عدنا

انا لم انقطع بقدر ما انشغلت

ولم انشغل بقدر ما انقطعت

فأتمنى ان اكون في مدتي السابقة ووقتي الممنوح للبوست قد اضفت شيء للمجتمع

فعلا كنت في كل مره افتح هذه الصفحة التي اكتب لكم بها

الا

اني لا اجد ما اكتبه

وحتى اليوم

ارجع لكم في جو عرس ديمقراطي

فلان قال

وفلنتان سوى

وفلانه ما شفتوها

وفلانه خوش وحده

:)

فقدتكم ....جدا

وتذكركم الواضح لي

وتمسككم

اثلج صدري

شكرا جميعا

وها نحن عدنا ننشد الهولو على ظهر السفينة

لنذهب....!؟

تتراقص اسماعي طربا

حين ......سماع صوته

ويتهافت قلبي بدقاته حين اكون.. قربة

يتجدد يومي حيوية

حين اراه ....من بعيد

ويتلألأ شذاي فواحا حين اشتم عطره... فهيهات هيهات

ان لم اكن....حبه

...................................

أتضور جوعا ...لشوقها

وألتمس الحضور بوجودها

وأراها من بعيد ....تبتسم فأبتسم

لها ...لها ولها

...................................

يقتربان ...

وباحترام يتهامسان

والجميع يتلامز

امن شوق عينيهما؟؟

أمن طبقة صوتيهما؟؟

وتتعانق الهالات

ببعد عدة خطوات

...............................

يبتعدان من جديد

وروحيهما تختنق

يديران ظهريهما

ودمعتيهما تنحسر

تختلج اصواتهما

ليفرقهما

.

.

.

.

.

.

المذهب!!!!!!!!!

تكنلوجيا

يوم درست التسويق و الاعلان عرفت ان الناس مقسمين في التقسيمة الاستهلاكيةالى عدة فئات

الاولى اسمهم المبتكرون وهم اللي اي منتج يديد ينزل السوق بغض النظر عن اذا كان زين او لأ يشترونه وميزتهم انهم عندهم

قرقش

بيزاااااااااااااااااات

الثانية اسمهم المتقدمون الاوائل وهذيله يشاورون المبتكرون ويشترون عقبهم

وتالي المتأخرون وهذيله مادري شسميهم بس نسبتهم وايد كبيرة اهم و المتقدمون الاوائل

عقبهم اييون المتلكئون او المتخلفون ادري مو حلوه الحجوه بس اهي الحجوه جذي انا مالي شغل

طبعا اعتقد او متأكده اني من المتلكئون بس ساعاااااااااااااااااااااااااااات اصير مبتكرون ......

يعني توني اركب دي اس ال مثلا علما بأني اول وحده استخدمت النت في بيتنا ؟؟؟؟؟ !!!!

؟؟؟؟؟؟؟؟و اول وحده شرت تليفون في كامره وبلوتوث علما بأن الجميع غير تليفونه بالبيت حاليا ما عدى عتيجه!!!!!!!!!ليش مادري

بالاضافة لأني اول وحده تشييت "مجال الاعلام" بالعائله الا اني لي الحين ما عندي تلفزيون ؟؟؟؟؟؟؟؟؟!!!!!!!!!!!

عندي كامره ديجيتال ولي الحين اصور بأم الافلالالالالالالالالام

هذي امثله وغيرها وايد

اعتقد ان مسماي بعلم التسويق

المبتكرون المتخلفون

اللي عنده تحليل لحالتي النفسية يقولي بلييييييييييييييييييييز

والله ترى شي غريب ......

يبيلي علاج نفسي

خلق

بما اني وفي متأخر الزمان استطعت ان افتح روايات ومسرحيات شكسبير فلي وقفات مع بعض كلماته الشهيره

to be or not to be ?

اكون او لا اكون

لا ترى كل ما تراه عينك ولا تسمع كل ما تسمعه إذنك..

