من مذكرات واحد ما يطيع الحجي

( بعد ان فاقت الترشيحات لمذكرات واحد ما يطيع الحجي بنسبة سبعين بالمئه )

.

حبيتها ....تعلقت فيها ...بنية حلوه ...رشيقه وهالشي وايد افتقده ...وكانت اهدى المجموعه ..كنا مجموعه لا بأس بها ...ماسكين قائمة الوسط في كلية التجاره والعلوم السياسيه -كلية العلوم الاداريه حاليا- ...كنا احنا جماعة السياسه ما نواطن جماعة التجاره وكانوا جماعه التجاره ما يبلعونا ....والمشكله ان مو احنا السبب , الجامعه افرضت علينا نكون كلية وحده ....مع ان علميا احنا مالنا شغل فيهم ولا اهما لهم شغل فينا
احنا اتنطنز عليهم ...وخاصة تخصص المحاسبه واهم يتطنزون علينا
نتهمهم انهم ارقام متحركه
ويتهمونا ان احنا اللعبه القذره
كنا نطالب ونطالب ..انا نكون اما كلية بروحنا
او يحطونا مع اي تخصص ثاني وحزتها ما كان في تخصص اعلام بالجامعه عشان نصير يميع ....بس حزة الانتخابات ..مانعرف ولا شي الا انا نغني
لن يسقط
لن يسقط
معقل التجاره ....نحن الوسطيون
نحن الوسطيون .
..أصحاب التجاره
اصحاب التجاره
وبس لين ننجح نسوي لويه ونشيل بعض ...وتصير هوشتين او ثلاث ...وويشتغلون الربع اللي بالجرايد اللي يداومون نص دوام ..بملأ صفحاتهم ..بتصريحاتنا اللي يسمعنا يقول كلش ....ونروح دل دل دل حق ديوان عبدالله النيباري ...ونرز ويوهنا عند الدكتور احمد الخطيب اما سامي المنيس الله يرحمه كان منهم بس خطه بروحه....نسمع الحجي واننفذ ...بس فقط لاغير...كأن كلامهم امنزل ...وطنييين يحبون الوطن ..اوكي ...ما اختلفنا ...بس ترى مو رسل
وطبعا كنا بالوسط كل شي ...
شيعه سنه
حضر بدو
اصيلين عيم ....كل شي على بو الاشتراكيه ...والديمقراطيه ...بس طبعا القياده كانت بالدرجه الأولى لنا....وترى ما كنا ندري ليش ....الا بعد ما تخرجنا وصرنا نفكر بعقولنا صح ...
اشوف الناس تحوس داير مدار فطومتي ...وانا قلبي معاها على طول ...وهي اعتقد اسطرت معانا مو عشان تعرف مبدأ من مباديء الوسط ..لا ابد ...عشان انا كنت اصرخ معاهم ...وعلى قولة اخواني البدو ...اهايط ...كانت رنا ..وكنا نسميها حزتها انا رناااااااااا ههههههه ملاحظتني زين ...وكانت تقطلي نقزات تقولي فطوم فطوم فطومي اغنية دريد لحام بفلم صح النوم...وتحاول تظحك علي ...وكنت اقولها ذلفي انتي مع ابوج الرأس مالي اللي يبي يمص خيرات البلد ....ونسيت ان ابوي كان مع ابوها ....واثنينهم كلوها بأزمة المناخ ....بس الحب اعمى.....
يقولي احمدوووو......ترى فاطمه مو هينه واهي تعرف اشتبي ....وما كنت اسمعه ولا اديرله بال ....كنت اقوله اهي بس خل اتحجى ...بس اتبوسم وتمشي ....
وابتسامتها كانت صغيره مثلها ...كل شي فيها صغير خشمها حلجها حتى عيونها ...حتى اول ما شفتها ...قلت شاللي يايب عيال المتوسط عندنا ...واذكر حزتها ابتسمت نفس الابتسامه ...اللي ما دريت انها اول شي ربطني فيها ...كلا منج يا رنا انتي عرفتينا عليها ...او بالاحرى عرفتيني ...يقولي احمدووو انها مو حلوه ...بس انا اشوف كل صبي يمر صوبها بالكليه كأن بياكلها بعيونه ......اللي شدني لها شي واحد
هدوئها
حجمها لصغير جدا جدا......فقد كنت ومازلت احب كل شي صغير وامجكنم احس انه جميل ...على ضخامة جسمي كانت سيارتي اصغر سيارة في الكليه ....شحقى مادري
وحجرتي اصغر حجره بالبيت
كان كل شي بحياتي صغير
الا لقمتي ...مادري ليش عوده
كنا حقا في الكليه ....زملاء
كنت فعلا احب قروبنا المكون من ثلاث شباب وبنتين ...ودشت فطومه حبيبتي علينا عرض وعفستني ...وصرنا ثلاثه بثلاثه ....
على فكره فطومه ما دشت علينا بلقروب
اهي صديقة انا رناااااااااا وحاولت انا بطريقتي الخاصه بالحيله على انا رنااااااااااااا اللي فهمت بعدين ...
عقب ما شفتها مره معاها وسلمت وهذرت وتطنزت ...-يوم اقول سالفة عيال المتوسط- حاجيت رنا وقلت لها انا حسيت ان رفيجتج ازعلت مني قالتلي لا ...عادي فطومه ما تزعل...قلت لها حاولي تدششينها بينا ...عشان الانتخابات ...ادري انها صديقتج بالثانويه ...وتخصصها محاسبه..بس دششيها عشان نكسب مجموعة المحاسبه معانا ...حق الانتخابات ...وخاصه ان وايد منهم مو معانا ...ذكاء المحب المعجب العاشق اللي اهوه المهم سويت اللي براسي وصارت تقعد وتسلم علينا
احمدووووه امان ما منه شر
بس سعود ازقمبي .....وما اخاف على ولا بنت معانا منه ...الا فطوم ...لأني اشوفها بريئه وبيبي .....حدها...

