تذكرون
تذكرون
تذكرون نقازية الارنب الجائع لما كان يلعبون فيها صبيان شلايتيه وماخذينها كلها وما يخلونا نلعب
تذكرون لما نشتري جواري ( دراجه هوائيه) بفلوس العيد ونفتر عند المحل مليون فره قبل لانركبهم السياره
تذكرون قبل لي رقمت وحده اتم طول اليوم يم تليفون البيت اتنحنح ... وآخر شي تطلع خالتك
تذكرون لما كنا انام مبجر حق العيد ونفرش النفنوف ويمها لدلاغات و الجوتي او الدشداشه على الارض ويمها المكسر والنعال يعني متزهبين
تذكرون سالفة اللي يحارب يحارب الله واللي يصاحب يصاحب الشيطان.. يعني في الحالتين ما في مجال للتسامح
تذكرون لما كنا نسهر لي الساعه وحده بالليل يعني قمة السهر وتقول حق ولد عمرك لي الساعه جم تسهر
تذكرون لما نرد من البر بعطلة خمستعش وامنا تلطخنا بالهرده والفازلين او الزيت والليمون علشان تروح لجلحه والمشق
تذكرون لما كنا نلعب لعبة الطبيب تحت الدري وآخر شي طايحين علينا وطاقينا طـــــــــــــــــــق
تذكرين لما كنتي تمشطين شعر الباربيه لين ينشلع راسها واخوج يعلب فيه كره وانتي تبجين وتلحقينه
تذكرون لما كنتوت تنسفون الغتره تطلع أي شي ... جنى من اللي يرقصون ورى خالد الشيخ بأغنية الكمنجه
تذكرين صورتج وانتي ياهل مع الكشه او العناقيص او البلاليط .... والحين تخافين تراوين ريلج الصوره لا يعايرج فيها
تذكرون لما انتشيطن واحنا ورى بالسياره .... و الوالد يصفط يمين وينام فينا بلعقال والوالده تقول قلعتكم
تذكرون لي تشيطنا في بيت الاوادم وامك تقرصك ذيج القرصه على فخذك واتبوسم بويوه الناس جنى عادي وانت تفرك من العوار
تذكرين لما تدشين غرفت امج وتلطخين ويهج بالحمرا جنك ماكله ياهل وتطيح عليج امج وتكفخج
تذكرين لما الوالده تحطلج حنه ليله العيد .. وتشق قطعه من دراعه ما تبيها وتلف ايدج وتنامين فيها ... تقولين ملاكم
تذكرون كتكات مال اول ... اللي نيمع القصدير ماله نسويه كره....والشفاف نرسم فيه خرايط الاجتماعيات
تذكرون الاكاونت مال قبل .... اللي لي فصل بعد شهر يالله يشبك... جود لطيور طايره برزاقها...واخترب التظبيييط
تذكرون اهالينا لما يرجعون من الحج واييبون الكامره الحمره واحنا مستانسين..... اخاف ديجيتال بس
تذكرون لما ماكان في موبايلات وتكلم الصاحبه من تليفون البيت ويشيله الوالد حزت الغدا....ويقولك غدا وثول
تذكرون لما نروح انتسبح في بحر شويخ ولابسين الشورت الاديداس و الفنيله الداخليه او الفوطه بجيس الجمعيه
(منقول عن الاخ كمبودي الكمبودي بتصرف)
Labels: كوميديا
posted by 3ateeja @ 2:28 AM
14 Comments:
هههه انتي من وين تييبيين هالسوالف
تذكرين صورتج وانتي ياهل مع الكشه او العناقيص او البلاليط .... والحين تخافين تراوين ريلج الصوره لا يعايرج فيها
^
^
هاذي امي مهددتني بصورة اذا تزوجت عطتها حق ريلي عااد حدها ام الفشله
تذكرين لما الوالده تحطلج حنه ليله العيد .. وتشق قطعه من دراعه ما تبيها وتلف ايدج وتنامين فيها ... تقولين ملاكم
^
^
^
هههههههههههههههههههههه
ولااا اذا اختربت رسمة البطه تقعدين تتحلطمين لوووووووووول
تذكرون لما كنا انام مبجر حق العيد ونفرش النفنوف ويمها لدلاغات و الجوتي او الدشداشه على الارض ويمها المكسر والنعال يعني متزهبين
^
^
واكو بعضهم ما ينامون طول الليل واهم يصفطون ويعدلون بالنفنوف
اتقول مو شايفين غيره كلش
يازين ايام قبل
اتحسين البساطه في كل شي
وكلها مرتبطه بايام الطفولة
يا حلات البوست هذا
~___~
تذكرون اهالينا لما يرجعون من الحج واييبون الكامره الحمره واحنا مستانسين..... اخاف ديجيتال بس
