انا وجبنة كيري!!!

مادري اليوم اشذكرني بدرس يوزد تو

Used to

اللي كنا ندرسة في ثالثة متوسط كان يتكلم عن عادات الانسان كان يسويها تالي اقلع عنها لمراد تذكرت عدة مواضيع وامور مختلفه وابرزها الاشياء اللي كنا نعيب عليها تالي قمنا نسويها و اولكم انا

عيبت عاللي يلبسون بنطرون وحجاب اقول شنو فلسسسسطن........ الحين البس بنطرون وحجاب .......اختي كانت اتطنز علي ......الحين تلبس مثلي ...ولكويت نصها مثلنا
كنت ما آكل وجبات سريعة ... الحين آكل وجبات سريعه (عدى كنتاكي-برجركنج-هارديز- نايف ...اش بقى بعد )
عيبوا علي اول ما لبست ملفع ملون –كانت الموده خيشة- اللي يقولي مذيعة بالتلفزيون اليمني واللي يقولي مرحبا بكم في مهرجان خريف صلاله .....الحين كلللللللللللللللهم يلبسون ملفع ملون وانا رديت عالاسود .......تالي عيبوا علي يوم لبسة قبعه/ امطه/ قبوعه مع الملفع بما فيهم يدتي الله يطول بعمرها ...الحين كلهم يلبسونها واولهم يدتي لول
كنت امر يم دورا الشيراتون يوم الاحد اظحك على لهنود اللي يصورون كل مايو دوار الشيراتون ....الحين كل مناسبة اصورها حتى لو رايحه ستاربكس ...الله يعافي كاميرا الموبايل قلبتنا هنود
كنت اعيب عاللي يلبسون نظارة شمسية بمكان مغلق مسكر ....الحين ما اقطها .... حتى بالليل ههههههه لا اتغشمر
كنت اعيب على لجناط لكبار واقول حق بنات خالتي اش حاطه فيها حاطه هدوم عيالج حق لزواره هههههه ....الحين اغلب جناطي كبار
كنت اعيب عالمسلسلات الاجنبية واتطنز عالضحكه اللي يحطونها ....الحين اطالعهم واضحك ظحكه اسخف من الضحكه اللي حاطينها ها اهاه هاها
كنت اعيب عاللي يقضون ساعات بالقهاوي .... الحين اقعد اكثر منهم
كنا نعيب عاللاستقبالات الحين احنا نسوي استقابلات
كنا نعيب عاليران اللي ما يتزاوروون الحين احنا ما انتزاور
كانوا يعيبون على الملا اللي يقصر بنطرونه و دشداشته ... الحين بنطروناتهم امقصمله
نعيب عاللي يسوي عزيمه ويحط موالح ....الحين قمنا نسوي عزايم موالح
كنا نظحك عاللي يحسن شواربه ....الحين الجماعه صاروا مللللللط
كنا انتطنزل على فئه يشربون شيشه بالبيت ....الحين الكل يشرب شيشه بفيلا فيروز
كنا انتطنز عاللي ياكلون بالطريج ......الحين الكافيهات لاتعليق
يوم كنت اصغر من جذي اذا صارلي شي واستانست اسوي العجله .....اليوم زلقت ووانا مستعيله وقعدت عالارض خمس دقايق عشان اقدر امشي مره ثانية .... < --- ماله علاقه بالموضوع ...الكبر شين

حاليا :
اعيب على اللي يحطون قوطي روب تحت الملفع
اعيب عاللي يدخنون شيشة
اعيب عاللي يلبسون استرج وحجاب
اعيب عاللي يطلعون رقبتهم من الملفع
اعيب عللي يلبسون تراجي وملفع
عيب عاللي تلبس عباة جتف امبطله واسترج ...

..الله اعلم بالمستقبل شبسوي.

..تراني مو مضمونه

;p

ادري انها حريات شخصية وربما في غيري يعيب علي بس شسوي .... كويتية ماكو فايده
...........

شفت محمد زميل جديد علي وصغير بالسن بمكان عام وصادف ان كان يبي مني شغله ظروريه فأندمجت معاه بحديث و مشهد بو خمس دقايق كان معاه واحد اعتقد انه صديقة ..وبينما انا وياه انتحجى يا واحد ثالث يسلم على صديقة وبما انه ماشاء الله طول وعرض وانا عقلة الاصبع فحجب الرؤية عن صديق الصديق لرؤويتي ...لمراد كلهم محترمين وثقال ...وفجأه مرت بنت في سن الزهور ماشا الله لا اله الا الله سمييييينة وجميلة جدا ولابسة استرج املح وبلوزه قصيره ...المشهد مو حلو ادري علما بأنها حرية شخصية ....ولا اسمع صديق الصديق يقول بصوت واطي حق صديقة –ماكان شايفني- باللهجه اللبنانية
مش هيدي البأره اللي بنعمل منا جبنة كيري ؟؟؟؟؟؟؟؟

.
طبعا محمد – زميلي- ويهه قام يتررررك ومبتسم....وانا سويت روحي ما اسمع وكملت السالفه والاخ الللي قط الحجوه ما انتبه كلش علي الا يوم مشيت..يوم مشيت -لا ادعي المثالية- ضحكت مو على البنت والله على الحجوه اللي انقالت ...المشهد كلا ما خذى دقيقة ...يعني الصراحه يا بنات يا خواتي وفعلا الكلمة اقولها بأخوية لأن عندي خوات وبنات اخو وبنات اخت... هذا اللي سمعته الله اعلم باللي ما سمعته وهذيله ثقال ومحترمين والحجوه صارت بينهم وبين بعض

بغض النظر عن ما دار بينهم
ذوقا ... شكلا ....مضمونا ....احتراما...دينا ....غير لائق والله ...

