طلقني

بطلت صفحة البلوق بوست كالعاده ابي اكتب شي بس ماني عارفه شنو وخمسين فكره تدور في راسي ....تذكرت سوالف تغثني وتييبلي الحارج لما اسمعها ...وودي انكم تشاركوني (المغثه طبعا)وانا بالطريج من جليعه لي بيتنا ...كانوا معاي بالسياره ثلاث نساء مجتمع فاضلات ما يخافون كلش من الطريج ..ولا ياكلون القلب

امي ...

مرت خالي

يدتي ..قطيتها ورى عشان ما تشوف تريكات لبريكات ....

الصراحه انغثيت جدا من سوالفهم ...مو سوالفهم العاديه...سوالف الصبر اللي كانت في جيلهم على نماذج من النساء اللي اعرفهم للأسف ...واللي الكثير منهم توفوا ...من المغثه و الصبر طبعا

من احد نماذج الصبر اللي ضربوها لي اقصد المغثه .....سين من النساء..كانت عايشه في بيت الحموله بدار وحده وكان البيت عربي ...وكان زوجها كل يوم يعزم رفيجة ويقول حق زوجته لحد يدري اني عازم رفيجي وخاصه ابوي ..اللي اهوه عم المره ابو ريلها ...وكل يوم المره تطبخ العشا وتغطيه وتنطر ريلها يطق بنجرة البيت -النافذه - وهي تطلع من حجرتها الوحيده ...وتروح تقعد ورى بحوش الغنم عشان ما يفطن - يحس- فيها احد وماكان في حتى عريش - مظله - وساعات يطق مطر وساعات غبار تحط..قرطاعه - قطعة كرتون - اتذرى فيها - اتغطى- ويا ذاك اليوم اللي فكرت المره انها تروح عزكم الله الحمام ...وصادف طلعت زوجها ابو عيالها ولد الحموله المصون ولا رفيجة طلع لابس عباة

طلع وحده

وصبرت واسكتت ...وكل يوم يتكرر نفس الموال ....خوش مثال للصبر ...خوش مثال للمغثه ...بالله هذا صبر يا ناس ولا ذل !!!!!؟

يعني لو الريال زين و الحموله مو زينيين و مأذين المره اوكي ...يا حيل الله وقوته ...بس الريال يصير بهالبشاعه... اسئل امي يما ليش ما يتطلقون .....تقولي المسكينه اتطلق وين تروح

بيته اهلها كلا جناين ولازم تشيل يوم ....يعني لازم تطبخ وتغسل بيوم وعيال الجناين يطقون عيالها ...وماكو دور (غرف)...استغفر الله يا ربي ....قالها عمر بن الخطاب رضي الله عنه" لو كان الفقر رجل لقتلته" ..الله يديم النعمه ويخلي لنا مطلقاتنا ..والحين في كل بيت مطلقه ..وحمدالله هالشي صار عادي ...ادري ناس وايد بيعتقدون اني اشجع الطلاق ...لا والله ابدا ...بس حبيت اعدل مفهوم ابغض الحلال ,,,, وهالكلمه اللي حبوها الناس وما يتهم الا من حديث ضعيف ...حتى مو حديث حسن عن الرسول عليه الصلاة والسلام ...وهل معقول ان الله سبحانه وتعالى يشرع امر ويبغضه ؟؟؟؟!!!!! ؟

وهل الرسول عليه الصلاة والسلام يفعل امر يبغضه الله تعالى...وهو الطلاق ..فكمانعلم ان الرسول عليه الصلاة والسلام طلق

و الله شرع الطلاق لحاجة الإنسانية له. وقد طالب سيدنا إبراهيم عليه السلام ابنه - سيدنا إسماعيل عليهما السلام- أن يغير عتبة الدار (أي يطلق زوجته) فلماذا لا يقر الناس ما أقره الله؟

ارجوج واللي يسلمج يما لاتكررين هالسوالف وايد جدامي لأني احس بحارج ومغثه ....واكتشفت ان زيادة نسبة الطلاق بوقتنا الحالي حالة صحية جدا ....موضروري المره تصبر عالمغثه

موضروري تصبر على ريال فاسد ويخونها

مو ضروري تصبر على ريال سكير

موضروري تصبرعلى واحد ما يحترمها

مو ضروري تصبر على واحد ما يحبها وما تحس انه ريال

مو ضروري تصب عاى حرامي يبوق فلوسها وفلوس الناس

الله يعوض على بناتنا خير ويرزق الصابرين الجنه لأن صج الصبر على الزوج امر موهين .....وقليل ما سمعت رياييل صابرين على حريمهم مقابل نساء صابرين على رياييلهم

.

ولي وقفه اخرى مع ملف المطلقات ..

.سؤالي الاخير هل الطلاق مشكله ام حل لمشكله؟؟؟