حوار مع ابوي
تاق مع الوالد
اشرايك بالحب؟
احسن من الزقاير
اشرايك بالصداقه؟
بين الاهل اذيه ومع الغرب تشره
تؤمن بالحوبه؟
جدا وخاصه من الحريم
شرايك بالاولاد؟
مادري ليش يفرحون فيهم...
شرايك بالبنات؟
ملح البيت والبيت اللي ما فيه بنات يأجرونلهم
شرايك بأم كلثوم؟
ذوق كبار
وعبدالحليم؟
ذوق الكل
وعبدالوهاب؟
ذوق محدود لكنه مؤدي
منو تحب من الاصوات الحاليه؟
احلام صوت واداء ومقامات, محمد المسباح بس صوته تغير يوم غنى الفريه,رويشد اداءه غير عادي,وميحد حمد اعتبره بعد عبدالحليم بجمال الصوت على طول
منو المطرب اللي عندك كل اشرطته؟
فيروز...سابقا
اكثر فن شدك؟
السامري
شرايك بالزواج؟
بدايته صعبه لكنه يحلي ايام المتقاعد .
شرايك بالتقاعد؟
موت
شرايك بالبحر؟
يثير الاعصاب
والبر؟
هدوووووء
والمباركيه؟
سوق المتقاعدين
اكثر قرار تحسف عليه؟
اني ما درست طب
واحلى قرار اتخذته؟
انتقالي لبيتي الحالي
حبيت من قبل؟
يالخبيثه...ماحبيت كثر امج
ناس دايم تحلم فيهم؟
امي وابوي
طاري يبجيك؟
قصيدتي بأمي
عندك مشكله بالبجي؟
لا ابدا ...ومعروف اكثر واحد ابجي عقب الدفان بالمقبره
طاري يضحكك؟
قصيدتي بأول حفيده
ليش؟
لأن ماعجبتها وقالتلي بالحرف تييب اليهد وغيرت جم شطر فيها عشان ما تزعل
ليش كتبت بالناس كلهم قصايد الا انا؟
لأنج احلى قصيده
شنهي اسباب الطلاق حاليا؟
الريال ما يعرف للمره
وشرايك بالجيل الحالي؟
فيهم الخير كلهم والله
يقولون انهم امدللين؟
ولا مدللين ولا شي محد مدلل كثرنا حتى اللي ما عنده شهاده يلاقي احسن الوظايف بس خبرج الاولي لاعب والتالي تاعب
انسان كان ودك تقعد معاه اكثر؟
الوالد
انسان تحسفت انك ما شفته؟
رفيجي حمد قبل لا يتوفى وكتبت فيه مرثيه حمد
للقاء بقيه
اللي يحب يوجه اي سؤال للوالد ترى حاضرين
Labels: آراء, خبرات سابقه, قديمك نديمك, كوميديا
posted by 3ateeja @ 5:07 AM
34 Comments:
شرايك بالصداقه؟
بين الاهل اذيه ومع الغرب تشره
صدق والله صدق
سؤال للوالد الله يحفظه
الدرس اللي تعلمته من الحياة وما راح تنساه ؟؟؟
شي من علي ايامكم تفتقده الحين ؟؟
وسلامتكم
اسئليه الله يطول عمره اشرايه بالكمبيوتر والثورة الالكترونية؟
خفة دم الله يخليه لكم
الله يحفظ لج الوالد .. و يطول بعمره ..
سؤال تكتيكي ..
أفضل مكان كان يروح له و يحس انه ترد له الروح إذا كان في مشكلة في البيت !؟
صباح العسـل
أول شي عسى الله لا يفرقكم
ويطول لكم بعمره
ثاني شي
اشرايك بالصداقه؟
بين الاهل اذيه ومع الغرب تشره
صاج صاج صاج
مشاء الله عليه حكيم
وأنا لو منج أطالب بحقوقي وأخليه يكتب فيني ديوان شعر كامل مو بس قصيده
والله يخليه لكم انشاء الله :)
عفية سإليلياه الله يخليلك إياه ذخر انشالله
سإليه: ليش حب ألحين مو مثل حب قبل؟؟؟؟
فكرة البوست حلوة
انا مريت وقريت
بس باعلق انشاء الله باجر
لان اليوم راسى يعورنى حدى
وحالتى حالة
وشكلى معصب بس مو معصب
المهم
الله يحفظه ويخليه ويطول بعمره بالخير
فمان الله
ليال :
ان شا الله يرد عليج بالبوست الياي ...وولكم باك :)
وايت وينقز :
الله يسلمج ...وصل سؤالج ان شا الله
ولد لكويت :
ويحفظ غاليك ...تجد الاجابه بالبوست الياي ان شا الله
لافندر:
تسلمين ما قصرتي ...بس انتي شوفي الرد الديبلوماسي اللي جعمني ما في مجال اطالب بحقوقي بعد
الماس :
تسلمين من ذوقج ...هالسؤال بالذات اذا سألته بيسولف وايد ...ههههه اعرفه بس ولا يهمج
مش مش:
يه يه يه
why the moon is saad ??
هذي ترجمه قريتها حق فلم مصري باقناة المصريه
يبا افا عليك ناخذ حليمه وانقطعها ونسويها بفك بولند ...
