taged By non

نون دزتلي هالتاق الحلو

خمس أشياء لا يعرفها احد عن شخصيتي ..؟؟

عندي اكثر من خمس اشياء لكن بالنسبه لشخصيتي مادري اعتقد تعرفوني زين بقولك خمس اشياء سويتها او كنت اسويها محد يتوقعها حتى ربعي

انا طقاقه!!!؟مره طقيت بعرس سعوديين بلكويت بدون ما يدري ابوي كنت بيرب الموهبه اشوه محد عرفنا لكن استفدنا شرف التجربه وما دل على فشل العرس

محد رقص

:(

جلاب و قطاوه

كنت اربي جلاب ايام المراهقه وعندي مجموعه لا يستهان

دوبر

رتولر

بوليسي

والباجي خلطه حلوه

الدوبر كان اسمه فهيم

والرتولر كان اسمه شوق

والبوليسي كانت جلبه اسمها بطه

والباجي وايد ماني ذاكرتهم

وكنت ايمع قطاوة الفريج لصغار اوكلهم و اشربهم لين يصيرون رياييل من ورى ابوي طبعا لين ما درى مره من اخوي النحيس وقالي ان شفت قطوه بالبيت يا ويلج ..... لأني كنت اربيهم بغرفه مهجوره بالملحق :( وبجيت بجيييييييييييييييييي لو احد متوفيلي ما بجيت هالكثر وهم قمت اباريهم من وراه اقعد على الرصيف بالقايله ومعاي بقايا غدانا اوكلهم اخر شي قام يسوي روحه ما يدري لأن ماكو مافيده هههههه

the love

دائما اعيش قصة حب مو شرط مع احد ...بيني وبين نفسي

قلمي

مدونتي

و حاليا اعيش قصة حب مينونه

;p

بو طبيع

اذا كرهت شغله اعاف كل شي يربطني فيها

كرهت الثانويه وقفت قيدي وداومت بثانويه ثانيه

كرهت كليتي ما داومت فيها وحولت كلية ثانيه

كرهت مطعم ما امر بالشارع اللي اهوه فيه

كرهت دوام طلعت منه ورحت مكان ثاني

لكني ما اكره شي الا اذا بسسسسسسسسسسسس

خلالالالالالالالالالالالالاص

وصل السيل الزبى

وقيييييييييييس على ذلك

اسنان

ما اوااااااااااااااطن طبيب الاسنان لياليوم وظروسي بتطيح وليالحين ما رحت

سياسه

كنت مندوبته الانتخابات اللي طافت وشكلي فقرته طلع الثالث عقب اخر صندوق ماعليه بوعبدالله خيرها بغيرها

مدمنة سدوكو

احب السدوكووووووووووووووو وايد

شرااااااااااااااااااااااااااااااااااااااااايكم؟؟؟؟؟؟؟؟؟؟؟؟؟؟؟؟؟

حواي

قرائاتي الليله كثيره والله ودائما الانسان اذا ما لقى شي يكتبه ما يكتب احسن له ولا يكتب لمجرد الكتابه مثل اصحاب العواميد بالصحف اللي لالالالالالالالالالازم يكتب يومي ولا ما يكتب ... من جذي الكثير منهم يطيح بأخطاء بعكس اللي يكتب عند الحاجه .. مو لمجرد ملئ فراغ شاغر .... لمراد ...كلن بعقله راضي وماني افضل الناس بالنهايه ...
خلونا بقرائاتي الليله قبل المنام ...
الله سبحانه مبتليني بالقرائه ... وفعلا فعلا اذا مر علي شهر ما قريت فيه كتاب عالاقل احس اني بتراجع ومن اكثر المواضيع اللي ابحرت فيها الطب البديل والعلاجات الشعبيه وصارلي موقف حلو .....