ولا شرايكم !!!!!؟؟

بالمناسبه شنهي الشغله اللي عيبتوا عليها وقمتوا تسوونها؟؟؟؟

بصراحه بعيدا عن المثالية

كيف تصبح اصيل بمدة قصيره

1- ترزز في ديوانيات الاصيليين وتكلم عن معركة الصريف واليهرا والرقه ولاتنسى ان يدك نوخذه حتى لو كان تباب

2- افتح اي كتاب فيه كلمات عتيجه واحفظهم ولا اتحجى الا فيهم

3- احفظلك ثلاث امثال شعبيه غير متداوله وحطها نيك نيم لك بلبوتوث

4- البس نعال نيديه على طول ولا تقطها حتى وانت نايم

5- سو قطيه انت وجماعتك وحطولكم ديوان بمنطقه داخليه ...واذا ما عندكم اخذوا قرض وحطو بجنوب السره ودززوا اسمائكم بمنحة سالم العلي ...بس لحد يدري

6- لاتناسبون لمدة ثلاث سنوات اي عائله مافيها ريحة اصل

7- قولوا ان عندكم اهل بالسعوديه

8- سوولكم صندوق لتكاليف النعي بالجرايد اليوميه وحتى لو ابو صبيكم يموت كتبوا عائلة الفلاني تنعى صبيهم فلان الفلاني ..ولا تنسون يا صفحه يا نص صفحه غير جذي انت مو اصيل

9- نزلوا واحد من عيالكم بالانتخابات حتى لو ما يفوز ...بس ماعليه اهم شي اسمه مرتز بدخلة المنطقه

10- اشتر السيارات التاليه :

كايين واذا ماعندك مو مشكله الطوارق يمشي الحال

لمبرجيني

موزراتي

فراري

بورش

بي ام

اللكسز الكبيره مو لصغيره

واياني على اياك تحطلك التيما ولا كامري ...واذا ما عندك اركب تكسي بس لاتشتري سيارة رخيصه

11- اذبح يدك ويدتك عشان ما يخوروونه بالحجي

12- لاتحاجي عيال خالتك لأنهم يدرون شالطبخه

13- اطلع بالجرايد وايد وانت لابس جماغ

14- دش بألف عضويه ...حتى لو تكون مو عضو فعال بس مو مشكله عشان السي في ...السيره الذاتيه

15- عيالكم كلهم بكلية العلوم الاداريه ما يبيييييييييييييييييله

16- احضر كل عرس واذا صار عندكم عرس على عايله مو معروفه اكتب كريمة احدى الاسر الكويتيه واذا معروفه

حطها قبل عايلتكم

17- اخذ واحد من عيالكم ولبسة عقال شطفه ووده فوتو كينا يسويلك صوره عتيجه وحطها بالديوانيه ....لزوم الشغل

18- لبسوا دريولكم دشداشه وغتره وعقال ....يعني فداوي

19- اي واحد من عيالكم عنده حس كتابي خل ينزله مقال او عامود بأي جريده واذا ماعندكم مو مشكله كل شي بأجره

........................

وفي النهاية ستصبح اصيل غصبن على فج خشم اللي خلفوووووك بس اتمنى من كل قلبي ان بينك وبين نفسك ما تصدق انك

اصيييييييييييييل

"واللبيب بالاشارة يفهم"

عتيجة 911

يا جماعه ما صارت

وبعدين

وتاليتها

يعني من كبر لكويت

ولا من كبر لكويت

يا انا اللي اسوق

يا انا اللي طول اطريج ادلي

عاد قلنا دلول بس مو لي هالدرجه

شدعوا خريطة الكويت

تدق علي الاخت اللطيفه اللي قضت عمرها برا الديره تبيني ادليها ارض المعارض

وانا: اخذي شارع الملك فيصل سيده سيده سيده لين تييج لفة مكتوب عليها طريق سته او طريق الدائري السادس السريع عقب جسر خيطان

اهيه: اوكييييييييي تمام سهل

انا:تلاقين لفتين لفه مكتوب عليها اليهرا لفه مكتوب عليها المسيله لفي مع المسيله

اهيه : اوكييييييييييييييييي خلاص دليت

ارد اكمل نومتي

عقب نص ساعه

ترررررررررررررررررررررررررررن

انا : خير

اهيه:مادري وين وصلت

انا:سويتي اللي قلت لج اياه

اهيه: اي بس وصلت مكان ما اعرفه

انا :شنو على يمينج

اهيه: شير

انا :شنو على يسارج

اهيه:مواقف سيارات!!!!؟؟؟

انا :شنو قبالج؟؟؟؟

اهيه: ايييييييييييييييي قبالي لوحه مكتوب عليها المغادرون

نععععععععععععععععععععععععععععععععععععععععععم

قالها حكيم: آآآآآآآآآآآآآآآآآآآآآآآآآآآآآآآآآآآآآآآآآآآه يا ألبي

.................................................

الاخت الثانيه:شلون اروح السره من مجمع دسمان

انا:تدلين الدائري الرابع

اهيه:لأ

انا :شتدلين عيل؟

اهيه:خط البحر

انا:زين تدلين تدشين الدائري الثاني او الثالث من خط البحر

اهيه: لا ما اعرفهم بس اعرف ادش شارع الحب

نعععععععععععععععععععععععععععععععم

حبج برص

وبالله الدائري الثاني شنو

.................................................

