يا ام العضلالالالالالات!!!!!!؟

الصومتحركا
الرسوم المتحرك

البباي

الميكي

افلام الكرتون

وما ادراك ما افلام الكارتون يمكن انا مو شغلتي ابحاث الاعلام والراي العام لكني فعلالالالا اكثر شي اهتم فيه الطفل و التربيه ...يعني احتمال جدا اذا الحكومه قدمت استقالتها يحطوني بدال الصبيح ...بس حزتها عاد بصك موبايلي وبروح الشاليه ...وماراح يحصلوني فيضطرون آسفين انهم يردون الصبيح

ويخسروون عتيجه اللي ما تعرف شي عن عن وزارة التربية حالها حال بعض الوزراء اللي قبل نورية الصبيح

ترى قلنا بعض بعض

لمراد مادري شفيني طقيت الرصيف ----- > كلش مو ميته عالوزاره

خلنا بأفلام الكرتون .... ا

ذاك اليوم قريت ان بيييييييييييب بيييييييييييييب ممنوع عرضه باليابان وممنوع يدخل اليابان وكان تحليل الدراسه ان بيييب بيييييب له آثار كبيره على الطفل بالمستقبل ويخليه ما يفكر ولا يبذل مجهود للحصول على مبتغاه ونيل هدفه وذلك من خلال الذيب المميز بالذكاء اللي يفكر بألف طريقه ذكيه محبوكه عشان يصيد بيب بيب واخرتها بيب بيب بحركه غبيه معتمد على الحظ يطلع من الموضوع يعني بلكويتي "بييب بييب يكسر المياديف " وطبعا اغلبنا يدري شنو حجم اليابان بالصناعه وبالموارد البشريه ...-واللي ما يعرف مو عيب يقول ما اعرف- ...ودايم يركزون على كرتون كرة القدم مثل كابتن ماجد وربعه حتى لو كلالالالالالا ... كلك وتشلخ - كذب - حتى لو بسام ما يفوز على ماجد حتى لو الاخوان التوأم لا شفت حركاتهم اللي يركب فوق العارضه والثاني اللي يرفس اخوه عشان يطير تحس ان السما بتطيح عليك ماعليه ...الهدف ان الفريق يرتقي

وخذت اليابان بعد عدد من السنين -طبعا ما اتذكر الارقام- كأس العالم في كرة القدم للسيدات علما بوجود خمس فرق سيدات لكرة القدم بس بس بس ...واحنا قبلهم بالكره وعندنا 13 فريق ..... والله يهدي الاتحاد ...فعلالالالالالا

بسسسسسسسسسسسسسسسسس!؟

وذاك اليوم قاعده اطالع ام بي سي 3 مالت الاطفال حزة وقت الذروه لمشاهدة الطفل اي بعد اذان العصر تقريبا ولا ثلاث بنات وحده لابسه اصفر ووحده اخضر ووحده ماني ذاكره(هذي اللي حاطتها صورت وحده منهم) يعني يحلون مشاكل العالم وبعد ما حلو احد المشاكل اقعدت وحده - اللي لابسه اصفر شعرها كاري اسود- اتودد حق واحد جان يقول لها انا لا افكر ان اكون علاقه معك لأن عضلاتك اكبر من عضلاتي ؟؟؟؟؟؟؟؟؟!!!!!!!!!!!!!؟؟؟؟؟؟؟؟؟؟؟

وما شافت الا غبرته خنت حيلي حيلها

جان ايوونها صديقاتها يعايرونها باللغه العربية طبعا يقولون لها يا ام العضلالالالالالالالالات ويتظحوكون؟؟؟؟؟؟؟طبعا عتيجه بلقت عيونها ...ومرت اخوي تقولي لا حلو هالبباي كل اليهال يتابعونه وانا مادري شسمه ---- > انا ادري ان اهيه متابعته بس تستحي تقولي بناتي يحبونه

