ما اجملك...سأشتاق اليك
تكملة رحلتي......
يسألني ابوي ....هاه نصوم التاسع والعاشر محرم اهنيه ولا بالديره .....
ارد ماااااااااايبيله ...هنيه بس شرط نفطر بالحرم.....يقولي:شكلج دايخه وولهانه عالديره ارد:بس ابي اصوم هنيه
طبعا ماكنت اعرف يعني شنو ان الواحد يفطر بالحرم ....وشفرق الحرم عن البيت ..
كنت اشوف الناس اتفطر بالحرم ...ياكلون تمره ولبن وماي زمزم بالتلفزيون بس ماكنت اعرف شعورهم بالظبط ....وهل الفطور بس تمره ولبن ......!!!!!!!؟
وبما ان كنا نصلي فرضين المغرب والعشا بالحرم ...فضروري يكون الفطور بالحرم.....
ركبت امي مرقه عشان اذا ردينا الشقه نطيحلها مع البخاري ...وسوت شوربه ....حطت لنا كل واحد مق فيه شوربه ...ويابت تمر ولبن وماي وككاو ...ومادري شنهو تدرون بعد كويتيين ...لازم شوربه
والاهم من الشوربه
سمبوسه يا سمبوسه وين كنتي محبوسه ....
ووقعدت اختي فقيره تفتر بمركز مكه تدور سمبوسه ....مالقت الا عند الطازج واللذيذ وسمبوسه دياي بس وسعر الوحده ريال!!!!!!!! الله يعز لمباركيه ...تعرفون المحل الطرفي اللي فيها ما يبيله ...ما اظنن في واحد يمر يمه ما يشتري
حتى لو شبعان
.....المهم وصلنا التوسعه لأن الحرم ما يصير ندشش فيه قشنا السله ومطاطير الجاي والقهوه ...ولبساط ....(طالعين كشته الحبايب)ا
فرشنا بالتوسعه ....
والناس تمر ...أللي يوزع تمر
واللي يوزع ماي ....شعور حلو ...داير مدارنا عوائل و أسر من جميع الاجناس و الجنسيات ...كلهم صيام
جميعنا صيام
شعرت ان الاسلام بعز....حسيت هالاحساس واحنا كلنا ملتزمين بهالسنه
...صكت المحلات قبل عشر دقايق من الاذان ....يمر ريال معاه عصاة ...يقول قفل قفل باللهجه السعوديه ...
المحل صاك
اذن الناس ماراح اتسوق
اذن ماراح يأجلون الصلاة
يمر علينا امام المسجد الحرام ....عبدالرحمن السديس .....وداير مداره حرس ....الله يبعدك عن الفتنه يا سديس ...فعلا فتنه ...عشان الناس ما اتمسح واتبرك فيه ...بس طبعا ماكان في احد ...والعاده يتبركون فيه بالطلعه ...ابوي يقولي سديس عتوج ....تقوله بنت اختي يبا بروح اسلم عليه واصور معاه....يقولها ابوي شنو عبالج داوود حسين....ههههههههههه
تمر علينا اربع ينازات-جنازات-اقول بقلبي البقاء لله ....هذي نهايتنا كلنا
يقول المذن : الــــــــــــــــــــــلــــــــــــــــــــــــــه اكبــــــــــــــــــــــــر
تمسك الناس تمرتها ولبينتها ....واتفطر ....احلى شعور....
يطلع سديس من الحرم بعد ان ائمنا بالصلاة...داير مداره حلقة من رجال الامن ....والباكستانيين يحبببون ايده ...مسكين ويتمسحون فيه ...ووالله كان قمه في البشاشه ما يدز احد ولا شي اللي داير مداره قالبينها معركه ....بس شيسوون
وايي يوم الاثنين ...العاشر من محرم ...نقرن صيام الاثنين وصيام العاشر....ونفس الموديل لكويتي
شوربه جاي قهوه ككاو ....بساط سله مقات ...بس هذا كان يومنا الاخير هناك يعني لازم نكمل برنامج الصوايغ نوصل الحرم ابجر ...ندش مركز مكه نشري صوايغ...طلعت من مركز مكه ...ولا مطر
اووف مقلب وين نقعد وين نفرش ....اروح ادرعم الحرم ...جني ما ادري ان ممنوع يقولي يا اختي ما يصير ...قلت والله يا اخوي احنا ناوين نقعد برا وتهمنا نظافة الحرم قبل نظافة بيوتنا ...لكن المطر ردنا ...