أيها النوم أنك تقتل يقظتنا

نوقف عن اخر عباره

لأن صج هليام اغني ياناس دلوني درب الخلق وينه .... فعلا النوم مسببلي مشاكل جمى اقوم اقضي شغل ارجع اصلي الظهر انام

اقوم اكل تفاحه اروح اجتماع او اي عمل ثاني ارجع انام

ابي اسوي انجاز على الصعيد الشخصي مااااااكو

يا جماعه ابي حل لهاالركود

والله ما تعودت على هالشكل

رمضان كان نشاطه بالنسبه لي اكبر

علما بأني صايمه و الاكل نقطه جدا هامه بحياتي

اقط هدومي عالخياط اتكيسل ايبها

اوصل لي عصير الجمعية اقعد بالسياره ساعه انطر الهندي

اي نزلي له يا مال الكسل

طبعا المطاعم كلها خدمة سيارات

ودايم اقعد عالقنفات مو الكراسي

عشان اريح

عيد ... ما عايدت على الاوادم

ولا مرمرت قبل العيد

وحتى اهلي ما عايدتهم

اقصد العائله الكبيره مو اسرتي

لالالا والله حتى اسرتي مو كلهم

ولا تقولون لي لعبي رياضه

ودشي نادي صحي

لأن عندي توصية من الدكتور سنه ما العب رياضه عقب طيحه المت فيني في بداية 2007

بس ودي احد يدليني

الخلق

من وين يشترونه

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

القبلة الاخيرة

كيف اختصر لكم مافات

وكيف اشرح وابرر

لعله ليس مطلوب مني ذلك

ولكني احبكم جدا جدا

فأشكر كل من توجه بالسؤال عني

وبارك لي بالشهر الفضيل

مبارك عليكم باجي الشهر وعسانا وياكم نعودة

لافاقد ولا مفقود

قولوا امين

فبعد كاتبتي معكم التي انقطعت من منتصف يوليو

مرض انسانة عزيزة

او بالاحرى سقوطها بجلطه

مريضة جدا

اعلم ذلك

ولم افرح حينما يقولوا لي انها تحسنت

كنت اجهل السبب

يعتصرني العمل

وغيره من اموري التي يعلم معظمكم مدى انشغالي في فترة الصيف

تسافر عزيزتي

للعلاج في لندن

لا بنات لها

سوانا

يبلغونا عن تحسنها

تسافر اسرتي الى العمر

اجلس في البيت وحيدة كعادتي

اتكبد مسؤليات بيتي صيفا

.....................

تمارس معي من لها سلطة علي

نوع من (النحاسة) الغير مبرره

تؤخر حلمي الذي طالما حلمت به

اغضب

احزن

ولكن الخيره فيما يختار الله

استأنف انشطتي من جديد

بحب

وود

يساندني من لا يعرفني

ليبلغني ان الدنيا ما زالت بخير

..........................

اسافر لعلي اترك هما

اسافر لأجد ضالتي

صلالة يا جميله

ما اجملك في نهاية الموسم

كالمرأة العربية

كلما كبرت كلما ازدادت جمالا

رغبة جامحة غريبة

تمنعني من الرجوع في الكويت

انهي معظم الكتب التي اقتنيتها طيلة العام

لأقرأها في رحلتي الجميلة

اتمشى في سوق الحافة القديم

وامازح كبار السن العمانيين

يستغربون بالبداية ويضحكون بالنهاية

نعم هربت من الهم

.............................

اعود من جديد

لأجد سليل من الرسائل المسجلة

وعودة لوكب الحياة من جديد

حيث اني انقطع عن وسائل الاتصال في سفري

لأرتاااااااااااااااااااااااااااااااااح

تخبرني عمتي ان العزيزة قد اشتد مرضها

وانها للتو راجعة منها

يتصل زوجها ليبلغ الجميع انها "متكلفة"

اريد السفر لها

لأراها

فلا حول لي ولا قوة

وما انا العبد الضعيف

.................................

انهمك في العمل لكثر

لأنسى هم لاقاني

اكثر

واكثر

تصطحبني اختي لغرفة في طرف المنزل

لتخبرني قائلة : "ترى العزيزة امتكلفة"

ارد: " متكلفة ولا توفت"

تنظر الي في صمت مطبق مستغربة " توفت "

لله ما اخذ ولله ما اعطى

عسى الله ان يرحمها ويدخلها الجنات العلى

لم يكن لها بنات وكنا بناتها

اتذكر قبل سفرها بقليل

حين اصحبتها لكافية "كاريبو" الصالحية

كم سعدت

ترتشف القهوة بسعادة

تحمد الله على زوجها وابنيها

وفي سريرالمرض تحمد الله

المعذره لم ابكي لغاية الآن

هل انتهت دموعي ام اجد الاجابة بينكم ؟؟؟؟؟؟!!!!!