وبرااااااااتز يا عل ماكو براتز....بنات يترقوصووون ويحطون مكياج بس شوفوا قبلتهم بس .....لاتعليق

يمكن اخر شي تحسبوني بقولكم ديروا بالكم على عيالكم ..وجابلوا معاهم التلفزيون .....طبع الانسان يكون واقعي افضل من انه يكون مثالي عشان يتعامل مع الامور صح ...فجابلوا عيالكم هذا شي لا شك فيه واللي يقدر يسوي جذي اعتبره اب او ام مثالي لكن في قرارة نفسي ما ظنتي واحد ولا وحده منا (راد/ راده) من الدوام و(متغدي /متتغديه) (ضارب / ضاربه) بالخمس اذا مو بالعشر و(شارب/شاربه) استكانه جاي (يجابل /تجابل) التلفزيون مع الاطفال

مستحيييييييييييل

او يكاد يكون مستحيل

انا الصراحه اضع اللوم الاكبر على قنوات الاطفال العربية اللي قاعدين اييبون هالصومتحركا على بو انها ارخص شي وبيكثرون من عدد المحركات بغض النظر عن الجوده و المفهوم ....ويعرضونها حزة الذروه بعد يعني ادهى و امر

طبعا ما اقول خلنا نسوي إلا الاطفال ...على وزن الا الدستور لا ابدا -علما بأن الاطفال اهم-....بس فعلا ظروري كل واحد منا يسوي شي بهالموضوع بالطريقة اللي يشوفها مناسبه ...... وفينا الخير الحمد الله

ولا شرايكم بحملة بيب بيب يكسر المياديف مو جنها احلى ;p

بتظيفون شي

ترى ما استغنى :)

صديقتي العزيزه....امونه

لي صديقه عزيزه جدا ظهرت فجأه في حياتي التي تفتقر لصداقات حقيقه
ظهرت في حال ابتعادي عن الكل علما بأنها كانت موجوده ...اخذتها في جوله في حياتي
واخذتني في جوله في حياتها
دخلت الى منزلي
ودخلت الى منزلها
تجمعنا نفس الهوايه
ونفس التخصص
ونفس مجال العمل تقريبا
ونفس الطبقه

:p
هي ...ذويقه و كل اسبوع تروح السوق هذا اذا ماراحت بالاسبوع اكثر من مره
عتيجه...الملابس شي ثانوي عندي اشتري عند الحاجه فقط والتسوق بالنسبه لي شي حلو لكن مو اساسي
هي...طيبه جدا وممكن ينوكل حقها بسهوله
عتيجه... ما تضيع حقها موليه حتى بالمطعم
هي...مثابره وتقعد من صباح الله خير
عتيجه...كسوله جدا جدا تنجز اعمالها حده حده
كلينا يميع
صلينا جماعه
فلسنا يميع
ويمكن حبينا يميع
تساعدني وااااااااااااااااايد وماتقصر معاي بأي شي

تحتاجني

احتاجلها
ما اجذب عليكم اذا قلت لكم اني خذيت من مواصفاتها بحكم الاحتكاك
واهيه بعد تطبعت فيني وصار لسانها طويل بالحق
....لدينا اختلاف بسيطه جدا جدا
هي ...تتعامل مع الامور بسطحيه تأخذ الكلمه وكأنها موجهه لها
وعتيجه... تتعمق في داخل الكلمه والتصرف فلعلي اجد ماهو مخفى بين السطور
مثال : لا احكم على الناس بالظاهر
هي: قد تحكم على الناس بالظاهر
مثال آخر: تحكم سريعا على الناس وتغير حكمها بشكل سريع
بعض الاحيان اقولها اشياء تعتقد اني موجهتها حقها لكن الحمدالله مع الوقت بدت تفهمني ومثل ما قلت لكم تطبعنا في بعض
اكثر من امونه بيننا
واكثر من عتيجه
وامونه ليست افضل من عتيجه
ولا عتيجه افضل من امونه
طاحت على بلوقي بالغلط وماعندي اي مشكله انها تقراه رغم انه من عمق خصوصياتي
رغم تعمقي وسطحيتها
الا اني احبها جدا جدا
وهي تحبني جدا جدا

