من مذكرات واحد ما يطيع الحجي 2

قالتلي ....عزيز اتغيشم ولا ماتدري ان فطومه شيعيه ....بلعت الصدمه حزتها وقلت لها يعني شنو ؟؟
قالتلي رنا:عزيز تستعبط ماتدري يعني شنو اهي شيعيه وانت سني؟؟؟!!!!؟
ارد عليها...شفيج يا رنا سويتيها سالفه طول هلسبوع بس علشان تقولين لي انها شيعيه جان قلتي لي من زمان ...عادي ...تدرين احنا بالوسط ما عندنا مشكله - من الصدمه قمت اخوره وانا ادري اني اخوره - وكملت:..شيعه سنه عيم بدو حضر اصيلين ..وانا اتحجى جان تقولي رنا :عزيـــــــــــز تكفى ...اطلع من جو الوسط شوي.....افهم يا ريال
ارد عليها: رنا هذي المبادئ اللي نمشي عليها ...كلنا كويتيين وخلاص
رنا:عزيز ابوي انت...افهم شوي..كلنا كويتيين هذا شي اكيد ما اختلفنا ..شيعة ولا سنه ...نجاورهم انرافجهم ..اننام وناكل عندهم ...بس حزة الزواج كل واحد يرد لأصله ومذهبه .....تعتقد لو انا ابي اتزوج شيعي ابوي بيرضى...ولا ابوك بيرضى ...عزيز انت تحبها اوكي ...بس اتزوجها صعب ...صعب حيل...وافرض ركبت راسك وتزوجتها ..تحسب بتكون سعيد معاها....وايد امور مختلفه بينكم ...الحياة الزوجيه ..تختلف عن الزماله...اهي تدري انك تحبها ادري..مره كتبتلها بمذكرتها اللي متسلفها منها-هنيه ويهي صار برد صاروخ- .وتكمل رنا:..لكن اهي متوهقه ماتدري شلون تقولك انها بتزوج
طبعا حزتها تلقائي بلعت لساني الطويل...لأن كلام رنا مثل السوط اللي لسبني ...وقعدت افكر وافكر و افكر.....وزقاره ورى زقاره ....رحت ديوانية الوسط ...ودشيت ومعاي زقاره
سلمت وقعدت وكنت متروووس .....ياني احمدووو...قالي شفيك ...عرف اني متضايق وطلعنا بالسياره ....وفهمته كل اللي قالتلي اياه رنا ...هقيته بيوقف معاي ....جان يقولي : رنا معاها حق ...ولازم تشيل البنت من بالك ..وانت يالغشيم ...ماتدري ان فاطمه شيعيه ...
رديت عليه : وانا شدراني اسمها اربع اسامي ...ماكو عايله آخر شي ...شعرفني شالفرق ...عوايل الشيعه معروفه اما غير جذي مادري....
رد احمدوو عاد موال رنا : واضافلي شي ثاني مهم ...ان فاطمه وغير فاطمه...يشتغلون ويدرسون بهالطريقه لأنهم اقليه ...اما احنا ..ماعندنا غير لصراخ ...طنشت كلامه عالآخر ...حاول ينسيني وتمشينا ...ورديت الديوانيه خذيت سيارتي ورديت البيت وقعد افكر وافكر
وكنت امطلع رقم بيت اهل فاطمه من واحد اعرفه يشتغل بوزارة المواصلات ...كنت ادق واسده .....ساعات اهيه تشيله وساعات يشيله صبي والتليفون اببيتهم كلا مشغول بالليل......ادري عندها اخو من عمري يغازل ....وساعات ادق اطفره ....اسوي صوتي صوت بنيه واظحك ههههههههه وحمدالله والشكر ولا مره جكني اني ريال ...قعدت افكر وافكر وافكر .....
والفير دقيت الباب على امي ...وامي اتكلم مثل ابله عطيات ...لأنها مصريه ومن زمان ابوي ماخذها على مرته ام عياله بنت عايله مرموقه .....وبيني وبينكم كان ماخذ امي طربه يعني عشان يحر زوجته لأن امي كانت مدرسه بالمدرسه اللي زوجته ناظره فيها....وصارت الصجيه ويابتني ...وزوجته ما تعدلت يعني مافي مجال يطلق واحملت امي ويابت خواتي التوم .....وكان ابوي يطل علينا بلسبوع مره ووقته الباجي حق زوجته بنت الحموله ..اما امي يارها الله .....بنت العبده...بس ماكان مقصر ماديا وحاطلها بيت يسرح فيه الخيل...بس موجود حضرته
ردت علي امي ...فهمتها اني بتزوج ....ابتسمت ...امي وايد طيبه ومامنها شر ...قالتلي هذا منى عيني يا ابني .....بس انت لسه صغير...فهمتها ان الخير وايد وان انا باجيلي كورس واتخرج من الجامعه واشتغل... وانا صج كنت مشغول بالانتخابات بس كان معدلي زين لأني ادرس من قلب حزة الامتحان فقط ...قالتي انا موافقه بس خطوبه ...تقصد ملجه ....لأن بنات الناس مو لعبه ....فهمتها ان البنت شيعيه ...قالتلي ان ماعندها مشكله واهي كانت الاهم بالنسبه لي ....وقالتلي تفاهم مع ابوك وامي ما كان عندها مشكله انها شيعيه لأنها ما تعرف شالفرق بين الشيعه والسنه عبالها مثل السلف و الاخوان هالشكل....لأنها مسالمه وحدها بيت خالتي و الجمعيه ....
عاد الحين يات المعضله ابوي وما ادراك ما ابوي .....ابوي ريال قوي ...اكثر شخصية كنت اشبهه عليها

