راس يابس!!!!!

تقول نونو-نون النساء- زميلتي العزيزه في البلوق اني صايره حدي كسوله بالكتابه

ترى حتى ام حمود -صباحك سكر- صايره كسوله مو بس انا

والسبب هو انشغالي الدائم

والمتكرر

واليومي

حتى البوستات ما تنكتب عندي الا تالي الليول

جني ناطور

وانا اقرى بوست نونو طرت علي سالفه وانا صغيره

وانا صغيره كنت اتميز بالعناد

حتى يوم كبرت والله

عناااااااد الى درجة ان يضرب الوصف في باسي القوي

في مره من المرات كنت انطر عند مدرستي الابتدائيه قاعدة تحت ذلال شيره قايلي ابوي نطريني تحتها

وبما ان مدرستي بعيده عن البيت فما كنت اقدر اروح مشي

او المشي كان صعب وايد

المهم ذاك اليوم كان يوم عقبه عطله

وانطر

انطر

انطر

حر موووووووووووت وكنت بأولى ابتدائي

ومصروفي مخلص وانسوا اطلب من احد خمسين فلس حق الماي يكون عزة نفس مع الويه

المهم وصل الوالد وشكله مطنقر حده

ومعاه خواتي كلهم واخوي

فكرت بقلبي قلت يعني دايم انا آآآخر وحده مع اني اطلع اول وحده

والجنطه صندوق وايرها امشي وامشي والله حر الرمل تقولون الربع الخالي

وقبل الله ياخذهم حق كل ماده ستين كشكول

والجنطه من ثقلها ساعات احطها على راسي

لأنها دايم تكممخ بركبي تعورني

وانا قصاصه

فالحاله كسيفه جدا جدا

وصلت السياره وقلبي متروس

والوالد شكله مطنقر مادري ليش

هل احد من اخواني اخره

هل و هل وهل؟؟؟

ركبت السياره وعلى اني لصغيره ذييج الحزه الا اني ارتزيت جدام

سكت بالبدايه

جان اقول وااااااااااااي حر طول عالكنديشه

جان يقولي مو عاجبج

جان اقول ايييييي <<< طوالة لسان

جان يقولي مو عاجبج نزلي وردي مشي

جان اقوله ....وققققققققققققققققف هنيه بنزل

استغرب

بس خذاها بعناد

مثل ما انا خذيتها بعناد

جان يوقف

يبي يشوف من صجي ولا بس جذي

وابطل الباب

وشوفوا البقاره

زين انتي نزلتي آمنا بالله .... جنطتج اللي جنها باوره ليش تاخذينها

الظاهر علشان ما احس انه احد متفضل علي بشي

وانزل وارقع الباب عقبي جركاااااااااااااخ

وامشي

يحسبني برجع

اخواني في ذهوووووووووووول وجنى حايشهم عقر بقر

وعطيتهم مقفاي ومشيت

وامشي بفخر وكرامه ولا ذل النطره

وكما قال شاعر المرقاب عنتر
لا تسقني ماء الحياة بذلة ****** بل فاسقني بالعز كأس الحنظل

البيت بعيد

وكلا براحات ماكو رصيف ماكو شي

وانا اولى ابتدائي ولدلاله لكم عليها

تذكرت براحة بو عمر انها تطل عالشارع الرئيسي اللي تطل عليه مدرستي

واخذت الشارع الرئيسي ومشيت وحطيت الجنطه على راسي

جني راعي بسطه

والجنطه صندوق ازرق

وحاطتلها قفل بعد الله يزيد النعمه مادري شعليه

والقفل ثقل الجنطه لونه اسود امدلقم راهي

بس والله حسيت بفخر

وامشي واغني

اونس روحي

ليما وصلت براحة بو عمر

ومن براحة بو عمر حدرت على فريجنا

وطبعا كل ساع شايفه احد ومسلمه عليه

وانا عتيجه لمدلله راده مشي

اخييييييييه بس يا لعناد

وقبل لا ادش بيتنا ولا اشوف جعفر يارنا

يقولي حر هاه الله يعينج

جان اقوله بإبتسامه باهته لا عادي

ايييي عاااااااااااااااااااااادي

اي بطييييييييييييييييخ

الا انشويتي صرت بطاطه ولخدود صاروا جنهم طماط الوفره

يوم وصلت البيت ابوي سوى روحه مو مهتم

خواتي قالوا شسويتي ابوي كان امطنقر لأن اخوي مأخره

واحنا مأخرينه وهو ناوي يطلع مع ربعه مادري وين وطبعا قبل لا بيجر ولا موبايل علشان يقول لهم وينكم فيه