مادري انا ذربه
ولا شكلي جذي....قالي تفضلي اختي ....ومن زود الذرابه قعدنا يم السلم المتحرك ...ما دششت شغلنا داخل ...مع ان وايد ناس درعموا .....دش ريال شكله بشوش...القى تحية الاسلام علينا بدون ما يلتفت ...طبعا ملقوفه كويتيه لازم ترد
جان يقولي ابوي :عتوج عرفتيه
قلت له لا والله
قالي الشيخ سعيد بن مسفر.....
جان اقوله وي يحلييييله
رد علي ابوي وهو يظحك شايفته حاط مصاصه تقولين يحليله ....شيخ هذا شيخ
زييييييييييين درينا لاتسويها سالفه ....
قالي ابوي هاه تكملين صوايغج انا بخاطري بنيديه من مركز مكه عجيبه ....قلت لا يا عيوني بطوف طواف وداع ....ولا بييت اختي قالت من المطر الصحن ريييييييييقه ....مافي مجال....ظاق خلقي قلت بطل بنفسي ....طليت ولا مو ريقه......سكيييييتنق ....كملنا شغلنا ....صلينا العشا.....وردينا
وهذا كان اخر لقاء لي في بيت الله ....احلى بيت ....وعسى الله لا يحرمني اذا ظليت على قيد الحياة
ما اجملكي يا مكه
ما اجملك يا بيت الله....سأشتاق إليك
سؤال عارض :قاعده اكتب قصتين...بنزلهم بلبلوق ...
1- طاح الريموت
2- مذكرات واحد ما يطيع الحجي
رشحوا ايهي تنزل قبل الثانيه.......لأني ما اعرف اسوي الاستبيان
Labels: مشاعر
posted by 3ateeja @ 6:35 AM
22 Comments:
الله يتقبل طاعتج
ويهنيج مع أهلك
أنا أرشح مذكرات واحد ما يطيع الحجي
عنوانها أكثر جاذبية
:)
تقبل الله طاعتج يا عتيجه
و ردينا على عمشه و نبيل و خاتون و كروووومي و احد مضيع سويجه و هممممم الي مايسمع الحجي اكيد انا الله يعينج يا ام انسان بسيط على يباست راسي
تقبل الله طاااعتج
عمره مقبولة يارب
واله يحفظ لج اهلج و يخليج لهم
ياحلو مكه والله
عيزنا ندور حجز هالاسبوع و اللي طاف
بس مالله كتب
اذا طلع الحجز تعارض مع الاجازات و العكس صحيح
الله يكتبها لنا جريب يارب
تبين الصج انا من زمان ما رحت العمرة الصراحة خليتيني اشتاق اكثر حق مكة و الحرم
بالنسبة حق القصة نشري الي كتبتيها اول
خوش رحلة الله لا يحرمكم من اعادتها وتكرارها
انا ارشح طاح الريموت
ساخر:
منا ومنك ...وانت اول صوت لمذكرات واحد مايطيع الحجي
بسيط:
منا ومنك ...انت اول واحد يصوت حق واحد مضيع سويجه ...وبيطلع سبير ان شا الله
كرييتف:
منا ومنج ...روحي ابباص ..بس ماقلتي لي شترشحين
دايفر:
عاد لا رحت دعواتك بس بظهر الغيب...طماعه
جوابك ديبلوماسي...ثنتينهم كاتبتهم يميع بنفس اليوم ...شسوي الالهام...انت شنو تبي انزل اول
مملوحه:
انتي اول صوت حق طاح الريموت..و الفال لج ان شا الله
اول شى عتوج يا عتوجة يا عتيجة يا يبه
لما يروحون يتفطرون بالحرم تمرة ولبن ومرات قهوة:)
بس الكويتين ماكو فايدة
المرة الياية معاى ;)
وانا اعلمج الطرق الملتوية علشان على السريع سريع :)
وباجواء ايمانية عالية وباسعار تنافسية :)
عتوج ذكرتينى