...فرعون ...

مادري ليش؟؟؟

طول عرض !!!...ما يغشمر ...طراقنا اببيزه عنده ..... سواء انا ولا اخواني اللي من ابوي
بس اشلون اصبر فطومه ...... شفتها بالجامعه ...خذيتها على جنب .....قلت لها فطومه لاتوافقين عاللي خاطبج ....انا بخطبج ...وان شا الله ماتطوف هالسنه الا وانا متزوجج .....اول مره تظحك وقلت لها انتي بس صبري .....اذا طافت هالسنه وماصار شي انا ماني ريال .....مادري شهالقوه اللي يتني عشان اقول لها هالكلام ....
احمدووووو درى من رنا ....وسوالي سالفه عوده وقام ما يحاجيني ...كان خايف علي ويعتقد اني بهون اذا قام يسوي جذي ما يدري اني تمسكت فيها اكثر.و اكثر.....ورنا ...قعدت معاي مره ثانيه ....وهم أنبتني على قراري المتسرع ...وقالتلي ترى انت ما عرفت فطومه زين عشان تحبها كل هالحب ....قلت بقلبي حزتها انها غيرانه منها .... امينه اللي ماعندها شغل غير التكركر حاجتني قالتي فطومه خوش بنت ونعم فيها ...لكن هالسالفه ما تمسك انت بروحك تمسك وتمس عايلتك وخواتك ....وعندي بنت خاله تزوجت شيعي ...طيحت حظ خواتها عقبها ...عطيتها بو لالالالالابس
يتني الشجاعه مالت الحرب والقتال والتنافس ودقيت على ابوي ...وقلت له بكلمك بموضوع مهم .....يحسب فلوس ولا بفتح مشروع ....وشكله حزتها قاصين عليه ربعه ومخلينه ينوي ينزل الانتخابات ....ولاهي حدى ما نشوفه من ديوانيه لي ديوانيه
خليت امي تكلمه اني ابيه بموضوع ...شِلون اخطب بدون ابوي ....شلون ابوي مو راضي ....المهم مرنا يوم اليمعه كالعاده ....وقلت حق امي فاتحيه انتي ....
فاتحته امي بالموضوع .....وناداني ..نزلت من داري وانا ارجف ...ليش مادري ...جني بردان او مسخن ...
نزلت من داري وانا مهيئ خدي لطراق حامي حتى دهنته فازلين عشان الطقه عالناشف تعور ميربها من قبل....وقلت طراق فنقر بسوي اللي في بالي ومزهب حلول حق كل شي ....قعد معاي قعده عمره ما قعدها معاي ...شحقى مادري....وما انسى كلامه حزتها ...
قالي من بنته ...
قلت له خير
قال:الخير بويهك ....من بنته ؟؟؟
قلت له:بنت محمد ...
قالي: محمد شنو ينقاله ...عطني عايله ؟؟؟
قلتله:مادري ...اسمها اربع اسامي ومافيه عايله اخر اسم احمد
قالي:انت تدري انت من ولده ... ؟؟
قلت:اي
قالي :تبيها
قلتله:اي ومصر
قالي :الله يوفقك ....انصدمت ...
قلتله:بس جذي خلاص ...يعني بتخطب معاي ...قالي اللي تبيه انا حاضر فيه ...وبس ازوجك مالي شغل فيك ...بتزورني اهلا وسهلا...لكن شرطي الوحيد ان الملجه تصير ملجة سنه
ااكثر موقف دعاني للأستغراب موقف ابوي .....ماطق ما صرخ...ما عارض....دروا خواتي واخواني ....دق علي اخوي العود ...خالد وزفني زف اليهد وقالي انه ماراح يحضر لا ملجتي ولا خطبتي ولا شي ....قلت بلعنه انا ابي فرقاك اصلا
وكلمتني اختي شريفه باللتي هي احسن وشريفه اختي كانت دينه ...وقعدت تحاجيني حجي وايد عود مافهمته ....وهم قلت لك جزاكي الله خيرا ...وانا مادري شالطبخه
وخواتي لخلصه ..كلمووني وفهموني ......وكل ما يكلمني واحد اصر اكثر على فطومه ....واكثر
واكثر
دقت امي على ام فطومه......وشكل فطومه قايله حق امها.......عارضوا اهلها بالبدايه لمدة اسبوع ...لكن وافقوا ....ورحنا انا وامي ...قعدنا معاها و مع امها وكان اخوها لمغازلجي -احمد- قاعد معاي ومعاها يعني يكون محرم مع ويهه ......بغيت اقوله عن سوالفه مالت انصاص الليالي بس سكت قلت خل تخلص السالفه على خير .....واتفقوا امي وامها ان نملج لين اخلص انا جامعه وتالي انتزوج ......
ورحنا انا وابوي .....وولد خالتي ...-خالتي ماخذه كويتي بعد-وزوج خالتي عشان نخطب خطبة رياييل.عمامي مايوا ولا واحد من اخواني وهي كان عمها وكيلها لأن ابوها متوفي....طبعا ابوي انصدم يوم حطوا عليه مهر...لأن احنا ما نحط مهر على احد ...وشبكه بعد ...وحفلة ملجه وعرس