وسر استمرارنا الاحترام وهو قيمه مكتسبه وليست فطرية

يدعيها البعض ...ويطبقها في بعض اموره ...ويطالب بها ...امام الناس

ولكن عندما يكون غير معرف بأل

تخرج انيابه ممزقا كل ماله علاقه بالاحترام

من احترام نفس

الى احترام آخر

جاهلا ان احترام الآخر ماهو الا حترام للنفس حين رؤية المرآه الوحيده في الغرفه الخاليه

لا افرض عليها شيء

ولا تفرض علي شيء
لا استغنى عنها
ولا تستغنى عني فنحن المجتمع بالنهايه
"واللبيب بالاشارة يفهم "

المعذره امونه يبت طاريج بدون اذنج

(قد يسع صدري وخاطري ومدونتي ايضا لتحمل اي خطأ او كلمة اهانه موجهه لي لأني اعلم تمام العلم انها تعود على من قالها ولكني لا اسع اهانات للآخرين فربما لا يتحملون...المعذره اختي ريما كانت هناك اهانة موجهه لك من قبل احد المجهولين في تعليقات بوستي السابق لم اطلع عليها الا الساعه وقمت بمسحها اليوم ....اليوم فقط)

كيف تصبح اصيل بمدة قصيره

1- ترزز في ديوانيات الاصيليين وتكلم عن معركة الصريف واليهرا والرقه ولاتنسى ان يدك نوخذه حتى لو كان تباب

2- افتح اي كتاب فيه كلمات عتيجه واحفظهم ولا اتحجى الا فيهم

3- احفظلك ثلاث امثال شعبيه غير متداوله وحطها نيك نيم لك بلبوتوث

4- البس نعال نيديه على طول ولا تقطها حتى وانت نايم

5- سو قطيه انت وجماعتك وحطولكم ديوان بمنطقه داخليه ...واذا ما عندكم اخذوا قرض وحطو بجنوب السره ودززوا اسمائكم بمنحة سالم العلي ...بس لحد يدري

6- لاتناسبون لمدة ثلاث سنوات اي عائله مافيها ريحة اصل

7- قولوا ان عندكم اهل بالسعوديه

8- سوولكم صندوق لتكاليف النعي بالجرايد اليوميه وحتى لو ابو صبيكم يموت كتبوا عائلة الفلاني تنعى صبيهم فلان الفلاني ..ولا تنسون يا صفحه يا نص صفحه غير جذي انت مو اصيل

9- نزلوا واحد من عيالكم بالانتخابات حتى لو ما يفوز ...بس ماعليه اهم شي اسمه مرتز بدخلة المنطقه

10- اشتر السيارات التاليه :

كايين واذا ماعندك مو مشكله الطوارق يمشي الحال

لمبرجيني

موزراتي

فراري

بورش

بي ام

اللكسز الكبيره مو لصغيره

واياني على اياك تحطلك التيما ولا كامري ...واذا ما عندك اركب تكسي بس لاتشتري سيارة رخيصه

11- اذبح يدك ويدتك عشان ما يخوروونه بالحجي

12- لاتحاجي عيال خالتك لأنهم يدرون شالطبخه

13- اطلع بالجرايد وايد وانت لابس جماغ

14- دش بألف عضويه ...حتى لو تكون مو عضو فعال بس مو مشكله عشان السي في ...السيره الذاتيه

15- عيالكم كلهم بكلية العلوم الاداريه ما يبيييييييييييييييييله

16- احضر كل عرس واذا صار عندكم عرس على عايله مو معروفه اكتب كريمة احدى الاسر الكويتيه واذا معروفه

حطها قبل عايلتكم

17- اخذ واحد من عيالكم ولبسة عقال شطفه ووده فوتو كينا يسويلك صوره عتيجه وحطها بالديوانيه ....لزوم الشغل

18- لبسوا دريولكم دشداشه وغتره وعقال ....يعني فداوي

19- اي واحد من عيالكم عنده حس كتابي خل ينزله مقال او عامود بأي جريده واذا ماعندكم مو مشكله كل شي بأجره

........................

