لابوك......الجزء الاول

خالده: ألو ...هلا جاسم

جاسم:باركيلي ....انقبلت

خالده في نفسها -افففففففففففففففف استغفرالله ليش يا ربي

جاسم:اشفيج ساكته

خالده:بلمبارك ان شا الله وشكثر قررولك دراسه

جاسم :اتصدقين سنه ..عادلولي الدبلوم اكمل معاهم سنه ..اروح اربع مرات بالسنه مصر امتحن وارجع لكويت ..واصير بكالريوس

خالده: وشفرق الدبلوم عن البكالريوس ...بس عموما الله يكتبلك اللي فيه الخير

جاسم في نفسه ...الا تفرق وتفرق وايد بعد ولا انا شمنطرني عليج كل هالمده ...علشان باجر شهادتج ما تصير احسن من شهادتي ....صج شي تشوفينه تافه بس انا اشوفه مهم

خالده: شفيك ...جسومي

جاسم: آآآآآآآه عيديها

خالده: مابي ....بيباي

تلقي خالده جسدها على سريرها وفي نفسها اكثر من فكره ......شتفرق يا جاسم دبلوم بكاريوس كلا واحد عمرها الشهاده ما جدمت ولا اخرت من قيمة الانسان ... ليش الريال دايم ينظر هالنظره لموضوع الشهاده والشغل والمنصب ......يعني برد انطرك من يد ويديد ...جاسم ترى بمل ...لك بس هالسنه ...بس هالسنه ماكو غيرها ..هذا اذا قدرت انطر وبعدها بقول اللي قاله سعود السبيعي ...لابوك لا بو من ترجى حنانك ...لابو قلوب بالهوى تشكي الضيم ماهمني الزواج ...بس انقطع قلبي

جاسم يسرح في غرفته اما المنظره ...يشاهد نفسه يحاكيها ....خالده خلوده تكفى هالسنه ...بس هالسنه ...نطريني تكفى البكالريوس حلمي ...وحلم اسرتي ...يدخل والد جاسم الغرفه

الوالد: مبروك عالقبول

يعدل جاسم قعدته :الله يبارك فيك يبه

الوالد:الفال لعرسك ان شا الله

يبتسم جاسم : لايبا تو الناس توني صغير واقل شي يبيلي سنه

الوالد::اي تو الناس ..متخرج من الملاحه صارلك سنتين وتشتغل وعندك معاش وسياره والبيت على حسابك انت واختك

يبتسم جاسم : بعد البكالريوس ان شا الله

الوالد: شمعنى ...لايكون اللي بالي بالك شارطه عليك

جاسم: لا يبا اهي ساكته وما تحجت ولا يابتلي طاري الشهادات وناطرتني واصلا اهي ما صارحتني ولا انا صارحتها

الوالد:نعم ...لي الحين ...؟؟؟!!!!!؟

جاسم:يبا انا وصلت لها بشكل غير مباشر ...واهي فهمتها و تنطر

الوالد:تحبها؟؟

جاسم :نعم؟؟؟

الوالد:دام قلت نعم ..يعني تحبها ..شوف يا ابوك انا ريال اكبر منك وافهم زين بصنف الحريم -يخاف جاسم اكثر- شوف يا ولدي خالده بنت فاهمه وعاجل وفوق هذا محترمه لكن خلك صريح معاها

جاسم:يعني شلون يبا

الوالد:يعني قول لها بلسانك نطريني بس هالسنه لأني احبج

جاسم:بس اهي فاهمتني

الوالد:تحبك؟؟

جاسم :ساعات اتصرف تصرفات احس انها ما تواطني....وساعات احس انها تحبني وايد

الوالد:فهمني اكثر

جاسم:والله مادري شقولك

الوالد:احنا ربع قبل لا نكون ابو وولده

جاسم:مره من المرات فقدتها ...ماترد على تليفوناتي ...وموموجوده بدوامها خفت عليها ...رحت المكان التطوعي اللي اهي اتردد عليه ...وطبعا اعرف زميل لها هناك سلمت عليه واهي كانت موجوده اعفست وييها جنها مو مستانسه وجني مو عاجبها..عقبها بجم يوم حاجتني ولا جنها شافتني ولا جنى عفست وييها

الوالد:سألتها شفيج؟

جاسم:لأ..مابغيت اضايقها اكثر لأني حسيت بذيك الحزه اني مصدر قلقها

الوالد:انت مطيح البنت بحيره واهي تبي تحسسك بمدى حيرتها وقلقها....انت تدري جم عمر البنت الحين

جاسم:اي 23 وتوها متوظفه من شهر

الوالد:انت تدري جم واحد خطبها

جاسم:خطبها ...شتقول يبا ...انت تدري عن شي وخاشه عني

الوالد:شفيك صرت مينون ...البنت في عمر ووضع يتقدمون لها افضل الخطاب ..لكنها ما تقدر تقولك تستحي...البنت عزيزة نفس ما تبي ترخص من نفسها جدامك ..وبنفس الوقت شوف جم واحد ردت وشوف جم نقزه قطتلك ..ويمكن يا ولدي يكونون الخطاب كمواصفات في نظر اهلها افضل منك ..البنت في حيره وانت مو مرسيها على بر ..

جاسم: انا ما ابي اعلقها معاي..واظلمها

الوالد:يا ولدي البنت بايعه الدنيا وشاريتك لاتبيعها...وهذا الكلام مو كلامك كلام شي ثاني يدور براسك..

جاسم: بس يبا انت شلون تعرف او تقدر اتوقع اللي تدور فيه خالده

الوالد:لأن اختك بعمرها ...وكاهي شحلوها في بيت زوجها

ويخرج الوالد من غرفة جاسم ...وغارقا جاسم في حيرته ...ومغرق معه المسكينه خالده

..........يتبع