كان عندي زميله جهراويه امها معاها خشونه ... ووصفت لها وصفه طبعا مو من مخباتي ولكنها وضفه متداوله في الجيك والام تحسنت حالتها او طابت ما اذكر بالظبط لأن السالفه قديمه ودقت علي امها وقالتلي اللي تامرين فيه انا حاضره

قلت لها ابي بيت مساحته الف متر على ثلاث شوارع ... هههههههه

اتغشمر معاكم ... قلت لها ابي دعائج ...جكككك بوووم اهتميت اكثر بهالموضوع وزادت قرائتي اكثر و اكثر وقمت اضرب على كبير الى ان صرت بمنزلة الاستشاري للبعض من الاهل و الاصدقاء وغيرهم ....و البعض الاخر يعتبرني ماعندي سالفه .... الشافي الله ...وهو المعافي

ومن اسبوعين صديقتي قالتلي بطني اذاني كلا غازات ...وصفت لها العشرج ...لا ووديته لها وعينك ما تشوف الا النور ههههههههههههههه مسكينه قلت لها نقعيه ست ساعات بماي مغلي وشخليه وشربي قلاصين ...اهي نقعته 12 ساعه وشربت ثلاث قلاصات كوكتيل ههههههههههه الامور صارت هدادي .. الله بالخير عندها ...بس اهم شي انها طابت .....زين يالملقوفه ليش هالكثر....تبي تشوف المفعول دايركت ....بس تقول انها تشعر براحه عقبه ولله الحمد .... والله فجأه صرت حواي ... فعلا فعلا ...يعني صحيح شي يونس وبنفس الوقت مسؤوليه ...وساعات بعض الاوادم فيهم نقص صرت بالفطره احفظ الفواكه والخضار واللي يسمعني يقول اسكت .... فمن باب العلم ... اللي يبي شي او يسأل عن شي ترى انا بالشوفه .....لأ ما يجوز ان الانسان يكون عنده علم ويكبته. واخاف اموت ولا شي فأستفيدو مني قبل لا انقرض

....دمتم سالمين

الحواي عتيجه

حوار مع ابوي 2

ليال تسأل:الدرس اللي تعلمته من الحياة وما راح تنساه ؟؟؟شي من علي ايامكم تفتقده الحين ؟؟

ان الانسان ما يشتغل شغله ما يحبها لأني هاد التدريس من 21سنه اذا مو اكثر لي الحين اييني ياثوم -كابوس-موذي اني داش الحصه ومومحضر ولا قعدت من النوم استااااااااااااااانس واقول اشوه انه حلم ,واللي افقده هليام البساطه

وايت وينق:اسئليه الله يطول عمره اشرايه بالكمبيوتر والثورة الالكترونية؟

ما اثق فيها ودايم لا قفلت السياره بالريموت ارجع اتأكد انقفل الباب ولا بعد ...اتخيل دايم لو تنقطع الكهربا او تطفي فجأه بس شحادك يالمسمار قال المطرقه

ولد لكويت:أفضل مكان كان يروح له و يحس انه ترد له الروح إذا كان في مشكلة في البيت !؟

عمري ما انحشت من بيتي اذا في مشكله دايم ارجع بيتي-اذاكان خارج البيت- اواجهها واحلها واذا كنت مهموم اقط همي بحضن محمد-رفيجه-دايم اشوفه بالبر

الماس:سإليه: ليش حب ألحين مو مثل حب قبل؟؟؟؟

لأن الماده دشت بالموضوع وقبل كلنا فقارى محد احسن من احد الزين منا عنده دكان بسوق لسلاح وكلنا عيال قريه وكلن يعرف اخيه اضافه لأن الحب قبل هدفه الزواج مو الجمبزه و الفضاوه

جنون احساس:شرايك في بنات هالوقت, ينفعون يكونونأمهات؟

والله بناتنا ماكو احسن منهم الا فئه قليله جدا وهي السذج وفعلا الريال اللي ياخذ من برا الديره غبي لأني ما شفت ريال خذى من برا الا وتوهق ,ثقافه وتعليم وجمال ونظافهوسنع ومنع وكلن له عيوبه وشدعوا عاد عيالنا امسمسمين قبل كانوا اهم بحاجه لنا الحين احنا بحاجه لهم وبنات هالوقت كأمهات احسن من بنات قبل بس قبل لا تضمها اسئل عن امها

برااك:شرايك بكتابات بنتك ؟

ما قريتلها ...لكن هقوتي انها احسن من اللي اشين منها ...سمعت لها بعض الزهيريات واستانست