وفي النهاية ستصبح اصيل غصبن على فج خشم اللي خلفوووووك بس اتمنى من كل قلبي ان بينك وبين نفسك ما تصدق انك

اصيييييييييييييل

"واللبيب بالاشارة يفهم"

طاح الريموت -الاخيره

رشا: طلقني
يقف نبيل مذهولا من هول الموقف تمسك ايده رشا تنفجر بكاء تسقط على ركبتها ينزل راسه ناحيتها يقول: ضحيتي باثنعش سنه من عمرج ومهما اضحي ما اوصل مواصيلج
رشا: ما همني انا وياك الحين بمفترق الطرق عمري وصل ثلاثين سنه ولازم اقرر يا اصير ام او لأ ....انت قررت انك ما تصير ابو وانا قررت اني اصير ام للأسف حبي لك ما وصل مرحلة التضحيه بالامومه للأسف شكثر انا انانيه ....يضع نبيل يده على فمها

نبيل: ما تدرين يمكن لو انا بنفس وضعج ممكن اتخذ هالقرار يحضنها وتبكي : نبيل تكفىىىىىىىى سامحني وافهمني ..............
تذهب رشا الى بيت اهلها حامله حقيبة ثيابها ...جالسه مع والدها المصدوم من قرارها ووالدتها التي كانت متوقعه هذا القرار , الوالد: بس يا بنتي ما عطيتينا خبر !!!!!!!!؟
رشا: والله يبا كنت افكر بهالموضوع ...لكن الحين عمري 30 يا وقت القرار ....وكان هذا قراري ....نبيل بيظل اول حب لي ...واخر حب ...واي زوج ثاني بيكون وسيلة لأن اكون ام ...اعذرني يبه على صراحتي
الوالد: نبيل مو زوج بنتي بس.. نبيل ولدي واخو اخوانج العود ساعدني بتربيتهم ودراستهم وحتى عقابهم....وولد رفيجي اللي اعزه على اخواني ...اللي ما رضى يزوجج نبيل الا لما يشتغل واكرفه وهو صغير بو 20 سنه يا ما سافرنا يميع يا ما تسلفنا من بعض ...طلاقج يا بنتي طلاق عايلتين
رشا: يبا الله يخليك لاتحاول تأثر علي اكثر من جذي....علاقتك في عمي بتظل مثل ما اهيه ...وقعدتكم بالدوانيه لا اتغيير عشاني وبعد عشان نبيل ما يحس بالتغير والفراغ ...وحتى خالتي ام نبيل ما ابيها تنقطع عن امي . واحنا انفصلنا على حب مو على هوشه ولا بوقه..يبا الله يخليك ادري هالشي صعب بس حاول كثر ما تقدر علشان بنتك الوحيده يبا الله يخليك ...تلم رشا ابوها وتبكي ويطبطب ابوها عليها
الوالد: بحاول ...بحاول
تبدأ رشا ونبيل بمراهقه غريبه فيبدآن بالحديث معا طوال الليل على التليفون ويتواعدون في اماكن خارج المنطقه وبعض الاحيان يوصل لها اغراض ...علم اخوان رشا بالموضوع وحاولوا التأثير عليها الا ان محاولاتهم بائت بالفشل ....يغض والدها ووالدتها وحتى اخوانها النظر عن علاقتها بنبيل مراعاة لحالتها النفسيه ولحالته ايضا وكانت تتحجج انها فترة عدة وستنتهي ...