الاخت الثالثه:عتييييييييييجه وين جمعية الفنون التشكيلية

عتيجه:قبال نادي القادسيه

اهيه: ووين نادي القادسيه

انا : بحولي

اهيه:وشلون اطلع على حولي

انا: انتي وينج فيه

اهيه: بمجمع المهلب

خيييييييييييييييييييييييييييييييييييييير

.....................................................

الاخ اللطيف: شلونج عتيجه شخبارج

انا: ادري مضيع وينك

اهوه: عند دار الشفا

انا:وين بتروح

اهوه:شارع المكتبات الاسلاميه

انا:روح سيده تييك اشاره اخذها سيده تييك اشاره ثانيه اخذها يمين تلاقي روحك بشارع المكتبات

اهوه:خمس دقايق واحاجييج

بعد عشر دقايق

اهوه: انا الحين يم مجمع الفنار

انا: نععععععععععععععععععم

اهوه: سوري ماكنت يم دار الشفا

كنت يم المواساة

ههههههههههههههههههههههههههههه

آآآآآآآآآآآآآآآآآآآآآآآآه يا البي

تبون بعد ولا اوقف

للطلب و الاستفسار

8

8

8

8

دق بعدها

5

5

عتيجه للطرق المختصره و المطوله بخدمتكم

taged By non

نون دزتلي هالتاق الحلو

خمس أشياء لا يعرفها احد عن شخصيتي ..؟؟

عندي اكثر من خمس اشياء لكن بالنسبه لشخصيتي مادري اعتقد تعرفوني زين بقولك خمس اشياء سويتها او كنت اسويها محد يتوقعها حتى ربعي

انا طقاقه!!!؟مره طقيت بعرس سعوديين بلكويت بدون ما يدري ابوي كنت بيرب الموهبه اشوه محد عرفنا لكن استفدنا شرف التجربه وما دل على فشل العرس

محد رقص

:(

جلاب و قطاوه

كنت اربي جلاب ايام المراهقه وعندي مجموعه لا يستهان

دوبر

رتولر

بوليسي

والباجي خلطه حلوه

الدوبر كان اسمه فهيم

والرتولر كان اسمه شوق

والبوليسي كانت جلبه اسمها بطه

والباجي وايد ماني ذاكرتهم

وكنت ايمع قطاوة الفريج لصغار اوكلهم و اشربهم لين يصيرون رياييل من ورى ابوي طبعا لين ما درى مره من اخوي النحيس وقالي ان شفت قطوه بالبيت يا ويلج ..... لأني كنت اربيهم بغرفه مهجوره بالملحق :( وبجيت بجيييييييييييييييييي لو احد متوفيلي ما بجيت هالكثر وهم قمت اباريهم من وراه اقعد على الرصيف بالقايله ومعاي بقايا غدانا اوكلهم اخر شي قام يسوي روحه ما يدري لأن ماكو مافيده هههههه

the love

دائما اعيش قصة حب مو شرط مع احد ...بيني وبين نفسي

قلمي

مدونتي

و حاليا اعيش قصة حب مينونه

;p

بو طبيع

اذا كرهت شغله اعاف كل شي يربطني فيها

كرهت الثانويه وقفت قيدي وداومت بثانويه ثانيه

كرهت كليتي ما داومت فيها وحولت كلية ثانيه

كرهت مطعم ما امر بالشارع اللي اهوه فيه

كرهت دوام طلعت منه ورحت مكان ثاني

لكني ما اكره شي الا اذا بسسسسسسسسسسسس

خلالالالالالالالالالالالالاص

وصل السيل الزبى

وقيييييييييييس على ذلك

اسنان

ما اوااااااااااااااطن طبيب الاسنان لياليوم وظروسي بتطيح وليالحين ما رحت

سياسه

كنت مندوبته الانتخابات اللي طافت وشكلي فقرته طلع الثالث عقب اخر صندوق ماعليه بوعبدالله خيرها بغيرها

مدمنة سدوكو

احب السدوكووووووووووووووو وايد

شرااااااااااااااااااااااااااااااااااااااااايكم؟؟؟؟؟؟؟؟؟؟؟؟؟؟؟؟؟

غناية وذكرى

البوست السابق كان تحليل خاص لمشاعر خاصه يحملها كلن منا في داخله وكان رد كل منكم عباره عن تحليل لمشاعره مااذالقى ذات الحب .....فتوجهوا مره اخرى للتعليقات لقرائة مشاعركم من جديد......

;p

كان ودي اصيد بعض الناس وصدتهم

................

قد تكون اماكن
مناسبه
موقف
شعور
الخ
في بيني وبين نفسي شغله تظحكني ...اللي اهيه الذكرى ولغنايه
في عندي غناوي تربطني بذكريات معين
ولا تسألوني ليشششششششششششش لأني مادري

لغناية: طالعه من بيت ابوها
المطرب:ناظم الغزالي
الذكرى:مواقف مجمع الوطيه
.................
لغنايه:اني احبك
المطربه:ماجده الرومي
الذكرى:وحده حناااااااااااااااااان لمدة 3 ساعات
...............
لغنايه: يمشي على الدانه
المطرب:شادي الخليج
الذكرى:وحده انقلبت بالجيت سكي
.................