سلوقا:شنو الفرق بين أيام السبعينات وأيامنا الحين؟

بالسبعينات كنا كويتيين والحين صرنا مصاروه

الخاطر:شرايك بالشاعر زيد بن حرب؟

ما اعرفه

سالفة قلب:من مِن الشعراء يستمتع بالقراءه له؟

صقر الشبيب,فهد العسكر,احمد شوقي,فهد بورسلي,خالد الفيصل....والله وايد

احلى انجنير:اكثر شي صعقك بكويت اليوم يعني شي مهوول ما هقيته من اهلها من حكامها من ايا كان .. بس ما كان واضح جلي .. انما يااااا على غفلة اذا مو غدر؟

المجلس الوطني بط جبدي ذيج الايام وعقبه على طول صارموقف الغزو شلون صار وشلون ما اتخذوا الحذر وكنت متوقع الغزوو والشي اللي ماهقيته يصير ضعف موقفهم من اللي كانوا يبون يسوون انقلاب بالثمانينات وبو عبدالعزيز يعرف السالفه كلها احسن مني (احمدالسعدون)ا

نصيحه للشباب ؟

كل ما كبرت المره زادت فرص الاسقرار ولاتدلل المره قبل لا تبخصها

نصيحه للبنات؟

عن الطفاقه وتزوجي عقب ما تشتغلين

نصيحه للحريم؟

المره السنعه ما تهد بيتها الا اذا كانت جد بايعه

نصيحه للرياييل؟

خير متاع بالدنيا المرأه الصالحه

الجماعه اللي طلبوا شيء من الشعر....ان شا الله في البوست القادم اشكر تواصلكم

حوار مع ابوي

تاق مع الوالد

اشرايك بالحب؟
احسن من الزقاير
اشرايك بالصداقه؟
بين الاهل اذيه ومع الغرب تشره
تؤمن بالحوبه؟
جدا وخاصه من الحريم
شرايك بالاولاد؟
مادري ليش يفرحون فيهم...
شرايك بالبنات؟
ملح البيت والبيت اللي ما فيه بنات يأجرونلهم
شرايك بأم كلثوم؟
ذوق كبار
وعبدالحليم؟
ذوق الكل
وعبدالوهاب؟
ذوق محدود لكنه مؤدي
منو تحب من الاصوات الحاليه؟
احلام صوت واداء ومقامات, محمد المسباح بس صوته تغير يوم غنى الفريه,رويشد اداءه غير عادي,وميحد حمد اعتبره بعد عبدالحليم بجمال الصوت على طول
منو المطرب اللي عندك كل اشرطته؟
فيروز...سابقا
اكثر فن شدك؟
السامري
شرايك بالزواج؟
بدايته صعبه لكنه يحلي ايام المتقاعد .
شرايك بالتقاعد؟
موت
شرايك بالبحر؟
يثير الاعصاب
والبر؟
هدوووووء
والمباركيه؟
سوق المتقاعدين
اكثر قرار تحسف عليه؟
اني ما درست طب
واحلى قرار اتخذته؟
انتقالي لبيتي الحالي
حبيت من قبل؟
يالخبيثه...ماحبيت كثر امج
ناس دايم تحلم فيهم؟
امي وابوي
طاري يبجيك؟
قصيدتي بأمي
عندك مشكله بالبجي؟
لا ابدا ...ومعروف اكثر واحد ابجي عقب الدفان بالمقبره
طاري يضحكك؟
قصيدتي بأول حفيده
ليش؟
لأن ماعجبتها وقالتلي بالحرف تييب اليهد وغيرت جم شطر فيها عشان ما تزعل
ليش كتبت بالناس كلهم قصايد الا انا؟
لأنج احلى قصيده

شنهي اسباب الطلاق حاليا؟
الريال ما يعرف للمره
وشرايك بالجيل الحالي؟
فيهم الخير كلهم والله
يقولون انهم امدللين؟
ولا مدللين ولا شي محد مدلل كثرنا حتى اللي ما عنده شهاده يلاقي احسن الوظايف بس خبرج الاولي لاعب والتالي تاعب
انسان كان ودك تقعد معاه اكثر؟
الوالد
انسان تحسفت انك ما شفته؟
رفيجي حمد قبل لا يتوفى وكتبت فيه مرثيه حمد