...........................

في المقبرة عدد النساء يفوق الخيال

نزفها وكانها عروس

اكثر من 26 امرأه

اقبلها القبلة الاخيرة

لتجعل اثرها الطيب في نفسي

............................

إنا لله وانا الية راجعون

المعذرة

هذه انا عتيجة صديقتكم

اتمنى من قلبي ان تدعوا ولو دعوة واحدة لعمتي الغالية ان يتغمدها الله بواسع رحمته

وان يجعل قبرها روضة من رياض الجنة

ويرزق زوجها المخلص الطيب وابنيها الصبر و السلوان

انا وجبنة كيري!!!

مادري اليوم اشذكرني بدرس يوزد تو

Used to

اللي كنا ندرسة في ثالثة متوسط كان يتكلم عن عادات الانسان كان يسويها تالي اقلع عنها لمراد تذكرت عدة مواضيع وامور مختلفه وابرزها الاشياء اللي كنا نعيب عليها تالي قمنا نسويها و اولكم انا

عيبت عاللي يلبسون بنطرون وحجاب اقول شنو فلسسسسطن........ الحين البس بنطرون وحجاب .......اختي كانت اتطنز علي ......الحين تلبس مثلي ...ولكويت نصها مثلنا
كنت ما آكل وجبات سريعة ... الحين آكل وجبات سريعه (عدى كنتاكي-برجركنج-هارديز- نايف ...اش بقى بعد )
عيبوا علي اول ما لبست ملفع ملون –كانت الموده خيشة- اللي يقولي مذيعة بالتلفزيون اليمني واللي يقولي مرحبا بكم في مهرجان خريف صلاله .....الحين كلللللللللللللللهم يلبسون ملفع ملون وانا رديت عالاسود .......تالي عيبوا علي يوم لبسة قبعه/ امطه/ قبوعه مع الملفع بما فيهم يدتي الله يطول بعمرها ...الحين كلهم يلبسونها واولهم يدتي لول
كنت امر يم دورا الشيراتون يوم الاحد اظحك على لهنود اللي يصورون كل مايو دوار الشيراتون ....الحين كل مناسبة اصورها حتى لو رايحه ستاربكس ...الله يعافي كاميرا الموبايل قلبتنا هنود
كنت اعيب عاللي يلبسون نظارة شمسية بمكان مغلق مسكر ....الحين ما اقطها .... حتى بالليل ههههههه لا اتغشمر
كنت اعيب على لجناط لكبار واقول حق بنات خالتي اش حاطه فيها حاطه هدوم عيالج حق لزواره هههههه ....الحين اغلب جناطي كبار
كنت اعيب عالمسلسلات الاجنبية واتطنز عالضحكه اللي يحطونها ....الحين اطالعهم واضحك ظحكه اسخف من الضحكه اللي حاطينها ها اهاه هاها
كنت اعيب عاللي يقضون ساعات بالقهاوي .... الحين اقعد اكثر منهم
كنا نعيب عاللاستقبالات الحين احنا نسوي استقابلات
كنا نعيب عاليران اللي ما يتزاوروون الحين احنا ما انتزاور
كانوا يعيبون على الملا اللي يقصر بنطرونه و دشداشته ... الحين بنطروناتهم امقصمله
نعيب عاللي يسوي عزيمه ويحط موالح ....الحين قمنا نسوي عزايم موالح
كنا نظحك عاللي يحسن شواربه ....الحين الجماعه صاروا مللللللط
كنا انتطنزل على فئه يشربون شيشه بالبيت ....الحين الكل يشرب شيشه بفيلا فيروز
كنا انتطنز عاللي ياكلون بالطريج ......الحين الكافيهات لاتعليق
يوم كنت اصغر من جذي اذا صارلي شي واستانست اسوي العجله .....اليوم زلقت ووانا مستعيله وقعدت عالارض خمس دقايق عشان اقدر امشي مره ثانية .... < --- ماله علاقه بالموضوع ...الكبر شين

حاليا :
اعيب على اللي يحطون قوطي روب تحت الملفع
اعيب عاللي يدخنون شيشة
اعيب عاللي يلبسون استرج وحجاب
اعيب عاللي يطلعون رقبتهم من الملفع
اعيب عللي يلبسون تراجي وملفع
عيب عاللي تلبس عباة جتف امبطله واسترج ...