لغنايه:حبيبي ساكن الدسمه

المطرب:سليمان الملا

الذكرى:المنحه الاميريه

.................

لغنايه:خدني معاك بالجو الحلو

المطرب:مادري منهو

الذكرى:وقوف سيارتي علي شهر سبعه اللي طاف

..................

لغنايه:ابو قذيله

المطرب:عوض دوخي

الذكرى :واحد كانت تحبه بنت خالي

.....................

لغنايه: لولاكي:

المطرب:نسيته

الذكرى:قطار فيلجا

..................

لغنايه:يا ناس دلوني

المطرب:عايشه المرطى

الذكرى:الثانويه

..................

لغناية:يا صاجه

المطرب:عوده المهنى

الذكرى: اليوم المفتوح

,,,,,,,,,,,,,,,,,,

في احد مثلي؟؟؟؟؟؟؟؟؟؟؟؟!!!!!!!!!!!!

ابي اطبخ

هالصوره وايد احبها ومنزلتها بموبايلي من كثر ما تظحكني ماخذتها من النت طبعا

...............

البلعه :

لي علاقه معاها مو طبيعيه يوم اقول يا حلو اكل البيت ويوم اقول يا حلو اكل المطاعم لأن الاثنين يرضوني واحلى شي اني لا دشيت مطعم يديد احب ايرب شي يديد واحط عيني على طلب مشهور عشان اذا ما عجبني رديته وطلبت غيره

اي رديته

ارده وجنى العيد

وعلى طاري الرده ابوي فيه طبع جدا جدا مو حلو وبايخ من واحنا صغار اذا شرينا شي لو غالي لو شنو لو نموووووووووووووت ما نرده وناخذ شي غيره...وبعض الاحيان لما نوصل المحاسب ومادفعنا ما يرضى نرد شي فالله يسلمنا وياكم ياتني ردة فعلا مخالفة بالاتجاه .... ما اذكر في مطعم ما رديت اكلهم ...عندي ربع خذوا هالطبع مني واهلهم استغربوا هالطبع...لأني بكل صراحه قاعده بفلوسي وماني مطره ادشش شي الى معدتي مو عاجبنني او غصبا علي .... مره من المرات قلت له نفسيا ما عجبني الاكل.!!! كا ن شكله مو حلو

ومن كثر هالسوالف اللي اسويها عندي وايد ربع وزميلات وزملا اذا راحوا مطاعم يتصلون علي او يدزون مسج

شنو احلى شي عند المطعم لفلاني؟؟؟؟؟

شكلي بسويلي خدمه مع الام تي سي حق البلعه و الطب البديل

;p

...بالنسبه لي ذوقي جدا خاااااص بالاكل اكل كل شي بس من غييييييييير طماط وماتعجبني الوجبات السريعه خاصة

برجر كنج-كنتاكي-هارديز مادري الصراحه اعتبرهم اكلل دكاكين مو صحي كلللللش واحس وانا اكلهم اني قاعده اكل دهن وادري اني بيصير في بطني شي .... بعض الاحيان اذا يوعانه ومستعيله اخذ من مكدونالدز احس انه افضل منهم ...بس اللي صج احبه عالسريع

البيتزاااااااااااااااااااااااااااا

ودرجه اولى عندي بيتزا بيتزا حتى امي وابوي حبوها لأني غثييييييييييييييتهم فيها بالعشر الاواخر ...ما يمديييييييييي شسوي....

.ومع كل اللي قلته الا اني فعلا اتلذذ بأكل البيت

وما اعرف اطبخ ولا احب اطبخ

وكل ما يابوا طاري الطبخ فلت يا جماعه الناس مقسمين الى فئتين

ناس تطبخ

و ناس تاكل

وانا من النوعيه الثانيه....... لكن فعلا ياني شعور ودي اطبخ

وما اعرف شي

فشله لا اعرف اطبخ عيش ولا سمج ولا شي ...... الوالد يشجع ولو احرق الاكل بيقولي حلو ادري لكن الوالده الله لا يوريكم كلا تخاف على هنودها وعلى مطبخها مادري عبالها بفجره ولا شالسالفه........ مره من المرات قلت لها يما بطبخ مرقوق

قالت : ما تجيسين مطبخي

قلت لها مو مشكله اطبخ بالحوش

المهم عقب ما حطيته ابراسي وعقب الدوام وعقب صلاة العصر ويومها كنت صايمه....حطتلي اغراض المرقوق بمطبخ التحضير الداخلي

وخلت وحده من لهنود تنطرني بالمطبخ ..... مادري شبسوي قوزي

كلا مرقوق

وطبعا انا ما اعرف ولا شي

قلت لها انتي وجهي وانا اسوي عشان اتعلم المهم اني لقيت كل شي امقصص يعني ما جست السجين

اللي سويته بس اني حطيت للحمه بالجدر وحطيت عليها طماط وبصل و ..........الخ

وبعد نص ساعه اظن حطيت خبز صاج وصكيت الجدر

وتالي طلعت مرقوقه تييب اليهد

كل خبزه لازقه بالثانيه

محد كلاها الا انا وابوي

وابوي يقول تخبببببببببببببببل ...على قولته

وهي لا تخبل ولا شي

هالسالفه من ثلاث سنين حوالي

وحرمت ادش عقبها المطبخ لأني تعبت نفسيا من امي واللي تسويه معاي كل ما بغيت اطبخ

وكرهت الطبخ

وكل شي له علاقه بالطبخ

وفتافيت

بس و الله مو حاله

ابي اطططططططططططططططططططططططططبخ يا ناس

____________

شنهو المطعم اللي تحبونه وشنهي الاكله اللي تفضلونها فيه؟؟

لمفلس

اذا كان الفكر فاضي

فالعقل بيكون فاضي

والقلب فاضي

فأكيد الجيب فاضي

.....