للقاء بقيه

اللي يحب يوجه اي سؤال للوالد ترى حاضرين

اعتراف واسف

من الصعب على الانسان ان يعترف بأخطائه ...ولكن من الافضل له ...فلم اكون عتيجه حتى اسخر من
شكل
لبس
خلقة رب العالمين
وانا شخصيه غير معرفه بأل من خلال مدونتي ...فقد ارفقت خبر وصوره .....وكنت انتظر مجموعه تعليقات تخص الخبر والصوره جاهلة اننا مجتمع بصري يدقق بالصوره وينسى الخبر
بالاضافه الى اننا كويتيين ....يعني (مايصير ما انتطنز)اعلم انني اخطأت في ايصال الفكره وانا آسفه جدا
واعترف اني لم اوفق في ايصال المعلومه

الا لمدون واحد

تعرفواعليه

اسأل مجرب 2

اسأل مجرب

ولا تسأل طبيب
..هي عصارة تجارب قديمه ويديده معاها نصائح اكتبها لكم بين فتره والثانيه..مختصه في جميع مجالات الحياة وهي غالبا موجهه للكويتيين ..لأني كويتيه وما اقدر اتحجى عن مجتمع ثاني ما عشت فيه ..اتمنى انكم تستفيدون منها ..وواللي يستفيد منها اتمنى ان يقولي حتى لو بعد فتره ..علشان استانس واحس اني سويت شي مفيد للمجتمع البلوقي

(بعد ان انتهيت من اسئل مجرب الدوامات سأكتب اسأل مجرب للنساء فقط)

1- ديري بالج

اذا وثق فيج ريال وخلاج تكرفين له ..فتأكدي انه محتاجج وما ان يلاقي غيرج من الرجال حتى يستغنى عنج

2- تأكدي

اذا في ريال يحفر لج عند ريال ..فبالنهايه راح يصدقه

3- امر بديهي

اذا كنتي على علاقة بريال وقام يمدحج ...فهذا انذار مبكر بعدم الزواج منج

4- روح بعيد ..وتعال سالم

تبعدي عن راي اسرتج عن اي ابداعات خاصه فيج (شعر -قصه-بلوق-صحافه-هوايه)وخلج واثقه ان كل امرأه عربيه مبدعه كانت معاناتها الأولى من اسرتها

5- عنصريه

اقري الدستور لكويتي عشرين مره ومارسي حقوقج على اساسه مو على اساس ما تقدرين

6- هلاقه

اذا كنت تردين على كل اتهام ينسب لج راح تكونين هيلقيه ...ولكن كوني هيلقيه

7-بالخط العريض

قولي انا امرأه ...واستطيع فعل كل شي ..اذا اردت

8-نحاسه

اذا شفتي مره تقول انا ما احب مجتمع الحريم ..فهي اول وحده راح اتنحيس معاج وهي اول وحده تطبق العيوب اللي اتحجى عنها بمجتمع الحريم

9- لزقة عنزروت

اذا شفتي واحد لازق فيج لزقه ..ترى مو معجب فيج ..يبي يتصيييد عليج

10- شغل مضبوط

اجعلي ثقتج بنفسج هي مفتاح نجاحج ولا تجعلين الاخرين يمنحوج هذه الثقه

11-جرح

اذا كان عندج مبادئ مو عند الريال فسوف يوجهلج جرح في هذه المبادئ

12-شكوى

اذا شكى الريال من احد جدامج ..فتأكدي ان هدفه ليست الشكوى

13- ماينعطى ويه

اذا اعجب فيج الريال لفتره وماعطيتيه ويه ..راح يظل معجب فيج..واذا عطيته ويه راح يروح لغيرج... وهلم جرا

14-الحقراان

اذا تحرش فيج واحد حقريه ..عشان يعرف انه صغير

15-الغضب

اذا بدى الريال يحاسبج ..معناته انه غضبان منج

16-المعامله

اذا كسر خاطرج ريال وحاولتي تعاملينه معامله خاصه ...فبيغدر فيج لامحاله..عامليه عادي

17- الطلاق

اذا ياج ريال مطلق مرتين او اكثر ..فغالبا ما يكون العيب فيه..لأن المره سهله مو صعبه

18- معصب

اذا كان الريال معصب حقريه ...ولاتسألينه شفيك ترى بيعصب زياده

19- الزواج

اذا حبج ريال لاتييبيله طاري الزواج ..بل ابرزيله مواضع ثقتج بنفسج ..واذا يبيج بياخذج

20-دزي مسج

اذا زعل عليج ريال ..راضيه بس مو وجها لوجه لأن غالبا راح يثير موضوع الزعل مره ثانيه وتصير زعله ثانيه

21-متغير

اذا تغير عليج ريال ..فالسبب هو ريال

22-دايما غلط

اذا طلعتي اللي بقلبج حق ريال فراح يغلطج واذا طلعتي حق مره فهم راح تغلطج ..

