حوسه
تعودت لفترة مو بسيطه اني اشجع الناس بمجالاتي اللي احوس وادور داير مدارها ...هي ثقه بنفسي اقتنصها من نفسي بين فترة والثانيه .....
تعودت ان النجاح اساسه انا ...وان الفشل ليس اساسه الآخرون ......
تعودت ..ان اكون مره ....وريال بنفس الوقت ...اكون حاده كالرجل بلباس انثى ..لعل ذلك يعود لتربيتي ايضا
يتعجب الاخرين ردودي...او بالاحرى ما يتوقعونها من انثى ...اي لو من ريال تقبلوها ...مثل ..لما واحد يمدح واحد ...اقوله لأن رفيجك ......... <<< قوي الرد صح ....بس شسوي تعودت
هل اغير من طبيعتي ؟؟؟؟
او اني مو عالطبيعه ؟؟؟؟
يايتني هزه في الثقه ...وخمول لامحدود ....ونوم مو طبيعي ...وعدم انجاز غير طبيعي اكثر..بأعمالي فقط ...واخاف ان يتسلق لأعمال الاخرين .....
الصراحه ...شعار الفقارى ...
.حفظو هالحجوه
واذا سمعتوا احد يقولها ....ترى يعرفني ...فعلا نحن لا نملك الا الصراحه ولا احد يمتلك الصراحه المطلقه وذلك لكونه انسان يراعي مشاعر الاخرين ويجامل احيانا ....
دايم اسئل نفسي سؤال حلوا....ليش اللي يلعلعون كلا فقارى....ولسنتهم شطولها ...؟؟؟؟
وليش فقارة لكويت من صارت لكويت اهم فقارتها ....متيرتهااهم متيرتها ؟؟؟؟
يعني والله سؤال يحير....عني شخصيا مو ويه تجاره...زوج اختي معطيني جناط لي الحين ما عرفت ابيع وحده ...مادري اشتريهم منه انا ...مع اني مشارفه على دورة التفليس ...وودي اسافر .....
صعب ان الانسان يشتغل اكثر من سنه من غير اي اجازه ....الاجازه لموازنة النفس
حتى الاجازه مو اجازه ....الشاطر يفهمها!!!!!؟
اصعب ما يمر على الواحد انه يكون يشجع يشجع يشجع
واييله يوم يكون محتاج لكلمة تشجيع ....
Labels: مشاعر
posted by 3ateeja @ 5:34 AM
12 Comments:
قوه :)
يختج هالجو ايمد ما يخليج تسوين شي ..!!
ولا تشيلين هم هالشعور اييني وايد .. ودايما أقول الدنيا فرص ..
الله ما يضيع تعبج .. والله يبعد الفشل عنج ..
انا تقدرين تقولين نفس الطريقه .. اقدر اعتبر نفسي عن 10 رياييل .. مو لأني دفشه لوووول
لأني شقرديه .. وما احصل الشي إلا بتعب وبطلعة الروح وما اييني بسهالة ..
تقدرين تقولين انج محظوظه.. لأنج مرأه حديديه :)
موضوعج اعتقد ان اثار كذا نقطه وضعت اشوي ، اتمنى يكون ردي متوافق مع اللي في بالج ..
تحياتي ،،،،
الدنيا تجارب
الصراحة شعار الفقارى والواثقين بانفسهم...
فقارة الكويت هم الفقارة من عمر
لانهم ماباجوا ولا نصبوا ولا وطوا روسهم لغيرهم
كلامج حلو
والله يهنيج بنفسج يا عتيجة
بس الى مافهمته انج تقولين كلام شباب وانتى بنية ..ماعليه انا دايخ اليوم الجو يلوع الجبد هوا على غبار ماادرى شلون صايرؤ
عتووووج تعودت عليج قويه...خليج جذي...^__*
Hi there,
we, Ali & Musaed, have started a podcast about our daily lives in Kuwait, so come and listen to it at
www.deera-chat.blogspot.com
and then let us know what you think
تيستي آز:
متوافق جدا :)
حامي الديار:
بالطبع
يوكن:
الله يسلمك ...اللي ما فهمته اني ابطها بالويه ...ريال او مره اللي جدامي ...
كوكو:
ان شا الله ولا يهمج
ali:
مافهمت شي ..مي سوري مي نو انجليش
اولا انتي تعرفين حالتج عشان جذي انا متاكد ان الموضوع مرحلة و تعدي و كل الامور عادة لها قمة و قاع و انتي حاليا بانخفاض راح ياخذج للقمة عادي
بعدين الفقير ياطويلة العمر له الله و على طاري لكويت و ليش الفقارة ما تغيرو لان الدولة و التجار حاربو الفقير الي يبي يترزق يخسرون نفسهم بصفقات و مناقصات بس ما ياخذها الفقير و المثل لكويتي المعروف يقول الفقير ولد عم الجلب
انتي ماشاء الله عليك احسك مبدعه
ماتحتاجين مين يسجعك
^___^
وماعليك من اللى حولك اهم شئ انك واثقة من نفسك
^___^ تراك وحشتيني مررره
بس امر على مدونتك بس الصفحة تطلعلي فاضية واليوم عرفة القصة خخخخخخ
ان شاء الله ماانقطع عنكم لاني احبكم وااااااااايد
*___*
وعيدك مبارك وعساك من عواااااده
كوني مثل ما أنتي
ما دامك صح
والقوّة ميزة
وإن شاء الله تلقين تشجيع من اللي حولك
وإذا ما لقيتي
أحد يشجعك
تعالي لي
وبأشجعك إن شاء الله
:)
مع أنه شعار، بس بالفعل الغنى غنى النفس عزيزتي
يعني لما الواحد راضي وقانع، يشعر أنه يملك الدنيا
بس لم كل هذا الاحباط؟ أعط نفسك راحة، لا تشغلي بالك بهموم الآخرين ولو لفترة
ان لنفسك عليك حقاً
وستعودين لما أنت عليه، الطبع دائماً يغلب التطبع
احنا بانتظار تشجيعك دائماً
:)
عيدكم مبارك و تقبل الله طاعتكم و كل عام و انتم بخير
May you Have a Happy and Blessed Eid
دايفر:
وجهة نظر تعجبني جدا ...:)
مضيعه بيتهم:
انا خفت لاتكونين مضيعه مكان مدونتي
ميامي:
ان شا الله ولا يهمج
وايت وينق:
ودي اعطي نفسي لكني راح اعطل الاخرين ...
Post a Comment
<< Home