تفتح البوك يرد عليك بحسره

وانت ميت من الحره

لاتقدر تطلع ولااتسلف ثاني مره

بسنا سلف يا ناس

ضعنا بالطوشه وطاح الفاس بالراس

كلا من الحكومه...لالالامن المجلس

دايم يطالب ويأملنا ونفلس

وانيمع الخرده اللي بالدرج

والحصاله اذا مافيها حرج

....

صعبه بهالسن تطر من امك

واذا طريت سمعتك اللي يسرك

وصعبه اتطيح عن ابوك

لا طلبته صكك على راسك بالبوك

ياحلو صمونة بطاط وفلافل

ماكو غيرها اذا الحال قافل

...............

احلى شعور يوم التفليسه

لارفعت تليفونك وسمعت رصيده

لاقمت تاكل بالبيت متجاهل بيتزا بيتزا

لاقلة طلعاتك والتليفون من اول رنه تشيله

.............

لاحطيت في بالك تسدد لديون

لاقررت انك ما تعيش مديون

لاواعدت نفسك ما اتسلف

وعلى نفسك ما اتكلف

وعن الدفع ما اتخلف

لأن الدين عمات عين يقولون

ولا دقيت على البنك تليفون

مو بالحزه اللي يدقون

وقال الكمبيوتر: ادخل رقم حسابك

تدقه وانت مغمض ..كأنك للمعاش ضامن

وقلبك يرقع ويرقع

خايف على بوكك لمقرقع

اللي يشوفه يحسبه كلا فلوس

مايدري انه بلكروت متروس

وتنطر الكمبيوتر ينطق بلهفه

جنك بتموت ورقبتك على السماعه ملتفه

يطول بالرد هالمره ولد الذينه

متى تنطق هالخزينه

بعد ما المركب يوصل المينا

وتبدي تشكل بالدعاء

اللهم ارزقني رزقا طيبا

اللهم افتحلي ابواب رحمتك

اللهم ارزقني من حيث لا احتسب

وينطق بعد ما قزرتها دعاء

وحالتك صارت اعياء اعياء

لديك ....يقولها بإزدراء

ثمان مئة ...والفرحه خذتك للسماء

ويكمل الجمله البنك الحنون

بكلمة تصحي المينون

فلـلللـــــــــــــــــــــــس .......يقولها بكبرياء

عتيجه ابريل 2007

حوار مع ابوي

تاق مع الوالد

اشرايك بالحب؟
احسن من الزقاير
اشرايك بالصداقه؟
بين الاهل اذيه ومع الغرب تشره
تؤمن بالحوبه؟
جدا وخاصه من الحريم
شرايك بالاولاد؟
مادري ليش يفرحون فيهم...
شرايك بالبنات؟
ملح البيت والبيت اللي ما فيه بنات يأجرونلهم
شرايك بأم كلثوم؟
ذوق كبار
وعبدالحليم؟
ذوق الكل
وعبدالوهاب؟
ذوق محدود لكنه مؤدي
منو تحب من الاصوات الحاليه؟
احلام صوت واداء ومقامات, محمد المسباح بس صوته تغير يوم غنى الفريه,رويشد اداءه غير عادي,وميحد حمد اعتبره بعد عبدالحليم بجمال الصوت على طول
منو المطرب اللي عندك كل اشرطته؟
فيروز...سابقا
اكثر فن شدك؟
السامري
شرايك بالزواج؟
بدايته صعبه لكنه يحلي ايام المتقاعد .
شرايك بالتقاعد؟
موت
شرايك بالبحر؟
يثير الاعصاب
والبر؟
هدوووووء
والمباركيه؟
سوق المتقاعدين
اكثر قرار تحسف عليه؟
اني ما درست طب
واحلى قرار اتخذته؟
انتقالي لبيتي الحالي
حبيت من قبل؟
يالخبيثه...ماحبيت كثر امج
ناس دايم تحلم فيهم؟
امي وابوي
طاري يبجيك؟
قصيدتي بأمي
عندك مشكله بالبجي؟
لا ابدا ...ومعروف اكثر واحد ابجي عقب الدفان بالمقبره
طاري يضحكك؟
قصيدتي بأول حفيده
ليش؟
لأن ماعجبتها وقالتلي بالحرف تييب اليهد وغيرت جم شطر فيها عشان ما تزعل
ليش كتبت بالناس كلهم قصايد الا انا؟
لأنج احلى قصيده

شنهي اسباب الطلاق حاليا؟
الريال ما يعرف للمره
وشرايك بالجيل الحالي؟
فيهم الخير كلهم والله
يقولون انهم امدللين؟
ولا مدللين ولا شي محد مدلل كثرنا حتى اللي ما عنده شهاده يلاقي احسن الوظايف بس خبرج الاولي لاعب والتالي تاعب
انسان كان ودك تقعد معاه اكثر؟
الوالد
انسان تحسفت انك ما شفته؟
رفيجي حمد قبل لا يتوفى وكتبت فيه مرثيه حمد

للقاء بقيه

اللي يحب يوجه اي سؤال للوالد ترى حاضرين

صيده ما صيده

بكسر الكمبيوتر لأني هذي المره الثالثه اللي اكتب فيها هالبوست ...