حريم ورياييل.....ابوي وافق وماقال شي ..من باب انه ما يبي يفرق بيني وبين اخواني .....

عشت اجمل ايام حياتي بالملجه ..كلا اقول لها ما اصدق واتخيلين ...ما اذكر ان تكلمنا بشي مهم يفيد المجتمع واهي كلا سوالفها عن الدراسه...بس كنت اقطها بيتهم الساعه عشر....ويوني احمدووو و سعود بالملجه ورنا وامينه كانوا بملجة الحريم ...باركولي ...عشت ايام حلوه رومنسيه ....ما كنت اقدر اسوي اي شي معاها مع انها زوجتي .....لأن امها قعدت معاي قعدة مكاشفه وعطيتها وعد ....مع اني كنت امووووووووت جدام رقتها وكل مره اقول شكلي بهون بس اقول ماباجي شي كلها اشهر...

صرت اشطر من قبل بالجامعه واقل درجه كنت احصلها أ وياني احلى ترشيح من قسم العلوم السياسيه اني اكمل دراستي العليا برا الكويت ويمشولي معاش ما همني المعاش بس همني الترشيح واستغربت ليش المحاسبه ما رشحوا فطومه من البنات مع انها كانت بقائمة الشرف بالكليه وطلعوا واستانست حيل انهم رشحوا امينه من السياسيه.. لانها صديقتي ...تالي اكتشفت ان يرشحون اثنينه سنه بنت وولد وواحد شيعي ذكر مو مهم منو احسن المهم المذهب و الانتماء قلت حق فطومه عقب ما صاحت صياح ولا يهمج تدرسين على حسابي...من وين لي مادري؟؟؟؟؟.حاجيت ابوي قالي ما اكد على عميان وفلوسي تعبان فيهم مولاقيهم بالسكه -والله ويهي عريض- حاجيت امي قالتلي ولا يهمك بتعطيني

......وكان يدور في بالي موضوع معين ليييييييييييييييييييييييييييش ابوي ما عارض زواجي......وقبل عرسي بأسبوع عقب ما تخرجنا انا وفطومه وقطينا كبابيس التخرج
دقيت على امي الباب وسألتها .....وقالتلي اسئل ابوك ......دقيت على ابوي وقلت له اني بقعد معاه قالي تعال سوق المناخ ....رحتله بمكتبه .....وقعدت معاه ...وسألته هالسؤال اللي حيرني ....رد علي رد خلاني اعيد النظر ......قالي ......اكمل لكم تالي