الأصيل!!!
سبحان الله الواحد يفتح صفحة البوست ويكون على باله جم شغله يكتبهم يقوم ويكتب شغلات ثانيه ..صار في ارتباط وثيق بيني وبين ربعي البلوقريين والبلوقريات ..الى درجة اني بعض الاحيان اشك لما اشوف تصرفات من شخص يمي بالقهوه او جدامي عند المحاسب او غيرها ...وخاصه بعد المصادفات اللي ما افصح عنها واكون متأكده منها ..
شنسوي يا جماعه لكويت زغيره وكلنا عيال قريه...وهدفي الاساسي مو اتعرف على الناس برا هالعالم من جذي ما اعرفهم بنفسي ...
خلنا من هالسالفه اللي مادري شلون قايله
اتصدقون
ذاك اليوم قاعده اهذر مع صديقتي وبنت خالتي امويضي -يعني موضي-عاد وكانت هذرتنا سوالف حريم تذكرين فلانه يوم خطبتج حق ولدها وتذكرين فلان اللي قال تنورة بنتكم ظيجه وتعال يا ظحك ...
طبعا امويضي كانت متزيبقه عالريل ولو ما تزوجت لي الحين جان انقلبت ريال عاد من عرض الحجي الله يسلمنا وياكم (امويضي الحين متيوزه ومستقره ولله الحمد وعندها كوكش)وانا دايم اسميها الام المثاليه -طل بعين عدوها- المهم يبنا طاري وحده من اهلج يا امويضي -من اهل ابوها-ناعتتها-مرشحتها- حق ناس(اصيلين) المهم وبنفس الوقت دقوا ناس يخطبونها -زوجها الحالي-وكانوا مو اصيلين ..وصارت سالفة طويله عريضه وآخر شي امويضي وافقت على الثاني ..والكل قال لها يا مينونه شلون تخلين الاولي(الاصيل)وتروحين تاخذين مو اصيل ومادري شنهو....اهي كانت مو مرتاحه من الاولي ....سبحانك يا رب وتم الزواج ...والكل لامها بذيج الحزه الي مضت واندثرت
الحين انا ليش قاعده اقول هالسالفه ؟؟؟؟؟؟؟
من بين هذرتنا جان تقولي تدرين ان الأولي (الاصيل)توفى ...قلت لها ويييييي الحمدالله ما خذيته جان ترملتي صغيره...جان تقولي تصدقين عتوج شتوفى فيه ؟؟؟؟؟؟!!!!!!!!!!!!!؟؟؟
قلت لها شنهو..عسى مو حادث؟؟؟
جان تقولي :لأ ...جرعه زايده
قلت: غبراااااااااااااااااااااااااااااااااااااااااااااااااااااااااااااااااااااا هذا اللي الكل قالج اشلون تهدينه عسى الله يرحمه ويغفرله
قعدت اقول بقلبي طبعا عشان ما اتشيحط علي سبحان الله الكل قال لها شلون تهدين الأولي وتاخذين الثاني ..والثاني ولله الحمد وعسى الله يتمم عليهم ..يحبها ويحب عياله و مومقصر عليهم امصلي امسمي ..وخايف الله فيها وفي عياله واهله واهله يحبونها وام محمد قالت وام محمد سوت وشايلينها من القاع ..سبحانك يا رب ...صج لا فضل لعربي على اعجمي ولا اسود على ابيض الا بالتقوى والعمل الصالح
يعني صحيح لو تفتح عمل الشيطان بس لو المنقوزه بنت خالتي ماخذه الأولي ..جان هقوتي الحين ....يالله سترك عدد ذكرك ...
