد صحيح اني فجيت عنكم 21 يوم بس والله كأنهم سنه و اعتذر عن غيابي الغير مبرر ....حمدالله ماعلي شر كل الموضوع ان ظهر شي فجأه بحياتي لهاني شوي او بالاحرى مو ظهر كان موجود بس توني التفت له ....سويت بعض التغييرات بحياتي على جميع الاصعده وصرت منظمه نوعا ما مو لويه مثل قبل ...ادري في ناس بتقول الطبع يغلب التطبع...بس الواحد يقزرها محاولات لين يموت وهذي الدنيا وقاعده اطور من نفسي من الناحية المهنيه و العلميه و العمليه وعسى الله يكتبلي اللي فيه الخير والصالح ويكتب حق واحد نيته طيبه الخير قولوا آمين

انظميت حق جماعه طيبين و يبوني وفجيت عن جماعه هم طيبين بس كثر فيها الحجي ماكو نصيب وخذاني الوقت نوعا ما بس والله الكل على بالي وبعض الاحيان اذكر سوالف لبلوق بوست واقعد اظحك

فعلا فعلا فقدتكم وترى مو بس انتوا فقدتوني في ناس بعد فقدوني لكن فعلا انتوا غير

انتوا اللي تدرون عن معظم ما اشعر فيه من هم غم وحتى فرح وحالات ظحك لا شعوريه

البعض يفهم لهجتي رغم انه ما يسمع صوتي والبعض يفهم ايمائاتي والبعض الاخر يعرف شلون يبرد جبدي

والبعض يخليني اعصب

وفي ناس يعرفون بأي نفسيه اكون كتبت لبلوق بوست

شلوووووووووووووووون تبوني اتخلى عنكم

مايصير

الفج ممكن بس اتخلى

الله لا يقولها

...

اشكر كل من تعنى ودش بوستي

واشكر كل من سأل عني

وكل من ماسأل عني

وكل من فقدني وكل من مافقدني

أحبكم جدا جدا

والله لايحرمني منكم

Labels: