من مذكرات واحد ما يطيع الحجي 3

سلمت ودشيت وقلت له يبا تدري ان عرسي الاربعا الياي قالي ادري و انه كلم اخواني ايوون بس عمامي اعتذروا منه .....طالع عيوني وقالي انت مو ياي عشان تقولي عن عرسك ...خفت شوي

قلت له اي ...ياي اسئلك ليش ما عرضت زواجي من فاطمه ....؟؟؟

قالي كلام اول مره ادري عنه و اول مره اسمعه .....وماتوقعته يطلع من ابوي .....قال:ايام ما كنت ادرس بمصر حبيت وحده غبطيه -يعني مسيحيه- وقررت اني اتزوجها ....الكل حزتها عارضني مو بس لأنها مصريه لأنها مو على ديني .... بس تزوجتها .... ويوم تزوجتها اكتشفت انها انسانه عاديه لكن زواجي منها كان نابع من عنادي لأهلي ...صارت بينا خلافات على اني برد لكويت وهي ما تبي ...طلقتها طلقة رجعيه وقلت لها فكري بالموضوع وطلعت انا بشقه بروحي وخليتها بشقتنا ....وحبيت اعتذر منها بيوم واني اقعد معاها واتفاهم ....رحت شقتنا ومعاي ورد - طلع الوالد رومنسي-...فتحت الباب ولا معاها واحد .....سويت نفس السويديين وقلت غلطان بالشقه وسديت الباب ... انصدمت وما اجذب عليك اذا قلت لك بجيت..اكتشفت ان كلام اهلي صح ...اللي مو على دينك مايعينك وحلاة الثوب رقعته منه وفيه ....ورديت لكويت وخذيت اللي على نظر اهلي....ولكن ايضا اكتشفت ان اختيار اهلي ما كان صحيح ...الى ان شفت امك وحبيتها فعلا من كل قلبي وتزوجتها ...ولي الحين ما القى راحتي الا عند امك من جذي تلاقيني يوم اليمعه عندكم لأني معاها ارتاح من نفسي واصير انسان وديع جدام طيبتها ....فعلا فعلا احبها واحبك واحب خواتك منها ...واحب كل شي يربطني فيكم....يوم شفتك ذاك اليوم نازلي من فوق ومتلحف بكنبل وترجف ...عرفت ان ما بذنك ماي وانك مصر على زواجك من هالبنت وانك اصريت اكثر عقب ما عارضوك اخوانك وخواتك وربعك وكل الدنيا ....لكني ادري انك بتصر عليها اكثر لو كنت انا معارضك ....وانك بتظاهر بالسعاده بحياتك لو كنت تعيس ...

حبيت راس ابوي ....وطلعت وانا هايم بتفكير ثاني ....عرسي بعد اسبوع ...وسفرتي بعد خمسين يوم تقريبا ...وهالمره راح تسافر معاي نقعد هناك لين اخلص الدكتوراه ...وهي بعد ....ما ادري ليش اول مره ألجأ لله ...مع اني كنت بعيد عنه ....اعترف اني ما كنت اصلي الا صلاة اليمعه ...وساعات انام عنها بعد ...حسيت اني تافه سخيف ...مطفوق ...حسيت فعلا بكلام ابوي ...لأن فعلا فاطمه كانت انسانه عاديه ...حالها حال الناس....وتذكرت شكثر كنت اصر عليها عقب ما اتييني موجة معارضه ...وخاصة من اخواني ...رحت تيدد وصليت ودعيت ان الله يوفقني بحياتي ....دعيت ان اذا كانت فاطمه خير لي بحياتي يقربها مني واذا كانت شر يبعدها عني .... فكرت اكثر واعمق ...بمفهومين اسمعهم لكن ما ابحث فيهم ...

الشيعه

السنه

شالفرق بالظبط ......مادري ليش اتصلت بشريفه اختي لأنها اول وحده من الناس اللي كلمتني بلهجة دينيه غير عن الباجي اللي قالولي المجتمع و العادات والتقاليد والاصول و الفصول ....والكلام التافه اللي لايودي ولا اييب .....قلت لها بتغدى عندج ......رحت حق شريفه اختي ...وقعدت معاها ....شافتني رحبت فيني وعقب الغدا قعدت معاها بروحي ....وقلت لها اني متوهق ...ومادري شالفرق بين الشيعه و السنه ...شلون بتصير حياتي مع فاطمه ....فهمتني شالفرق بالظبط ...وقالتلي احاول اني ما اييب عيال منها بأول سنه واشوفلي اي حجه عشان اذا انفصلت عنها اطلع بأقل خسائر ....وقلت حق شريفه ابيج تكونين معاي على اتصال وترجيتها اتيي عرسي ووعدتني خير وقالت انها بتقنع الباجي اييون ....حسيت بمساندة من اختي حسيت انها تحبني فعلا ما انبتني ...ولا قالت ترى قلنالك ......

ويا يوم عرسي .....تزوجنا انا وفطومه واصريت ان يكون شهر العسل بلكويت ....وعقب ما صرنا انا وفطومه تحت سقف واحد بديت اكتشف اشياء مختلفه جدا بيني وبينها ....شفت انها متمسكه بصلاتها ....وصيامها ومواجيبها ......وان انا لأ ....اتجهت اكثر حق ربي وقمت اصلي فرض بفرضه استغربت فطومه كل هالتغيير ولكنها سكتت .......قعدت مع شريفه قعده ثانيه تفهمني شلون ممكن اندمج مع فطومه واحببها بمذهبي اكثر ....لين يا موعد السفر.....

سافرنا ...وقعدنا كلنا الطلبه لكويتيين بسكن واحد ....ما اجذب اذا قلت ان فاطمه حصنتني عن الحرام وخاصه بديرة الغربه ...لأن وايد شباب وبنات يخورنها هناك .... وحاولت اقنعها ان ما نييب عيال في بداية حياتنا واقتنعت ...وانقبلت الكورس الثاني بنفس الجامعه ...وقالولنا اذا يابت درجات زينه عادي لكويت يخلونها تكمل ...عدت السنه الاولى ولاحظت فطومه مدة تغييري عليها ...عمري ما فتحت معاها موضوع المذهب ....لين يا اليوم اللي حملت فيه فطومه

حسيت انها قصت علي وانها ما التزمت بوعدها ....وحسيت بنفس الوقت انها تبي تسوي اكشن بحياتنا ....اختلفنا انا معاها وتظاهرت اني مقتنع بكلامها واتصلت بأختي شريفه اشرح لها ...واسئلتني سؤال جدا مهم ...قالتلي شنو بيكون وضع ولدكم .....ما فهمت شقصدها ...قالتلي شنو بيكون لازم تتفقون على هالشي ...هل راح يكون على مذهبك ولا مذهبها ....اكتشفت اني اناني لأني حكمت على ولدي بالتشتت ما بيني وبين امه ...الصح و الغلط بيصيرون عنده بتضارب تام لأن احنا مختلفين .....وبنظل مختلفين لي يوم القيامه ولازم انقر انا معاها هالشي وانتعايش على اساسه ....

قعدت مع فاطمه جلسة ود ....واصرت علي ان الاولاد يصيرون شيعه والبنات سنه .....وانا كنت اقول لها ان لعيال يتبعون ديانة ابوهم ...شكو الديانه مادري ...بس هذا اللي قدرت عليه كانت قعدتي مع فاطمه هذي اهي اول معركه اخوضها معاها ...بمذهبي ومذهبها ...وما اتفقنا على شي محدد وانتهت القعده ...مادري شاللي خلاني افاتح امينه بالموضوع ذكرت كلمتها يوم تقولي الموضوع ما يمسك شخصيا ....وقلت بحاجيها

قعدت مع امينه وقهمتها اللي صار طالعتني وقالتلي ...شكلك ما كنت حاسب حساب هاليوم وحسيت اني اناني اكثر واكثر....قالتلي اني اكرر القعده معاها وانا نتفق انا معاها ان عيالنا نخليهم على الاقتناع ....وكل واحد يبذل جهده بطريقته الخاصه ....يابت ولدي الاول ...وتهاوشنا هوشه كبيره على اسمه ....كنت ابي اسميه عمر وهي قالت اي اسم غير عمر مع انها تدري ان ربعي ينادوني بوعمر لكنها ما افتحت هالسيره نهائيا الا حزة ولادتها ...ودشينا بهوشه اذكر تفاصيلها .....ورضخت لها ...او خفت منها ...او ابي الحياة تمشي مادري شقول وسميته على ابوي ....سعود مع ان ابوي كان يكره نسمي عليه بحياته لكن تقبل الموضوع ومشت السنه اللي وراها واللي وراها كانت كل سنه نفس السنه اللي قبلها .....وحملت بنتي اللي تزامنت ولادتها مع وفاة يدتها وسميناها حليمه ....خلصت الماجستير قبلها وسبقتها تقريبا بسنه وبديت بالدكتوراه خلصت سنه ويانا 11 سبتمبر طاحوا البرجين وطاحت معاهم اشياء وايد ..... فاطمه متحجبه وتأذت وايد خلصت الماجستير ...ورديتها بيتهم ...وظليت هناك امي تدعي لي ... اني اخلص على خير وارجع لأن كان باجيلي سنه ..... خلصت على خير ورديت وورديت الديره ادرس الشباب و البنات بالجامعه واعلمهم من تجاربي اللي ما تخلص واكبر تجربه بحياتي اللي اهي تجربة زواجي

عرفت شكثر انا اناني ما فكرت بعيالي اللي الحين كل محرم يلبسون اسود ويروحون مع امهم لحسينيه وكل رمضان يروحون معاي صلاة القيام والتراويح ومايدرون منو فينا صح عدى ولدي عمر ....لصغير يوم يصلون ايدهم اليمين عل اليسار ويوم لأ ......

عرفت ان امي عطتني فلوس حق فاطمه من فلوس كانت ميمعتهم حقها عشان تشري لها عقار بلكويت واني حتى ما سألتها يما انتي ليش ميمعتهم!!!! ......شاورت ابوي اهد فاطمه ولا لأ ....قالي لاتخرب السالفه اكثر لأنك لو تطلقها عيالك كلهم يصيرون بحضانتها فعلا حياتي انقلبت فوق تحت ......سويت شي ما حسبت له حساب وكل ما اقرب من ربي اكثر كل ما اكتشف اني غلطت اكثر.....

تذكرت احمدوو حبيبي ورفيجي

تذكرت خالد اخوي

تذكرت شريفه اختي اللي ساعدتني في اقناع عيالي .....قمت احب عيالي اكثر

واقرب منهم اكثر واكثر ....

تذكرت كل واحد حاول يردني عن هالخطوه .....اعيش حياتي عادي مع فاطمه ...واعترف ان فاطمه انسانه غير سيئه وحافظه بيتي وقايمه فيني وبعيالي ....ما قدرت احبها ....ولا راح اقدر ..لأني اكتشفت اني ما

حبيتها ولا اهيه حبيتني

واعتقد الحين اني راح اصلح هالغلط

.

.

تمت