والا اقولج تالى
انزين انا ارجح اللى ما يطيع الحجى
:)
وشنو شريتيلى من العمرة؟
يعني شنو كاتبتهم يميع وحدة بليمين و الثانية باليسار بنفس الوقت
حطي الي خلصتيها الاول
نورتوا السعودية أجل :)
تقبل الله منكم إن شاء الله
بعدين ،،
تراني اليوم توّي مخلصة إمتحاناتي وإنتي تقولين لي إختاري القصة
خلاص ،، صار عندي عقدة من اختاري الجواب الصحيح :
بس يالله عشانك ،، أختار مذكرات واحد ما يطيع الحجي
عاجبني اسمه :)
والله وشوقتينا عليها
عسى ربي يرزقنا
:)
اختار واحد ما يطيح الحجي
والله انتي يلي يحليلج عتوج
عنصر التشويق اللي تضمنته حروف كلماتك تجعلني أموت شوقا لزيارة بيت الله
آخر زيارة لي كانت في 2000
وارشح مذكرات واحد ما يطيع الحجي
بانتظارج يا عسل
تقبل الله طاعتج ياعتوووجه :)
واي وناسه تصدقين ماجربت اتفطر بالحرم .. لا ضروري اجرب عن خاطري ^_^
وناااااسه شعووور جميل ودج تلمين الكعبة من كثر ماانتي فاقده المكان :)))
امممم لا عيل انا شدني الريموت اكثر .. ! زين عقب ماطاح شصار تفلّش ;p
تقبل الله طاعتج
والله يخليلج اهلج ويطول بعمرهم
والله من اول اني ميته من الضحك على بنت اختج لما قالت" بصور مع السديس" ولاانتي لما قلتي "يحليله" ههههههههههههههههههههههههه
والله انني استمتعت بمدونتج
وانا ارشح
"طاح الريموت"
تحياتي الخلصه لج
وســـــــــن
الله لا يحرمج من روحة بيت الله :)
وإدعيلي لأني بروح عن قريب القريب بإذن الله :)
تقبل الله طاعتج إختي :)
وبالنسبه للموضوع .. اممم اختار
طاح الريموت :)
والله عشنا الأحداث بتفاصيلها ..
أحلى شي السديس = داوود حسين !!
لا والشيخ سعيد بن مسفر يحليله !! لووول
بدعة بدعة !!
عسى الله يمد أعمارنا و يمتعنا بطاعته و يرزقنا عمرات في ما بقي من أعمارنا ..
الله يعطيج العافية ..
و أنا أرشح .. اللي مايسمع الحجي :)
ايه ذكرتيني بعمرة رمضان صج الواحد يشتاق لها ..
وياحلاة الفطور بالحرم ..
له طعم ثاني
ربي يتقبل منا اللهم امين
مشمش:
شتقولي تالي ...لا قول الحين لوسمحت .. وشنو طرق ملتويه لالا يبا انا سيده واحب السيده قولي من الحين قبل لا استخير
;P
مايطيع الحجي ما يطيع الحجي ويتبلك مسواج واحد
واحد فقط
دايفر:
زين درينا ....بس لاتزف
ميامي:
الله يحييج ويخليج...ومنا ومنك
ولد الكويت:
تظحك بالينه قول امين ...وصل الترشيح
افياء:
فعلا الفطور له طعم ثاني بالحرم ....ومنا ومنج صالح الاعمال
الاثير:
ان شا الله تروحين مع طماشه ;P
بلوقليس:
اتمنى اني اكون احد اسباب زيارتج للحرم
ووصل ترشيحج
ريلاكس:
حتى انا شادني الريموت اكثر بس شسوي الجمهور عاوز كده
وسن:
حتى انا ارشح طاح الريموت :) وعسى الله يخليلج اهلج ويقطع الكلمات المتقاطعه عن امج :P
دانه:
تسلمين يا وخيتي ...وعسى الله يرزقج زيارته :)
آنجل هيرت:
منا ومنج وتسلمين :)
Post a Comment
<< Home