جني قمت اتحلطم وايد
Labels: آراء, خبرات سابقه
posted by 3ateeja @ 1:12 AM
13 Comments:
سبحانك يا رب
احب كلمة "خيرة" سواء بالكلام او حزة المصايب
او بكل حزة و حتى بالشعر احبها هههههه
لا بس جد جد خيرة و الله ما حب يبتلي هالانسانة
:
أقولج شي يا عتيجة و هذا الشي اول مرة اقوله
في عالم الانترنت .. و الله على ما اقول شهيد
أمي يا عتيجة من اهل الله و فقيرة بدرجة
ما تتصورينهاإلى درجة اني احس ان اللي جدامي
طفل بس بشكل مرة عيوز
و في سالف الأزمان
ابوي لما تقدم لأمي يدّي ما كان راضي و حتى
بعد الزواج كان مو راضي إلى غاية ما توفاه الله
الشاهد يا عتيجة بتقولين اشلون هالمكسورة
وقفت جدام الكل و خذت ابوي ؟؟
في ليلة امي حلمت بالرسول عليه افضل
الصلاة و السلام و امي على النية
والله .. دخل عليها الغرفة و نورت الغرفة
و قال لها : تزوجي من "فلان" .. "فلان" أبني
و طلع .. و طفت الأنوار
و فعلا امي استجمعت قوة غريبة و قدرت تاخذه
من عقب .. أمي لازمها مرض مزمن يتناوب
عليها من فترة إلى فترة و إلى غاية ما توفى
ابوي .. مرض ما يتحمله و لا يصبر عليه اي
رجل على و جه الكرة الارضية
إلا واحد صبره صبر ايوب نفس ابوي
الكل انصحه على مر السنين .. اشلك بوحدة
تعبانة و مريضة .. خلها و شوف غيرها
لكن ابوي كان يرفض و راضي بالنصيب و لامنا
بعطفه و حنانه و صبره
اتصدقين .. و حتى مرات اقول لأمي
الله و رسوله عليه افضل الصلاة و السلام
يحبونج و يدرون لو كنتي ماخذة واحد غير ابوي
كان مصيرج شنو
خاصة انها فقيرة و محد دايم لها
للرب حكمة
و السلام عليكم و رحمة الله بركاته
السر بالأمان
:D
الخيرة فيما اختار الله
الله سبحانة يختار الاصلح حتى لو كان ظاهره غير ذلك
و عسى ان تكرهوا شيئا و هو خير لكم
و عسا ان تحبوا شيئا و هو شر لكم
و المؤمن يتررك الاختيار لله و يرضى
الله يخلي بنت خالتج و عايلتها و يخليكم حق بعض و يرزقهم و امة محمد
اللهم آمين
جني صرت عيوزة على هالدعاوي كلا منج عتيجة
صج الخيره فيما اختاره الله
و فعلا دروس دروس و هم محد يعتبر
الحمد لله الذي وفقها في الزوج الطيب، أتم الله عليهم السعادةويا حلو سوالفج
:)
والله هالسوالف يا عتيجة نصيب ما فيها اصيل ما اصيل
الاخلاق والتربية تعتمد على امور مكتسبة وليست بالاصل
وسبحان الله البنت طيبة والله رزقها واحد طيب مثلها
وعسى الله يرحم الناس
بعدين الله يعافيج شوى كتبى كويتى سهل
زغيرة ؟؟؟؟؟
تنكتب
صغيرة ؟؟؟
قعدت ابقق عيونى بهالكلمة اقول من صجها هذى
اذا عندج تمر وقهوة عربية ترى ودى اشرب عندج يالله فرشوا المدة :P
نصيــب
والله يحفظها لعيالها
:
بالنسبة للبلوقرز
تفكيرج مثل تفكيري
:)
!!سبحان الله
بهالسوالف فجأة تخافين من قوله اي او لا
والاستخاره سبحان الله تريح
لانج سلمتي أمرج حق الرحيم اللي اهو اعلم بالخير لج وبالغيب سبحانه
يزاج الله خير على هالبوست العجيب
يخلي الواحد يزيد يقينه بالخيره
:)
سبحان الله خيره
سبحان الله
:)
الناس تتكلم بعدين تسكت ..لكن منو اللي بيعايش الوضع ..
الشخص نفسه صاحب الموقف
اهو يقدر يصلح او ما يصلح
والاستخاره بعدها راحة :)
الله حفظها..والا جان البنت رايحة فيها هى وعيالها..والله شى عجيب...
الواحد مايدرى وين مصلحته :)
حلو البلوق اول مرة ازوره :)
عجبنى البوست مال السيارة الى وقفت عليج برمضان
:)
عندى سؤال
شعلاقة البوست هذا بالشاذى الى حاطه صورته..؟
طائر:
سبحان الله ........"خيره" يا وخيي
دايفر:
مبطي ..:)
كرييتف:
اهم شي انت اعتبرت ولا لأ؟
وايت وينق:
تسلمين
كيتي:
دهنيه فازلين
مشمش:
شتبي بعد نزلت بوست فصيح...وترى فرشت لبساط حياك
موكليت كيك:
خو انا مينونه خالصه نطري علي جم شهر تلاقيني بالاعصاب
استكانه التكانه:
ديري بالج على يقينج...قضبيه عدل
نسكافيه:
:)
الاثير:
نعم نعم
يوكن:
تسلم وحياك الله
واهوه في علاقه بس مادري بالظبط شنهي :)
Post a Comment
<< Home