(طبعا هذا ليس وضع عام ..ولكن اسئل امجرب)

حكمتي ..على قدي

"عندما تشعر بطرقة حب خفيفه على باب قلبك فتظاهر بعدم سماعها ...وانتظر الاقوى"

"عندما تريد معرفة اعجاب الناس بك...فأكتشفها في عيون المراهق"

"عندما تحب عتيجه فأيقن انها تحبك"

"قد لا اكون مقتنعه..ولكني سأنفذ"

"يكذب الانسان في صمت ..حين يفقد الثقه"

"يلتمس المسلم اكثر من سبعين عذر ...اذا كان واثق ...ولا يلتمس نصف عذر اذا فقد الثقه"

اخيرا وليس اخرا ..هي عبارات رددتها بيني وبين نفسي ..تعكس حالاتي التي امر بها ..ولدي منها الكثير واجملهن "قد يكفي المرء معرفة حقيقة نفسه ان لم يعرف حقيقة من امامه"

الأصيل!!!

سبحان الله الواحد يفتح صفحة البوست ويكون على باله جم شغله يكتبهم يقوم ويكتب شغلات ثانيه ..صار في ارتباط وثيق بيني وبين ربعي البلوقريين والبلوقريات ..الى درجة اني بعض الاحيان اشك لما اشوف تصرفات من شخص يمي بالقهوه او جدامي عند المحاسب او غيرها ...وخاصه بعد المصادفات اللي ما افصح عنها واكون متأكده منها ..

شنسوي يا جماعه لكويت زغيره وكلنا عيال قريه...وهدفي الاساسي مو اتعرف على الناس برا هالعالم من جذي ما اعرفهم بنفسي ...

خلنا من هالسالفه اللي مادري شلون قايله

اتصدقون

ذاك اليوم قاعده اهذر مع صديقتي وبنت خالتي امويضي -يعني موضي-عاد وكانت هذرتنا سوالف حريم تذكرين فلانه يوم خطبتج حق ولدها وتذكرين فلان اللي قال تنورة بنتكم ظيجه وتعال يا ظحك ...

طبعا امويضي كانت متزيبقه عالريل ولو ما تزوجت لي الحين جان انقلبت ريال عاد من عرض الحجي الله يسلمنا وياكم (امويضي الحين متيوزه ومستقره ولله الحمد وعندها كوكش)وانا دايم اسميها الام المثاليه -طل بعين عدوها- المهم يبنا طاري وحده من اهلج يا امويضي -من اهل ابوها-ناعتتها-مرشحتها- حق ناس(اصيلين) المهم وبنفس الوقت دقوا ناس يخطبونها -زوجها الحالي-وكانوا مو اصيلين ..وصارت سالفة طويله عريضه وآخر شي امويضي وافقت على الثاني ..والكل قال لها يا مينونه شلون تخلين الاولي(الاصيل)وتروحين تاخذين مو اصيل ومادري شنهو....اهي كانت مو مرتاحه من الاولي ....سبحانك يا رب وتم الزواج ...والكل لامها بذيج الحزه الي مضت واندثرت

الحين انا ليش قاعده اقول هالسالفه ؟؟؟؟؟؟؟

من بين هذرتنا جان تقولي تدرين ان الأولي (الاصيل)توفى ...قلت لها ويييييي الحمدالله ما خذيته جان ترملتي صغيره...جان تقولي تصدقين عتوج شتوفى فيه ؟؟؟؟؟؟!!!!!!!!!!!!!؟؟؟

قلت لها شنهو..عسى مو حادث؟؟؟

جان تقولي :لأ ...جرعه زايده

قلت: غبراااااااااااااااااااااااااااااااااااااااااااااااااااااااااااااااااااااا هذا اللي الكل قالج اشلون تهدينه عسى الله يرحمه ويغفرله