طبعا فطومه كانت شاطره وتاكل الكتب اكال ...وكلا درجاتها أ وتبجي اذا يابت ا- عندها طموح انها توصل ...تختلف عن انا رنااااااوعن منيره اللي ضامنه من البدايه وين بتشتغل ....فطوومه معتمده على نفسها ...كأنها اتحدى احد ...ماكانت تهتم بموضيع الانتخابات كثر بنات طبقتي ...همها دراستها...تحضر ندوات ...تصوت لنا...بس غير جذي ما تسوي ......صراخ وبجي ومادري شنهو لاماكان عندها ...كان ابوي يقولي علما بأن ابوي ريال محنك ...يقولي صارخ مع الوسط لين تقول بس .....لكن ابحث عن مصلحتك...وموضروري تنفذ كل شي تقوله ...لأن اول من صارخ وطالب بموضوع الطبقه الوحده كانت سياييرهم رزريز!!!!!!!!؟

ماكان يعجبني كلامه ...بيني وبين نفسي اقول اختلاف الاجيال يسبب فجوه بالثقافات ....لكني مؤخرا اكتشفت ان هالحجي يمكن يكون موجود لكن مو بلكويت ....لكويت نفس المواضيع تنعاد....لكن بطريقه مختلفه ....

كانوا اغلب اللي بالوسط بذيج الحزه...احنا الحضر ...وكنا ماسكين القياده .....وبعدنا اييوون الشيعه .....وهم الافراد اللي يتحركون....يوزعون بوسترات .......يمكن كانت لنا القياده حزتها لأن عندنا فلوس ....لاقطوا جماعة الدخل المتوسط 10 دنانيير احنا نقط 100...اقول مالت على هلفلوس اللي راحت ...شعليه مادي واخر شي كنا نخدم ناس برا الجامعه ولا يمتون للجامعه بصله الا دعم فكرهم

بعض الاحيان احس اني غبي

وكل الشباب اغبيه

يعني حتى نبيها خمس اللي صارت ....طبعا لوكنت حزتها شاب بالجامعه جان كنت معاهم ....لكن ما اذكر ان واحد من الشباب اقنعني ....او فهمني...او حتي يعرف تقسيمة الدوائر الانتخابيه ...وثاني شي منو اللي كان يوزع بلايز برتقاليه ...وشمعنى برتقاليه!!!؟؟؟؟ مو مجموعة نواب؟؟؟....يعني الموضوع ....خلونا نحرك الشباب معانا او بصوره اوضح نقص عليهم بلصراخ

المشكله ان الشباب يحطون ثقتهم بلكبار ولكن ممكن تكون ثقتهم مو بمحلها....وللأسف كل الثورات بالعالم قام بها كبار على اكتاف شباب ..... وابرزها عبدالناصر اللي حذفهم بلسجون !!!؟

يمكن احلى شي صار بذيج الفتره قانون التجمعات ...وهو اللي كان مفروض يصير من زمان وللأسف محد انتبه عليه ...ولا يابه بالطاري.....بس نبيها خمس وماندري شالسالفه؟؟؟؟

عمري ما سمعت اسم وليد الجري بذيج الحزه لأن الفضل يرجع لله ثم اهوه بأسقاط قانون التجمعات واللي اسميه انا الفضيحه الكويتييه ....ولولا هذا القانون لا صار نبيها خمس ...ولا نبيها عشر...ولا ساحة الاراده ولا قالها الله.......والحين يدندنون بتعديله

للأسوء طبعا

الحين اشدخل السياسه بالموضوع....

ييت ذاك اليوم ...انا رنا الجامعه ....وكانت تبي تقولي شي .قبل المحاظره...تالي هونت وانحاشت عقب ما خلصت المحاضره ...وكنت فاقد فطومه ...وحزتها لا موبايلات ولا شي ....رحت سألت منيره مو عن فطومه عن انا رنا ....قالوا تعبانه ....شسوي شغبر ..ادري ان بيتهم برميثيه ...بس ترى عمري ما طلعت من اطار العاصمه للأسف ...اهلي وربعي كلهم داير مداري ....ومو متعود على ذاك الصوب...ادري اني اظحك بس هذا الصج ...ابعد منطقه زرتها مشرف ..وماد ادل فيها شي بعد

رحت رميثيه قعد افتر بالسياره جني مينون ....وعلى قولة المينون ...لعلي اراهم او اى من يراهم .,....المهم شفت انا رنا بالجامعه .....وصدتها صيده ما اقدرت تنحاش مني ....سألتها عن فطومه قالتلي تعبانه ....وبتي الجامعه باجر ......نطرت فطومه لين يت وسألتها شالسالفه ....ما ردت علي قال تعبانه وسكتت.......رحت سألت انا رنا وحنيت حنه عليها مو طبيعيه ....قالتلي ياينها خطاب وامها تقول لها لازم توافقين ...تدري بعد يا عبدالعزيز ....سلكهم مو مثل سلكنا....سألت رنا....يعني شنو ؟؟؟؟

توهقت رنا...........واكمل لكم تالي