..الله اعلم بالمستقبل شبسوي.

..تراني مو مضمونه

;p

ادري انها حريات شخصية وربما في غيري يعيب علي بس شسوي .... كويتية ماكو فايده
...........

شفت محمد زميل جديد علي وصغير بالسن بمكان عام وصادف ان كان يبي مني شغله ظروريه فأندمجت معاه بحديث و مشهد بو خمس دقايق كان معاه واحد اعتقد انه صديقة ..وبينما انا وياه انتحجى يا واحد ثالث يسلم على صديقة وبما انه ماشاء الله طول وعرض وانا عقلة الاصبع فحجب الرؤية عن صديق الصديق لرؤويتي ...لمراد كلهم محترمين وثقال ...وفجأه مرت بنت في سن الزهور ماشا الله لا اله الا الله سمييييينة وجميلة جدا ولابسة استرج املح وبلوزه قصيره ...المشهد مو حلو ادري علما بأنها حرية شخصية ....ولا اسمع صديق الصديق يقول بصوت واطي حق صديقة –ماكان شايفني- باللهجه اللبنانية
مش هيدي البأره اللي بنعمل منا جبنة كيري ؟؟؟؟؟؟؟؟

.
طبعا محمد – زميلي- ويهه قام يتررررك ومبتسم....وانا سويت روحي ما اسمع وكملت السالفه والاخ الللي قط الحجوه ما انتبه كلش علي الا يوم مشيت..يوم مشيت -لا ادعي المثالية- ضحكت مو على البنت والله على الحجوه اللي انقالت ...المشهد كلا ما خذى دقيقة ...يعني الصراحه يا بنات يا خواتي وفعلا الكلمة اقولها بأخوية لأن عندي خوات وبنات اخو وبنات اخت... هذا اللي سمعته الله اعلم باللي ما سمعته وهذيله ثقال ومحترمين والحجوه صارت بينهم وبين بعض

بغض النظر عن ما دار بينهم
ذوقا ... شكلا ....مضمونا ....احتراما...دينا ....غير لائق والله ...

ولا شرايكم !!!!!؟؟

بالمناسبه شنهي الشغله اللي عيبتوا عليها وقمتوا تسوونها؟؟؟؟

بصراحه بعيدا عن المثالية

يا ام العضلالالالالالات!!!!!!؟

الصومتحركا
الرسوم المتحرك

البباي

الميكي

افلام الكرتون

وما ادراك ما افلام الكارتون يمكن انا مو شغلتي ابحاث الاعلام والراي العام لكني فعلالالالا اكثر شي اهتم فيه الطفل و التربيه ...يعني احتمال جدا اذا الحكومه قدمت استقالتها يحطوني بدال الصبيح ...بس حزتها عاد بصك موبايلي وبروح الشاليه ...وماراح يحصلوني فيضطرون آسفين انهم يردون الصبيح

ويخسروون عتيجه اللي ما تعرف شي عن عن وزارة التربية حالها حال بعض الوزراء اللي قبل نورية الصبيح