وانتي زدتي الطين بله

وطنقر وقام يصرخ بالسياره يوم نزلتي

اش لج بطوالة للسان ولعناد

بس والله حسيت بأنتصار ما زلت افخر فيه بيني وبين نفسي

وهالموقف لي اليوم الكل يذكره

بس اللي يسمعه وهو توه يعرفني يقول آخر شي كنا انتوقعه منج انج تكونين بهلعناد

صج اني عنيده بس عنادي على نفسي مو على الناس يعني الشي اللي ممكن يضرني مو يضر الجماعه

:)وعسى طاب خاطرج يا نونو :)

زهيريه

وينـــك ضوى الــروح الــقلب عنك يسأل

لاتاخــذ علينا بالهجر ولا تطول به المسأل

خـــذاك الوقت منــا وخلاك عــنا ما تسأل

********

بعض البشر تحسد وممكن عينهم تصيبك

لكــن ابد مــا تعلم بــهالدنيا شنهو نصيبك

القــلب يحزن لفرقاك ويحزن لما يصيبك

*

لا تــاخذ عليــنا بالبـعاد إنشد عننا واسأل

عتيجه ام مضحي

يوليو 2004

رفيجة ام نبيل

قعدت افوكر شكتب وخاصة اني مبطي ما كتبت شي ..وكل ما يطري علي اكتب شي اشوف روحي مو فاضيه وايد

