خسران الذات
جواب مطرب امينه جاوب عليه دايفر ومشاري ..كان المطرب الله يرحمه حمد السليم
ولقيت لكم اياها
اليوم رايحيين انا وابوي نترس سياييرنا ..بعد الساعه ثنتين بالليل تقريبا - والله فراغه-المهم ولا مسكين الهندي ترسلي وانا مبطله الدريشه اهذر مع ابوي على الناحيه الاخرى راح يترس للوالد عاد مسكين بردان ودايخ جان يدعم المونده -العامود-ويفتر وعادي يكمل جان اقول للوالد مسكين ما شفته دعم المونده قعد يتظحوك ...ههههههه والله السالفه تظحك وحسب لنا لفلوس غلط والحاله حاله بس والله كسر خاطري ...والاخ الثاني لكويتي صاك الدريشه ومجابل التلفزيون مادري اللاب توب ..والله شغله ..مع ان العاده ما تلاقيه بمحطة البانزين مادري شيايبه ..الظاهر متهاوش مع المره
والله يا جماعه ترى اعتمادنا على غيرنا زاد ..ليش بالبحرين البحرينيين يصبون بانزين ..عادي شفيها يعني بدال ما تصير طالب تطالب بالاعانه وترفع اعلام تهدد وتندد وتدخل مجلس الامه بالموضوع ... صب بانزين ...اشتغل ببيتزا صج ان هليام الاقي شباب وبنات ..بس احس انها هبه وراحت ...واللي يقول مو مضرين لذلك ..لا والله مضطرين ونص لما نقيس هذا الموضوع على حجم البلد ومصلحته ..راح نشوف ان ضروره ان شبابنا وشابتنا يشتغلون بكل مكان وموعيب ...واول طلعه الشباب والبنات اللي يشتغلون بمكدونلدز اول اثنينه اشتغلوا بنت وولد صقر المعوشرجي-وكيل مطاعم ماكدونالدز-وهذا تشجيع للشباب والبنات ولا صقر مو بحاجه ..لعمل الكويتيين ...
المهم مادري شياب طاري هالسالفه ..
قريت عباره لسيدنا عيسى عليه السلام وايد اعجبتني
'ماذا يكسب الإنسان إذا فاز بكل شيء وخسر نفسه'
فكيف يخسر الانسان نفسه ....انا اشوف عندما يثق به الاخرون ويخون ثقتهم به ...وعندما يحبه الاخرون ويغدر بهم ...وعندما يصدق معه الاخرون ويكذب معهم ...وعندما يوصلونه الاخرون ويتجاهلهم ..او ينكرهم
فكيف يخسر الانسان نفسه في نظركم ؟؟؟
Labels: مشاعر
posted by 3ateeja @ 7:30 AM
10 Comments:
بوست عجيب يخليج تفكرين بعمق :)
والله باعتقادي الانسان يخسر نفسه .. لما يحس أن كلمه "ال أنا" زادت عنده ...او لما يعاند ويعتقد ان اهو الصح ويظل ينجرف ورا الخطأ.. ليما يكره نفسه على هالشي ...
وبالضبط انا اكره نفسي متى .. لما اكون طول عمري رافضه شغله .. وفجأه احس اني لازم ارخي .. ولما ارخي .. تصير الشغله غلط ...
اكره نفسي اني ليش تساهلت وانا كنت بالاساس ماشيه صح ..:(
تحياتي ،،
!!الله ...دعم المونده مرة واحدة وكمل حياته
واي صج صج كسر خاطري وعليه
وعلى طاري الشباب اللي يشتغلون..كل اللي اعرفهم وشفتهم اشتغلو للاسف ما كانو بحاجة شي،مجرد ترزز وترا هذي فلانه الفلاني اللي في ستاربكس وهذي فلانه اللي في دبنهامز
!!
بالبحرين..لما اشوف بنات بعمري وما يفرقون عني شي ويخدموني لو بمطعم تصدقين فعلا من قلب يكبرون بعيني
تلقينها تدرس الضحى وتشتغل تالي
الله يهدي شبابنا يارب
:)
ما أحب أشوف شاب يخلي الهندي يترس له
و ما أحب بنية تنول من السيارة و تترس لعمرها
لا . و إذا كان العصر
ومافي ناس و اهي نازلة
صج شي يخرع
العروس الحين تلاقينها تعودت على ريلها
بوقت الملجة
الملجة أحياناً تطول شهور
فخلاص تطيح الميانة
بس مثل ما قلتي
حده ماله داعي دخله الريايل
و اصلاً مو حلو أول ما يشوفها بكشختها
يشوفها متلفلفة ومرقعة
و متى ما طلعو فصخت .. خلاص راحت الحبكة
لكن
إذا دش و محارمها بس
أول ما تطيح عينه عليها ولا إهي بكامل زينتها
:)
يا حليلج يا عتيجة
تنحبين
يعطيج العافية على هاللفتة البسيطة .. القيمة
أمس سبحان الله انا عند البانزين قلنا نعبي قبل المزرعة ..