.......................................................................

احلى الصدف بأحلى الناس ,,, نجمع بناس وايد ولما نقعد نسولف معاهم شوي نطلع نعرفهم

من بعيد

من جريب

مو هذا المهم ...المهم ان كلنا عيال قريه

وبما ان اغلب افراد مجتمعي عندهم اكثر من نشاط على صعيد العمل او على صعيد التطوع و الانماء تجاه المجتمع فتلاقي الصدف تزيد

اليوم كان عندي معرض والله ما كثر المعارض هليام ....وبيني وبين مشرفة النشاط علاقه حلوه تربطني فيها من حوالي سنه ...واثناء حديثنا مع بعض ...قلت لها عن موقف طريف صارلي مع مدير موجود في دوامها لكن بمكان ثاني وظحكنا؟؟؟؟

اسئلتني: من وين تعرفينه ؟؟؟-اي المدير

قلت لها: رئيسي -بدوامه الثاني طبعا-وزميلي بنفس الوقت

قالت:تدرين عتيجه

قلت:خير؟؟؟؟

قالت:ترى فلان زوجي

انا: معقوووووووووووووول بو محمد لالالالالالالالالالا

ونظحك شلووووون

تقول: انا طول عمري اناديج عتيجه و هو يناديج ال ........ (اي اسم العاليله فقط)وعمري ما فكرت اربط الاسمين مع بعض علما بأني انا وياه نعرف اسمج الكامل...بس تدرين عتيجه

انا:لامادري ...خير

اهي:ترى ريلي يمووووووووووووووووووت عليج

@@

طبعا الويه صار اشارة مرور

برقعها ...لالالالالالالالا شلووووووووون

تقول:يقول ال .......قالت و ال..........سوت ودايم يسولفلي عنج اكثر من الباجي رغم انه ما يسولفلي وايد عن شغله.....لكن ما يناديج الا بعايلتج جنج واحد من الشباب

انا:تدرين كلا رياييل وانا صايره بينهم الزميل السادس

وتدق عليه وتحطه سبيكر تقوله:شلونك فلان ماراح تييني المعرض

يقول: وحبيبتج عتيجه ما يت

انا:@@!!!!!!!!!!!!!!!!!!!!!؟

اثاري حتى اهيه لاجته فيني

تقول:تعال عندي لج مفاجأه حلوه وانا ويا المفاجأه ننطرك بستاربكس ....

يرد: والله مشغول ان شا الله اييكم العصر ...

تقوله:كيفك بس في مجال لتأجيل المفاجأه وتطالعني تبتسم

سبحان الله اثنينهم يسولفون عن النفس الشخص اهي تسولفله عن عتيجه اللي معاها بأحد الانشطه وهو يسولفلها عن عتيجه الزميله او ال........وما فكروا انهم يسولفون عن نفس الشخص

عجبتني ردة فعلها

جدا حلوه وجدا طبيعيه ......ذكرتني بزوجات الزملا اللي تنقسم ردود افعالهم معاي على قسمين

القسم الاول تحاول تعرفني على زوجها اكثر شيحب شينرفزه شياكل شيشرب جني ما اعرفه يا معوده كافي اهوه معور راسي تيين انتي تعورين راسي فيه ...واحلى شي اذا انا اكون اعرف عنه شغلات اكثر من اللي اهيه تعرفها ههههههههههههههه والادعى والامر اذا اهوه مسولفلي عن بقارتها - من وجهة نظره طبعا-مع العلم انه مو دايم يكون محق

القسم الثاني كارهيني من غير ما اسوي لهم شي ويسلمون علي يصافحوني وانا عناد اتلهم وابوسهم حتى لو ما اواطن رياييلهم ههههههههههههههه ما ادري اختي احد قايلج ريلج ألين ديلون

اما ازواج الزميلات هذيله اللي ودي فناقر اعطيهم ...داااااااااااااايم يطلعون انه زوجاتهم بقر واهم الفاهمين علما بأني غالبا ما اجد العكس ....واشوف ان اهمه الثيران اللي ما يدرون وين الله قاطهم..بس عدم ثقه ويبون ينزلون من قيمة زوجاتهم شيسووون ...يطلعونهم بقر ويفتكون....

وبما ان ذكر الشيء بالشيء يذكر ذكرت صديقتي وبنفس الوقت خالتي ....طرت علي انها قالتلي انها تعرف زوجة رئيسي بو محمد ....جان اقول حق رشا

انا: يعني تعرفين فلانه الفلاني

جان تبطها ظحك

قلت لها خيييييييييييييييير؟؟؟

قالت: توها معطيتنا فاصل فكاهي

مادام فاصل فكاهي يعني لازم انا معاها

انا:شعننه ؟؟؟؟

قالت:عندها بنت اخت طماشه اذا وقفت عليها السياره دزتها بالشارع

هههههههههههههههههههههههههههههه خير

انا :رشا؟

رشا تضحك : هلا

انا: ترى اللي تدز السياره انا

هههههههههههههههههههههههههه

يا المفضوحه يا عويش حتى هالسالفه قلتيها

انا اورييج

ظحكات

قبل لا آوي الى سريري ....قعدنا قعده من زمان مو قاعدينها ....ومادري شياب طاري سوالف الغزو والتحرير على راسنا طبعا كانت في مواقف ما اقدر انساها ....تموت من الضحك ...