بيعنا بالسوق
ما اعبر
طارت النومة من عينى ياعتووج
على هالججى :)))
افاااااااا عليك
البلوقرز للبلوقرز والكل لله
ونص الالف
500 ؛)
كثير حلو و ممتع و دمه خفيف
مو سؤال بس ممكن يكون طلب
:)
ممكن تنشرين بعد موافقته طبعا بعض قصايده
أو خواطره اللي كاتبها
ترى الكلمة اللي تطلع من لسان عود غير
حيل خير
يطول لج بعمره ان شالله
=) انسان بسيط
وصااااج والله صااج يوم قال انهم اهما المدلعين مو احنا, لا وظايف وعشان ايدشون الجامعه ييب مادري جم
سأليه هالسؤال:
شرايك في بنات هالوقت, ينفعون يكونون
أمهات؟
وسلامتكم وتعيشون :)
الله يطول بعمر الوالد
ودي اسإله سؤال
شرايك بكتابات بنتك ؟
عتوج ..
اثاري هذا الشبل من ذاك الاسد ..
ماشاء الله امتعنا كما امتعتينا كل مره ..
ربي يبارك لكم فيه ويحفظه ..
الله يعطيه ويعطيكم طولة العمر
إن شاء الله
سؤال
شنو الفرق بين أيام السبعينات
وأيامنا الحين
؟
ودمتم بحب وود
اللي ماله أوّل ماله تالي
سلامي للوالد الحبيب
فرحت لمّا عرفت انه شاعر
يعني انا معاه أولاد كااار
:)
ابي اعرف رايه بالشاعر
زيد بن حرب
وياليت يعطينا بيتين عن الكويت
وتعيشين ,, وعلى فكره
انا مو الخطير !! انا الخاطر
للتنويه فقط
طاب يومج
الله يخليلج الوالد ويطول بعمره
ولايحرمج منه
سؤالي :
من مِن الشعراء يستمتع بالقراءه له؟
yaaaaaay
عسووول .. الله يحفظه و يعافيه
:)
سلمي عليه سلام كثير
قولي له معزوووم على معرض تخرجي
(عساني اتخرج )
والتاريخ ينوه عنه تاااالي ان شالله
;Pp
و اني احب بنته لله فلله
( اللي اهيا انتي )
و الحين يوووم انك طلعت ابوها
حبيتها .. زوووووود
و اوافقه .. احسن من الزقاااير
لو ابوي جان قال : اذا خذيته بعد الأكل مو شي كلش
;Pp
الله يوسع صدرج دنيا و اخرة على هالفنتق
:**
بس في ملحووظة
الزواج يحلى مع التقاعد
و التقاعد موووت
!
اممم .. يعني الزواج اهون من الموت بدرجة
!!
ما ادري يوعانة ماني قادرة اربط
;Pp
اي اي اي نسيت
السؤال : اكثر شي صعقك بكويت اليوم
يعني شي مهوول ما هقيته من اهلها من حكامها من ايا كان .. بس ما كان واضح جلي .. انما يااااا على غفلة اذا مو غدر
:D
السلام عليكم
مليت من الدراسة قلت اسوي جولة بالبلوقات اشوي
صج غيرتي علي جو بالبوست صراحة استمتعت بالحوار
الله يخليليج الوالد و الوالدة ان شاء الله
طائر:
تسلم يا طاير ...وان شا الله بالبوست الياي ...:)
جنون احساس:
اي والله خنتي حيلي حيلنا كلا طابين فينا هلكبار :(
برااك:
ووالديك اذا كانوا عايشين ويرحمهم اذا كانوا متوفين :)
افياء:
تسلمين حبيبتي من ذوقج الرفيع :)
سلوقا:
اجمعين ووالديك على صحه وعمه وعافيه :)
الخاطر:
يا حياك الله لبلوق بلوقك :) ماقصرت
سالفة قبل:
ويخلي لج غاليج بنعمه :)
احلى انجنير:
لوووووووول جمبازيه
حبيبتيييييي والله
يحلي النهايه ياء مو ألف مقصوره يعني مثل يحلي عقب الغدا هالشكل ههههههه
توقعتج بتنتبهين على سالفة الزقاير ...لأن عندج نفس النمونه ادري سكتي طب فيني خوش طبه واجوبه ديبلوماسيه ولا تساحليني واااايد ترى الوالد ما يفكر يتزوج لا على الوالده ولا عقبها بعد عمر طويل
لول
دكتوره كويتيه:
عسىىى دوووووووووووم بلوقي مصدر ابتسامه لج ...بس عاد ظبطينا عقب التخرج تدري بعد الصحه خاربه خاربه ..يعني جان عندنا تقارير شي تدرين بعد البلوقرز للبلوقرز والكل بالله
؛)
طلعتي مو هينه عاد مالقيتي الا الوالد الله يحفظه لج ويعطيه طولت العمر عشان تفضحين اسراره
عموما بما اني تربيت شياب وناس كبار انا احب هالسولف وخصوصا اذا طلعت مع الوالد بروحنا استغل الوقت والموقف عشان اسأله وهو بصراحه قلبه كبير مثل قلب ابوج يرد من دون تردد
حلوه الفكره ويعطيج العافيه عليها
تسلمين يا مينونه عالمتابعه :)
Post a Comment
<< Home