طرت علي سالفة رفيجة ام نبيل

اهي بالعربي ام نبيل مرافجه البيت كلا

عاد عندها هذي رفيجتها مسكينه فقيره عندها توم ثلاثه صبين وبنيه

حالتها كسيفه

وفوق هذا اهي بطبعها ما تحب اليهال

طبعا الطريقه الي تيوزت فيها كانت عرض من الخيال لي الحين مو مصدقتها

فبما اني مو مصدقتها ما راح اقولها

لكنها يوم حملت استانست

واستانست ام نبيل

ويوم وصلت مادري اي شهر

راحت سوت سونار وقالولها بننزل الياهل

إي ليش قالولها الجنين مشوه وله راسين

شلون

غيروا

بدلوا

لازم اننزله

استخارت المره وعينت من الله خير وقالت ما ينزل واللي الله كاتبه بيصير

سبحان الله ومن استخار ما تحسف

وتعالي يوم الولاده

صراااااااااااااااااااااااااااااااااااااااااااخ

وطلوووووووووووووووووووووووق

واااااااااااااااااااااااي

او ويييييييييييييييييييييييييو

ارقصت سامري نقازي طمبوره خماري كل الرقصات

وامها عيت-رفضت- يحطون لها طلق صناعي

ما يصير يا خالتي

المهم

كان زوجها واقف على يسارها

وصديقتها الحميمه منيره على يمينها

ولدت الأول

جان تحس بفتور وخدوووور وألم ...قالت بقلبها بسسسسسسسسسسسس

هذي سكرات الموت

قامت اتشهد المره

واشهد ان لا اله الا الله واشهد ان محمد رسول الله

ويقولون ماندري شكو قامت تقول الله اكبر الله اكبر جنها داشه الجهاد

وقامت توصي

و أول وصيه قالتها

قالت حق زوجها يا فهد عقب عيني-وفاتي- تزوج هذي وتأشر على منيره

فشششششششششششششششششششله

منيره وييها صار برد صاروووخ من الحيا

وقامت إتترررررك جنها قاضبه اليسار ودايسه

المهم

صحت الاخت اللطيفه ...وطبعا اول ماتصحى هم مخدره

تقول يوم صحيت حسبت اني بلقبر

وكان قبالها اثنينه مصااااااااكه يخرعون قالت بس هذيله منكر ونكير

وملحفينها بجادر ابيض بس اكملت

استغفر الله يا ربي

وطى عليها ريلها وقال لها حمدالله عالسلامه

حلم

علم

جان تطقها بجيه

وااااااااااااااااق او ويييييييييييييييق

منكر ونكير طلعوا حموانها اثنينه رادين من دواماتهم اخر الدنيا

وهي طلعت نايمه لمدة طويله اكثر من يوم

قالولها انج يبتي توم

ولدين وبنت

والاخير توفى كانت بنت

تصدقون يا جماعه

صج ام

ظاق خلقها عالاخيره

وقامت تبجي

ولي الحين ظايج خلقها عليها

تسولف علي ام نبيل

تقول ذاك اليوم رحت لها

ولا واحد على ظهرها ههههههههههههه هذا خالد

وواحد جدامها

والثاني شايلته بيدها

تمش الارض بريولها واتحجى بالتليفون

وخالد يحن

ههههههههههههههههههه

حسافه ما كنت معاهم

كان شكلها انتيكه

يزا الوالدين على الله والله

اول ما دشوا عليها ولا تقط عليهم خويلد اهوه اللي مطلع عيونها

والباجي عادي

احلى سؤال اذا تبون تظحكون سألوها

تبين عيال زوود

ههههههههههههههههههههههههه

تحذفكم باللي قبالها

والله لعيال نعمه عاد

لكن احلى شي يوم تقول حق ريلها تزوج منيره

حتى لو كانت في باله هالسالفه هون ههههههه

منيره عقب عالسالفه ما طاحت عينها على عين فهد ولا حاجته من الفشله

والله موقف محرج عسى الله لا يقطني فيه ان شا الله

بس كان تفكيرها منطقي ذيج الحزه يعني اعتقد احفظ وحده على عيالي صديقتي

وفوق هذي اهي اكثر ووحده الريل يغار منها

لكن

عظم الشريجه بالقبر يجرح

صج والله شي صعب ان يكون للمره شريجه

مهما كان الشرع محلل

لكن صعب حيل والله

الله يعين كل مره ريلها ماخذ عليها والله

شكو قلت هالحجي مادري

:)

وتقبلوا منا فائق الاحترام

حياكم الله

عيدكم مبارك

ريييييين ريييييييييييين يا جرس

شعور يمرضني

عندما اعجز عن اسعاد او ايجاد البسمه على شفاة من احب

ام مضحي

لما تاخذني العبره

بطلب كريم غير مباشر من

اختي ريما

واخوي مشاري

واخوي كويت لوفر

تم رفع الحضر عن الكومنت وفعلا يا جماعه كنت اعتبرها خرابيط الين قريت تعليقاتكم ( ريما ومشاري) في بلوق ريما ..بس مو لي درجه بو فارس يا ريما ...صج انا وايد متأثره فيه وايد وايد لكني والله احس اانها عاديه

19??\7\4

اسكت انا وياك
لما تاخذني العبره
اذكر اني بفتره
كنت انا وياك
أصبح في محياك
في علاقة حب حزينه
حب بأشواقه وحنينه
وأسمع لقلبي ونين
يبجي على باجي السنين
*************
اشوف الكون بعيونك
وامشي في بحر كونك
تلقاني وسط جنونك ...في دنيا تعيسه
********
أكتب حبنا بحبري
واحنا بالفراق ندري
لكن الفراق بدري
لقلوب (ن)صغيره
*****
ادري لفراقي تعاند
وأدري انك بحبي تعاند
انت ما تكرهتني ابد
انت تحبني للأبد
رغم شكي... لفراقي تبكي
وودي عني وعنك لك احكي
********
تذكر
تذكر صباح الخير بعيوني .....وبعيونك صباح النور
صباح الخير ..يا كل مافيني
دونك ضاعت سنيني
وما لقيت اللي يبجيني
تصدق.......ان سولفتلك عن روحي
اني اقعد اناظر بروحي ...بشوف قلبي وروحي
ابي اوفى ما انخلق فيني ...لقيتك اوفى ما فيني
واتصدق ان عيني ما ادمعت
كان ودها لكن الدمعه ارجعت
لأني ما خنتك ابد
لأني احبك للأبد
ولا انطر منك يزى لوفاي
لأنه الوفى طبعي ومشى ممشاي
وهذا الوفا مني...يمشي بدمي
لأجل وضوحي مع نفسي
مو وضوحي مع امسي
وارتياح الروح
مع صوتي المبحوح
ابقلبي المجروح
انت تحبني ...او تحبني....او تحبني
للأسف

عتيجه ام مضحي
http://songs.njom.net/music/gulf/ram/alrwaidshed/rwaidshed53.ram