وبحكم اننا بنات .. فالهندي يعبي لنا..
ويسفط يمنا ذاك الريال .. ويفتح دريشته ينطر الهندي اييله عشان يكلمه
قامت تاخذ فيني الافكار .. هذا ليش ما ينزل بروحه يصب له
صح انه الهندي يشتغل بالمحطة ولكن انت ريال يعني مفروض تصب حق نفسك
قلت يما انه المحطة من غير الكاونتر يعني تدفع حق الهندي اللي يصب لك .. قلت يمكن من جذيه خله الهندي يصب له لان اول وتالي الهندي بيي حق هالريال ياخذ فلوسه
بنفس الوقت ما اقتنعت ..
ماحبها بالريال انه يوكل غيره على شغله ..
أول مرة أسمع بالمونده
:)
برافوا عتوج
يا شيخة المدونات :)
بس شوفى احنا خسرنا نفسنا لان خسرنا اخلاقنا
مجتمعنا الغالب مافيه اخلاق والله يا عتوج قاعد مع شاب ويها مسالم جدا جدا جدا
ويتكلم بثقة عن مغامرات مراهقين سخيفة هذا الخسران
اصبابنا ورى توافه الامور
مافى هدف
والمشكلة لى الحين الشهادة متوسطة والا ثانوية ويبى يتفلسف مايبى يشتغل
الخجل الاجتماعى ذابحهم يا عتوج
مالت سكتى بروحى ميت قهر
قال الله تعالى (ولا تكونوا كالذين نسوا الله فانساهم انفسهم) صدق الله العظيم
هذه اكبر خساره للنفس
تيست از بيري:
حياج الله اختي وهذي الساعه لمباركه...واحساسج بفقدان الذات اعتقد ان نابع من تجربه شخصيه ..والله اعلم :)
كيتي:
واااي يا حلوج وا يحلو غنيمه وبوالريش دايم هالشكل ..تعلقين على تصوراتي وتنسين سؤالي الاساسي ...انتي بنظرج كيف يخسر الانسان نفسه ؟؟؟
استكانه التكانه:
امانة ماتدرين عن نييتهم واللي يتحجى عنهم وده تييله الشجاعه وعلى قولته يترزز مثلهم ..شدي حيلج وترززي
;p
موكليت كيك:
تصدقين اني انزل واصب حق روحي بانزين ...؟؟؟
وحبتج العافيه :)
الاثير :
تساؤلج قد يكون في محله ولكن الانسان بداية يبدأ من نفسه ...واللي يخدم نفسه مافيها منه ولا عيب ..العيب ان الناس تخدمنا رجالا او نساء ..
ويمكن الريال من الاحتياجات الخاصه ..او ريله مكسوره او شيء من هذا القبيل ..التمس لأخاك سبعين عذر :)
..وعلى فكره ترى من زمان مو مارتني :)
مشاري:
هب هب ريحك ترى مصاريفك زايده هليام ..ههههههه ..وييييه من قدي شيخة المدونات ..لالا بس خلاص انا جذي اشوف روحي
كلا مشتط يبا وخر عن القهر توك شباب ..اييب ظغط وسكر ...والخ
دايفر:
اي والله اي والله ...كلامك بمحله يا خوي يا دايفر
أول شي ... السلام عليكم ورحمة الله وبركاته
والشي الثاني مو معقووول والله اشتقنا
وين الناس ياهو ... عموما أنا سعيد فعلا إنك تخطيتي فترة الإنقطاع الدايم إلي كنتي تواجهينها في التدوين
كيف يخسر الإنسان ذاته ...؟
والله هذا السؤال يبغاله تفكير محنك على قولتهم لكني بعطيكي إياها بشكل مختصر
يخسر الإنسان ذاته عندما يفقد الأمل في شي قد بنى عليه حياته أو بنى عليه آماله وتطلعاته المستقبيلة
تحياتي
ما شاء الله عليج
أنا خوافة ما أقدر
تخيلي .. مع إني ما أنزل من السيارة و الهندي يصب البانزين
أقفل البيبان
ذادكتور:
حياك الله ..ووجهة نظرك قد تكون مقبوله
موكليت:
اقري بوستي الياي
Post a Comment
<< Home