اول ايام الغزو عندنا ريال عووود بالفريج اللي ورانا اسمه بو نايف ....شاف ولد يرانا عاد ولد يرانا هذا شايف رووووووحه وعنده من نفسه ملك وما يعطي ويه يعني مغرور حده ومملوح ملح هنود اسمر واشابيهه حيل دقاق وشعره ناعم ....يحليله ونص بنات الجامعه ودهم يطالعهم امطالع .....لمراد عاد ...ابوي كان قاعد يسولف مع بو نايف عند باب البيت ومر المغرور عليهم وكان لابس وزار و وطاقها جريمبه .شكله قاعد ينقل اغراض او شي جذي...سلم عليهم ووقف معاهم يسولفون عن منو بيطلع من الديره ومنو بيقعد ولوهله ....بونايف قاعد يطالع المغرور

جان يقوله :يا ولدي انا عندي لك نصيحه

المغرور:خير ؟؟

بونايف:اذا يووك لعراقيين يبون ياخذونك قولهم آنا مهري

هههههههههههههههههههههههههههههههههه

المغرور: لابوقولهم انا كويتي واللي فيه ............الخ

بونايف:طيعني يا ولدي ترى صدام زين مع اليمن

ذاك عنده من نفسه وين ووين وبونايف يقوله قول لهم انا مهري

عاد والله يابها صج صج شكله من هذيله اللي يلقطون قات

ههههههههههههههههه

وبالمسيره ...كانت الرغوات قليلة ...جداجدا ..المهم يا واحد ما نعرفه ولا يعرفنا يبارج حق عمتي الله يرحمها-قاعده جدام مبطله الدريشه-وعمتي مره عوده يقول لها مبروك عليج يا خاله التحرير والاستقلال-طبعا الحبيب يبي وحده من اللي معاها يعطونه ويه- وان شا الله ينعاد عليج بالافراح ويهذر ويهذر ويهذر

عاد طولها وهي قصيره

....جان تطلع وحده من اللي قاعدين ورى ايدها من صوب عمتي -الله يرحمها-وترش على ويهه رغوه

ههههههههههههههههههههههههههههه

.

مو هنيه الضحكه

جان يقوم ويشيل الرغوه اللي على ويهه

ويمشها بويه عمتي

@@

ههههههههههههههههههههههههههههههههه

ابيه مت ظحك

الاقيكم في بوست ثاني ان شا الله

صخله

مادري وتاليتها مع هنودنا....

احبهم

احترمهم

يحبوني

بس ما يحترموني

مادري انا مصخره ولا شالسالفه

مادري لأني اتغشمر معاهم واداحرهم ولا شالسالفه

افففففففففففففففففففف

يعني تصوروا اخر سياره تنغسل سيارتي ...يعني في امكانيه اطلع وهي مو مغسوله

وطبعا من داخل لو شنو ما ينظفونها الا بقول

وحجرتي نفس الشي يقصون علي ...من فوق لي فوق ...والدريشه مغبره

ما احب احاجيهم حريم اكبار ويدات ....وبيني وبينكم ما احب الفلبن والاندونيسيات ...احس انهم نظاف بس حقودين والاندونيسيات اسحور.....

هليام امحمره العين عليهم .... وشاده الظهر بفاطمه ...

شوفوا الفسق

هندية اخوي شاريتلها مرت اخوي جاكيته بنفسجيه ......اشحلووووووها بيديانيه ...من مكان سنع ...

سنع يعني مو من برج السحاب

بس من مكان جيد ....تصدقون ثاني يوم ولا قاطتها بلزباله-عزكم الله- !!!!!!!!!!!!!!!!!!!؟

لقتها فاطمه وغسلتها ....بنت البيك مو عاجبها ....يا قوجي ولا ماتبي ...يا حظي ...وياخلاف ..والله فسق يوم قالتلي قلت طالعه على معزبتها (بنت اخوي)اذا كلت وشبعت حطت النعمه بالقاع وداست عليها

حتى بني اسرائيل ما سووها ...والله افسقوا

بس عاد ليش امحمره العين عليهم ...هنيه الحجي ...ذاك اليوم وصلت حدي

نزلت مستعيله حديييييييييييييييييي

جان اقول حق ريري....سوييلي ريوق توسته وجبنه وحليبه حطيها بالمق

قالت ان شا الله

نزلت ولا حاطتلي اياهم بجيس ...جني بروح الروضه ..قلت أمنا بالله خذيتهم معاي السياره ..وانا عند الاشاره بطلت التوسته آكل ماكو طعم جبن

آكل هم ماكو طعم جبن

شوي وظرسي يعلق بشي ...هاه شالسالفه

بطلت التوسته ولا حاطتلي جبن مثلث بالقصدير ماله

معقوووووووووووووووووووووووووووووووووووووووووله

اش هالكسل ....

جان اقول امري لله خل اشرب حليب ...يقمه وحده جان اتفل -عزكم الله -الحليب .... ولا مااااااااااااااااااااااااااااااصخ موحاطه قفشة شكر

الصراحه ياني احساس غريب

اول مره بحياتي اشعر اني صخله ....توسته بقصدير وحليب ماصخ باجي بس اقول مااااااااااااااااااااااااااااء

طبعا توعدتهم وبس رديت البيت ما حاجيتهم .....

كالعاده مو شي غريب

حاجيت امي وحاجتهم وحجه تحج ينبهم وحده وحده ......