انتهت فترة العده ...فقرر نبيل البحث عن زوجه حيث ان رشا تركت الفراغ الكثير في حياته ....وكانت والدة نبيل وخواته الاثنتين موكلتين لهذه المهمه ...فكانت والدته تبحث له عن بنات لم يسبق لهن الزواج علما بأنها تعلم تمام العلم ماهي مشكلته ...(العقم)...وكان يعارضها ...

فقرر ان يبحث هو بذاته ...فأشار عليه والد رشا ان يتزوج بأرمله او مطلقه مكتفيه بالابناء حتى تعوضه بأبنائها ولا تطلب منه الابناء ... راقت الفكره كثيرا لنبيل .... وبعد ثلاثة اشهر من انتهاء عدة رشا وجد مراده امرأه ارمله بستتة ابناء تكبره بسنتين وهي اخت صديق له بالديوانيه ...

.ذهب لخطبتها وطلب الجلوس معها ...كانت مريم امرأه ليست كبيره بالسن تكبر نبيل بسنتين أي تقريبا 35 سنة ابلغها نبيل عن طلاقه و ظروف طلاقه وعن زوجته وعلاقة عائلته بعائلتها ...
نبيل: طليقتي بعد الطلاق تعاني من حاله نفسيه يعني ممكن تنطلج بالدوام او تنطلي ممكن تلاحقنا ممكن كل شي تسوي ابيج تراعيني وتراعينها مع ان مو مطلوب منج لكنها فتره وتعدي لأنها ممكن بأي وقت اتزوج وتروح كل هالتصرفات ...وممكن تلاقينها بعزايم عائليه ...وممكن جدا تشوفين اخوانها عندي او ابوها ...وترى ما راح اقاطعهم ...لا بالمناسبات ...ولا بالدوانيه ..لكن أي تصرف اتصرفه لا تعتقدين انه بيكون تقليل شأن لج ...
مريم: الحمدالله انك قلت لي كل هذا قبل الزواج ...وانا بعد مره ارمله وعلاقتي بحمولتي كانت علاقه حلوه وجيده يعني ممكن حمواني يزورونا ياخذون اليهال او يراعونهم ....ممكن اسلم عليهم ...ممكن اودي اليهال حق عمي بالعيد وممكن انا شخصيا ازوره ...
نبيل: عيالج بيصيرون عيالي وهذا انا بدال ولا ياهل الحين بيصير عندي 6 اولاد
مريم: 5 اولاد وبنت
نبيل: الحمدالله يا ربي ....واذا انتي حاسه انه ودج بعيال من الحين قوليلي مافيني شده على طلاقين
مريم مبتسمه: خل يصير عندك خمس صبيان بالبيت وانت حزتها ابيك تقرر اذا تبي زياده ولا لأ
نبيل : كلميني عنهم
مريم: عيسى 11سنة, فهد 9 سنوات, خالد 7 , ساره 5 , وحمد 3, عبدالله سنة ونص ما شاف ابوه وسميته على اسمه
نبيل مبتسم : الله يخليهم لنا