قعدت اقول بقلبي طبعا عشان ما اتشيحط علي سبحان الله الكل قال لها شلون تهدين الأولي وتاخذين الثاني ..والثاني ولله الحمد وعسى الله يتمم عليهم ..يحبها ويحب عياله و مومقصر عليهم امصلي امسمي ..وخايف الله فيها وفي عياله واهله واهله يحبونها وام محمد قالت وام محمد سوت وشايلينها من القاع ..سبحانك يا رب ...صج لا فضل لعربي على اعجمي ولا اسود على ابيض الا بالتقوى والعمل الصالح

يعني صحيح لو تفتح عمل الشيطان بس لو المنقوزه بنت خالتي ماخذه الأولي ..جان هقوتي الحين ....يالله سترك عدد ذكرك ...

جني قمت اتحلطم وايد

اسأل مجرب

اسئل امجرب ...ولا تسأل طبيب

..هي عصارة تجارب قديمه ويديده معاها نصائح اكتبها لكم بين فتره والثانيه..مختصه في جميع مجالات الحياة وهي غالبا موجهه للكويتيين ..لأني كويتيه وما اقدر اتحجى عن مجتمع ثاني ما عشت فيه ..اتمنى انكم تستفيدون منها ..وواللي يستفيد منها اتمنى ان يقولي حتى لو بعد فتره ..علشان استانس واحس اني سويت شي مفيد للمجتمع البلوقي

1- دير بالك

اذا ياك آدمي وقالك انا مظلوم انا سويت لفلان ونكرني وسويت لعلان ومادري شسوالي ..فتأكد انك راح تنظاف من ظمن لستته اللي بيقولها لآدمي غيرك

(من حجى لك حجى فيك)

2-تأكد

اذا كنت انسان نشيط وانظميت لأداره دايخه والمدير قالك انت الكل بالكل ..تأكد ان بعد فترة راح اتغيير معاملته معاك وبيقول عنك

(علمناهم عالطراره اسبوقونا عالبيبان)

3- امر بديهي

اذا كنت انسان اكاديمي يديد وتعمل في مجال شهادتك واللي داير مدارك مو اكاديميين في المجال فسو روحك عبيط

وما تفهم شي او..قول حق نفسك ..فمان الله واقضب الباب

4- روح بعيد وتعال سالم

اذا صار حولك كلا كويتيين ..دورلك واحد مو كويتي واضرب معاه صحبه..والله اريح وياحبذا اذا كان سوري

5- عنصريه

اذا نسيت انت تنتمي لشنو(حضري -بدوي-شيعي-سني ...الخ) ترى الناس راح اتذكر ..ويعاملونك على هالاساس تبعا لمثل اللي مو على دينك ما يعيينك

6- هلاقه

اذا كان كلامك عتيج ..ودايم تحذف لهاميد ..غيره فورا ..لأنك جذي راح تكون اما دفش او هيلقي

صج اللي ما يعرف الصقر ....

يسويه كنتاكي

7- بالخط العريض

لاتصير حليووو وايد ..

8- نحاسه

كلا قول ما اقدر ..او افكر بالموضوع

9-لزقة عنزروت

دبس الناس تدبس بالشغل لأن الناس ما تحب تشتغل

10- شغل مظبوط

كل شي تسويه اكتبه بورقه وكل شي تطلبه خلا بكتاب رسمي ..لأن النكران ميزه متأصله وعلى قولة القايل الآدمي يموت ولورقه ما تموت

11- يرحمك الله

اذا بينكم زميل ..صديق..ولد يران المدير ..تأكد انك اذا عطست المدير بيقولك يرحمك الله وتأكد دائما ان جلب المدير

مدير

12- لايوقف شغلك

اذا عندك قسم علاقات عامه لاتعطي مندوبهم شي لأن بيقطه بأقرب زباله عزكم الله ..وبالتالي ماراح يوصل شغلك

اي

(اشتغل مندوب)

13- الهندي

كل هندي بالاداره يفهم كل شي بالاداره ...يعني توجه للهندي دايركت احسن لك من فلان وعلان

14-عطني اذنك

لاتقول لحد.

.

.

.

.

ان عندك بلوق ...

(فكرة ديكور البوست هذا ..مؤخوذه من جاي حليب ..:)