اففففففففففف

اشكر كل من تعنى وقرى بوستي اللي طاف واخص بالذكر اللي جاوبوا على الاسئله اللي من خلالها سعدت جدا ...ترى مو امتحان و ماكو درجات

امي وابوي

سبحان الله في خبال عقلي وفي خبال بالحجي والكلام ...ساعات الانسان يقط عبارات ما يكون قاصدها او امثال مو بمحلها ولا بموضعها ..وفي امثال طبعا ما تنقال كلش ...

طبعا اللي بذكره مواقف تظحكني وتخليني افطس من الظحك مع انها صايره من زمان

الموقف الاول :

الموقف الاول حصل بين امي وابوي ..ابو كان قاعد يتذكر يدتي -متوفيه- وامي كانت متعاطفه معاه وقاعد يقول بعد عمري بصوت حزين : ايييييييه الله يذكرج يا يما بالخير كنتي ميمعتنا ما يدور اسبوع الا انتشاوف اميمعه البعيد والجريب واليران ...والحين الله يالزمان الزين فينا نشوفه مره بالشهر يدور الشهر والشهرين من عيد لي عيد ...

جان تدش امي عالموجه وتقول : قالوها الاولييييين ماتت لحماره وانقطعت لزياره

@@

نعمممممممممممم

هههههههههههههههههههههههههههههههههه

جان يقول لها ابوي: @@ يعني امي حماره

ردت: لا ما اقصد هذا مثل مثل

الوالد: لو سمحتي امثالج الخايسه مو علي ولا على امي

طبعا انا تعالوا شوفوا ويهي

كاااااااااااااااااااااااااااااااااااااااك

..................................................................................

الموقف الثاني :

هم بين امي وابوي ..

ابوي كان شاد الظهر برفيجه دلال بيوت يبي يدورله بيت ...

يقول حق امي : عااااااادل ما يقصر وعاااااااااادل سوى و عاااااااااااادل حط وطبعا عادل كان بارد ثلجه فااااااااج

عادل يابلي مادري شنهو

جان يقول لها اذنات يوم ...عادل يقول لقى بيت بالروضه وبييب خريطته

ردت عليه الوالده:ويييييييييييييييييي انطر يا حمار لين اييك الربيع ..

الوالد :@@ يعني انا حمار

الوالده: ويييييييييي لاتسويها سالفه خو مثل مثل

الوالد : جم مره قايلج امثالج الخايسه هذي مو علي ..

هههههههههههههههههههههههههههههههه ما تتوب

............................................................................

الموقف الثالث :

ولا اقولكم خلوه بالحلقه القادمه

;p

جنقر

ايام حافله ....

او انا حافله (لا باص مواصلات)أو مادري شقصتي

يمكن اللي يعرفني ...يقول هذي شفيها كلا لو يه وحوسه ومشغوله

شفيها كلا مضغوطه

هذا شقصتها

هذي شسالفتها

مع اني والله وبالله انسانه جدا بسيطه...لكن فيني عيب شرعي كلا عبالي ان الوقت يمدي وكلا عبالي اني اقدر اسوي كل شي

وكلا ما احب ارد احد

يعني المشكله مني وفيني

مع ان حتى جنقر مات بآخر حلقه

خلنا من جنقر وخلني اهذر عليكم ايامي الي طافت شغبرت

كان عندنا دوره وكان بالدوره من كل دوله خليجيه ناس مشاركين

وطبعا بما اني بلكويت ولعلاقتي القويه مع رئيس البرنامج لازم اطق السدر

واطلع فيها سبع البرمبه ...(تعرفون منو سبع البرمبه)؟؟؟؟؟

اول يوم وما ادراك ما اول يوم

كان عندي مشوارين الصبح

ويبدي البرنامج الساعه عشر صباحا

قضيت المشوارين واللي اولهم كان مطراش ....عادي محد قالي اصير مطراش؟؟؟عدل

عدل

حضرت الافتتاح ..والبرنامج الصباحي اللي انتهى بأذان العصر

رديت بيتي غيرت لبسي الرسمي ولبست لبس سبورت يتلائم مع الجوله المسائيه

وبعدها جوله مسائيه مع الاخوه والاخوات الخليجيين

وديناهم الشسمه ..لازم صار فرمان

المركز العلمي ...الاكواريوم

عقبها حضور فلم

والله خير مادري ليش نظاراتهم تخلينا نصب حوله ....نصك عين ونبطل عين وهذي قعدتنا من الصبح والفلم طول بيني وبينكم

جان انام

هههههههههههه

ابيه تحفه

اثري رئيس البرنامج هم نام ..خنت حيلي

المهم يوم خلص الفلم وبطلوا لترياكات استوعبت اني نمت

ثم وديناهم مرينا

وعقب مرينا لالالالالالالالالالالازم مادري ليش الابراج الله يزيد النعمه والفضل

عقب الابراج ياتني نزله معويه ..انا ورئيس البرنامج ..والخليجيين ما شا الله ماكو احسن منهم مادري هم ليش؟؟؟؟

لاتاكلون من الابراج نصيحه

زفتني خدامتنا الصبح وقالتلي انت ما يروح برا

ما رحت برا الصبح بس العصر انحشت ,,ويضا جوله اخرى مسائيه لكن اشوه ما اكن فيها عشى ولا جان الحاله كسيفه....وكملت شغلي ورديت

ونفس الشي اليوم .....

يمكن قاعده اهذري وايد بس ارجو المعذره معاي فلونزا جميله لطيفه ظريفه تجبر المرء على الحديث هكذا

نصيحة اخت لاتاكلون من الابراج

:(