ارتاح نبيل من مريم ....وارتاحت مريم من نبيل ...وتزوج الاثنان بحفله عائليه صغيره وسط جو من الفكاهه على ابناء مريم الذين سيدخلون العائله من اوسع ابوابها ...
علمت رشا وثارت وبدأت في ملاحقته ...بتصرفات لا شعوريه ...تنتظره عن باب المنزل ...تحاول ان تؤخر اجراءات بيتهما تذهب مع والدها لقصر العدل لتراه ....تظهر له بالجمعيه فجأه ولكنها لم تلاحق زوجته او تأذيها او تتصل عليها ...يصدها مره ويستجيب لنداء قلبه مرات عدة ...اشهر عصيبه مرت على رشا وماهي الا سبعة اشهر حتى تزوجت رشا من خالد يكبرها بخمس سنوات يعمل طيار كثير السفر مطلق وله من الاولد اثنين يعيشون لدى والدتهم ....كان رجل جيد ...لم يكن مثل نبيل ولكنه استطاع ان يجعلها ام ...رزقت منه بطفلتين توأم ...ومن ثم بأخرى وبأخرى ...ولم ترد ان توقف نسلها ...الى ان اصبح لديها ...على حسب ذاكرتي اكثر من اربع بنات
عاش نبيل والد لأبناء زوجته مريم كان الناس يكنونه بأبو عيسى نسبه لولد مريم البكر....احبهم واحبوه كان كوالدهم ...يراجع دروسهم ...ويراجع مدارسهم ويحضر اجتماعات اولياء امورهم ...استطاع بذكائه كسب جدهم ووقوفه بصفه حيث لم يكن احد اعمامهم راضيا عن وضع نبيل ..الى ان رضخ تحت ضغوط الجد كما استطاع ان يجعل جدهم من رواد ديوانيه والده ...كان تعلق ساره بنت مريم هو الاكثر من بين اطفالها ...وكان تعلق نبيل بها ايضا كذلك ...لأنه طالما احب البنات ...يقضي نبيل ايام جميله معهم ...بطولة باله وحنكته وصبره وابتسامة مريم التي لا تفارق وجنتيها ....
كانت رشا دائمة الدعاء لنبيل حيث ان اخباره تصلها دائما من والدها واخوانها ...وكذلك هو سعد كثيرا حين علم انها اصبحت ام ...وطلب من والدها المباركه لها نيابة عنه
وفي سنة 2004 حملت مريم زوجة نبيل بذهول من الدكاتره ومن مريم وعائلته وحتى نبيل نفسه ببكاء ودموع من الجميع حمد الله وشكر فضله .....واتت له ابنه تنازع ساره على عرش قلب نبيل ...فرحت مريم لفرحة نبيل ..الا انها تريد الاكتفاء ب انفال ..حيث اختار نبيل اسمها من القرآن الكريم لتعمها البركه ...نبيل اصر على مريم ...واتت له بطفله اخرى و اخرى .......
اصبح لدى نبيل 9 اطفال ثلاثه من صلبه و6 تبناهم قلبه ....فرحت رشا جدا جدا وبكت لفرحة نبيل ....وباركتله حين رأته بجمعية المنطقه وقام هو بتقبيل ابنتها ...تمت