^^^^^
لوووووووووووول
تصدقين عاد للحين تنباااع
اصلا تعتبر رمز من رموز مكه
وللحين نجيبها اذا رحنا هناك
انا شكلي بصير اتسدح ببلوقك دايم
:P
السلام عليكم الصراحه ما توقعتكم تستانسون لي هالدرجه بهالبوست :
1_ وهالسوالف يا بسيط لو تسترجع بمخك راح تلقى اكثر منها لأنها حلوه والله ولها طعم خاص وباجر بعد جم سنه راح يصير اللابتوب والكاميرات الديجيتال وغيره شي عتيج وفي ناس راح تكتب وتظحك :)
2_ SUDI GIRL والله يا اخيتي انا استحيت اكمل نسويه كره وانتحاذف فيه لاتقولون هذي مهاوشجيه اما سالفت الحنه فلا ننسى ان الحنه ( الخضاب) سنه بالعيد وللأسف الحين اندثرت لكني ولله الحمد وانا اكتبلج الحين بطراف اظافري لون برتقالي من حنة عيد الفطر اللي طاف وان شا الله بسويها باجر للأضحيه ولاتسينها وتذكريني
3_ نون النساء تصدقين ان الوالده كانت تشتري لنا من الألف ليما الياء للعيد كأن يهاز عروس بس والله وناسه كأن ماعندنا دلاغات والذي منه لكنها حكيمه جدا لأن العيد له زهوته ويقولون العرب قديما لكل جديد لذه ...تعرفين اول هالمثل شنو ؟؟؟؟؟ بتطلعين شاطره .... وتصدقين اني ليما اليوم ما انام ليلة العيد اروح صلاة العيد سهرانه وتالي اروح للريوق التاريخي في بيت العائله وبعدها نعايد ونروح للغدا الوثائقي في بيت العايله و و و و و هلم جرا ليما تصير الساعه 12 الا انا مثل الخرجه
4_ سعلوه والله يا اخيتي هالكامره لها لذه خاصه وانا ليما اليوم مثل اليهال احبها واطالع فيها واظغط واظغط مع العلم اني حاجه ولله الحمد وشايفه هالمشهد ستين مره لكن له طعم خاص ولاتنسين بعد القحافي لمزريه و الطاقيات مادري شتسمونها عندكم هم هذي من رموز مكه وطبعا قبل كل شي ماء زمزم عسى الله يسقينا منه دوم : ) وحياج الله اعتبري لبلوق بلوقك انتي الداشه واحن الطالعين
وبما اني رسمت الابتسامه على ويوهكم فترقبووووووووواااا
.
.
.
.
قريبا على شاشه عتيجه
.
.
.
تذكرون الجزء الثاني
يليتك مسميته حتي لا ننسا ويايد عجبني ابدعتي عزيزتي
مع تحياتي
غريب
تسلمون غريب صباحك سكر وعسى الله يونسكم بالعافيه وتظحكون بالينه قولوا آمين : )
هاهاهاهاها اي والله يازين اول وسوالف اول عدل كلامج ياعتيجة الصوف خاصة بالكاميرا الحمرا الديجيتال
مره يمعت عيال فريجنا وقفتهم من طقة بصورهم ولا بعد ساعه وابتسم واضحك واوقف عدل ومادري شنو اطلعلهم هالكاميرا ولحقوني اسبوع ماقدرت اطلع من بيتنا يبوني هاههاهاهاهاهاها والله ماذكرتها الا يوم قلتي الكاميرا الحمرا يعطيج العافيه
هههههههههه خوش شي تذكر بعد الكامره اللي لا ضغطتها تطشر ماي هذي اللي صج يبيله :)
عزيزتي عتيجة
ايميل تذكرون كان من مجموعة ايميلات كمبودي الكمبودي .. طبعا اسم مستعار بس كان يكتب خوش ايميلات و تنتشر باوساط الشباب .. استغربت لما ما شفتج حاطة اشارة للكاتب الأصلي
ارجو التوضيح .. و اذا كنت غلطانة حقج علي : (
بدون اشارة **
شكرا اختي يجوز والله انا ياني تذكرون عالموبايل من احد اقاربي مو مذيل بأسم وانا في شغلات وايد كتبتها وزدتها وحذفتها وبكمل عليها ان شا الله :)وما فهمت شتقصدين بأشاره
قصدي بدون اشارة للكاتب
و الايميل مثل ما اهو لا ناقص ولا زايد
حافظته ترى ;P
مو قصدي اناجر بس لأني اعرف كمبودي شكثر يحتر لما تنشر ايميلاته بدون اسمه
شكرا اختي عالافادهوانا انسانه صحفيه واحنا نقدر هالامور وشكري كمبودي عني وعن ربعي بلبلوقر:) وتذكرون الياي اهداء خاص لج ولكمبودي ان شا الله
لووووووول
Post a Comment
<< Home