ترى قلنا بعض بعض

لمراد مادري شفيني طقيت الرصيف ----- > كلش مو ميته عالوزاره

خلنا بأفلام الكرتون .... ا

ذاك اليوم قريت ان بيييييييييييب بيييييييييييييب ممنوع عرضه باليابان وممنوع يدخل اليابان وكان تحليل الدراسه ان بيييب بيييييب له آثار كبيره على الطفل بالمستقبل ويخليه ما يفكر ولا يبذل مجهود للحصول على مبتغاه ونيل هدفه وذلك من خلال الذيب المميز بالذكاء اللي يفكر بألف طريقه ذكيه محبوكه عشان يصيد بيب بيب واخرتها بيب بيب بحركه غبيه معتمد على الحظ يطلع من الموضوع يعني بلكويتي "بييب بييب يكسر المياديف " وطبعا اغلبنا يدري شنو حجم اليابان بالصناعه وبالموارد البشريه ...-واللي ما يعرف مو عيب يقول ما اعرف- ...ودايم يركزون على كرتون كرة القدم مثل كابتن ماجد وربعه حتى لو كلالالالالالا ... كلك وتشلخ - كذب - حتى لو بسام ما يفوز على ماجد حتى لو الاخوان التوأم لا شفت حركاتهم اللي يركب فوق العارضه والثاني اللي يرفس اخوه عشان يطير تحس ان السما بتطيح عليك ماعليه ...الهدف ان الفريق يرتقي

وخذت اليابان بعد عدد من السنين -طبعا ما اتذكر الارقام- كأس العالم في كرة القدم للسيدات علما بوجود خمس فرق سيدات لكرة القدم بس بس بس ...واحنا قبلهم بالكره وعندنا 13 فريق ..... والله يهدي الاتحاد ...فعلالالالالالا

بسسسسسسسسسسسسسسسسس!؟

وذاك اليوم قاعده اطالع ام بي سي 3 مالت الاطفال حزة وقت الذروه لمشاهدة الطفل اي بعد اذان العصر تقريبا ولا ثلاث بنات وحده لابسه اصفر ووحده اخضر ووحده ماني ذاكره(هذي اللي حاطتها صورت وحده منهم) يعني يحلون مشاكل العالم وبعد ما حلو احد المشاكل اقعدت وحده - اللي لابسه اصفر شعرها كاري اسود- اتودد حق واحد جان يقول لها انا لا افكر ان اكون علاقه معك لأن عضلاتك اكبر من عضلاتي ؟؟؟؟؟؟؟؟؟!!!!!!!!!!!!!؟؟؟؟؟؟؟؟؟؟؟

وما شافت الا غبرته خنت حيلي حيلها

جان ايوونها صديقاتها يعايرونها باللغه العربية طبعا يقولون لها يا ام العضلالالالالالالالالات ويتظحوكون؟؟؟؟؟؟؟طبعا عتيجه بلقت عيونها ...ومرت اخوي تقولي لا حلو هالبباي كل اليهال يتابعونه وانا مادري شسمه ---- > انا ادري ان اهيه متابعته بس تستحي تقولي بناتي يحبونه

وبرااااااااتز يا عل ماكو براتز....بنات يترقوصووون ويحطون مكياج بس شوفوا قبلتهم بس .....لاتعليق

يمكن اخر شي تحسبوني بقولكم ديروا بالكم على عيالكم ..وجابلوا معاهم التلفزيون .....طبع الانسان يكون واقعي افضل من انه يكون مثالي عشان يتعامل مع الامور صح ...فجابلوا عيالكم هذا شي لا شك فيه واللي يقدر يسوي جذي اعتبره اب او ام مثالي لكن في قرارة نفسي ما ظنتي واحد ولا وحده منا (راد/ راده) من الدوام و(متغدي /متتغديه) (ضارب / ضاربه) بالخمس اذا مو بالعشر و(شارب/شاربه) استكانه جاي (يجابل /تجابل) التلفزيون مع الاطفال

مستحيييييييييييل

او يكاد يكون مستحيل

انا الصراحه اضع اللوم الاكبر على قنوات الاطفال العربية اللي قاعدين اييبون هالصومتحركا على بو انها ارخص شي وبيكثرون من عدد المحركات بغض النظر عن الجوده و المفهوم ....ويعرضونها حزة الذروه بعد يعني ادهى و امر

طبعا ما اقول خلنا نسوي إلا الاطفال ...على وزن الا الدستور لا ابدا -علما بأن الاطفال اهم-....بس فعلا ظروري كل واحد منا يسوي شي بهالموضوع بالطريقة اللي يشوفها مناسبه ...... وفينا الخير الحمد الله

ولا شرايكم بحملة بيب بيب يكسر المياديف مو جنها احلى ;p

بتظيفون شي

ترى ما استغنى :)