تذكر

القصه حقيقيه وليست من نسج الخيال شابها بعض التغييرات لخصوصية اصحابها

ما اثار حفيظتي لكتابتها رؤية رشا في مجمع الصالحيه من قبل احدى قريباتي مع بناتها

طاح الريموت 2

وبعد اسبوع في يوم الاربعاء عصرا تتصل سكرتيرة عيادة الدكتور عبداللطيف على رشا تطلب منها الحضور للعياده حيث كانت رشا في سوق قريب من العياده بالسالميه..... تذهب رشا مسرعه من غير ان تبلغ نبيل ....تسرع رشا وفي قلبها دقات يعلوها فقدان الامل وشكوك في سرعة الرد من قبل المستشفى الالماني ....تدخل رشا على الدكتور يطلب منها الجلوس ....
رشا: بشر دكتور ؟؟؟
الدكتور: والله مادري شقولج يا رشا
رشا: كالعاده دكتور صح ....ترى انا متوقعه
الدكتور: للأسف نفس النتيجه المعتاده حضرتج وضعج طبيعي ... اما نبيل فالامل مفقود فيه بشكل نهائي وبعد سفرتكم ممكن ترتفع النسبه الى 5 % فقط لطفل انابيب
رشا: كنت متوقعه هالنتيجه دكتور لا تعتقد اني مو حزينه لكن هالمره ودي تنصحني لأنها اخر محاوله قدرت اقنع نبيل فيها
الدكتور: انصحج ما تسافرون لأنج انتي اللي دايم تسعين ونبيل متقبل نفسه فإذا بعد السفر ما حقق نتيجه ايجابيه بيتأثر نبيل جدا جدا وهذا المتوقع طبيا لأن المحاولات على مدى 12 سنة تجعل الانسان يتعلق بأمل عند خوض محاوله ...وانا اخاف عليه من هالشعور
رشا: شكرا دكتور ويزاك الله خير
تخرج رشا من عيادة الدكتور بدمعه حائره في عينيها تذرفها عينها اليمنى وتتجمد في اليسرى .... تأخذها السياره لأقرب مكان التل السياحي (شوبيز) تتمشى في شوبيز كالتائهه لترى الاطفال بين احضان امهاتهم وآبائهم يلاعبنهم يداعبنهم بحب وانسجام ترى امرأه توبخ طفلها وتضربه على يده ...تتضايق من هذا المشهد تذهب الى الواجهه المحاذيه لشوبيز تجد بعض الاسر تفترش الارض فأحداهم تحتسي الشاي والاخرى ترى ابنائها في البحر .... تجد امرأه كبيرة تستند على ابنتها لتجلسها على احد الكراسي وامرأه اخرى تجلس في زاويه وحيده كبيره في السن تراقب الوضع كما تراقبه رشا
تحدث رشا نفسها : اكيد هذا وضعي بعد 20 سنة وين عيالها؟ وين ريلها؟؟؟ بس خادمتها ودريولها !!!؟ بسسسس
تنحسر دمعه اخرى في عين رشا تذهب مسرعه لسيارتها ...لا ترغب في مواجهة نبيل كما لا تريد احباطه وابلاغه عن ظهور النتيجه .... تأخذها سيارتها الى بيت جدتها ...تدخل تجدها تقرأ القرآن ...تلاحظ الجده دخول رشا ... تنهي الآيه الكريمه ...تغلق مصحفها ...تضع نظارتها جانبا قائله: هلا هلا ببنيتي رشرش تعالي يما قعدي يمي الله ياني ولهانه عليج ..يايه مبجر اليوم
رشا تلتصق بجدتها : ودي اقعد معاج شوي ...وانام بحضنج
الجده: تعالي يما هذي الساعه لمباركه .. ذكرتيني قبل يوم كنت افلي شعرج بس الحين عندج من يفليه لج
رشا: مالي غناة عنج , تنام رشا في حضن جدتها على سيادة الصلاة
الجده: الله يا رشرش دخلتج هذي ذكرتني بدخله دخليها علي من قبل ...يوم اهلج ما رضوا اييوزونج نبيل
رشا: صج يديده تذكرين
تضربها جدتها بقوه على ظهرها: عبالج خرفت يالتعبانه أي اذكر كل شي ويا عل الله يخليلج نبيل ويفرح اقليبكم بياهل يترس عليكم البيت قولي امين
تصمت رشا تسألها الجده: شفيج يما ....تشكين من شي
تنهمر دموع رشا : ابي عيــــــال
الجده: الله الرزاق اللي عينه ما تنام ادعيه تراج تدعين كريم ويا ما حريم ما كنا نسميهم الا ام غايب الله رزقهم عيال عقب ثلاث وخمس سنين ...
رشا: يديده قبل غير والحين غير....
الجده: شوفي يا بنيتي عطية الله مافيها قبل و الحين ... وانتي عقب هلسنين تبين عيال ..سمعيني يا الريل يا لعيال ...نبيل ايودي وماكو مثله يحبج ويحب اهلج ويداري خاطرج بس الكمال لله وحده ....وتلاقين غير نبيل فيه عيوب الدنيا بس فيه عيال ....ويا بنتي المره لا وصلت الثلاثين يقل خلفها ...وانا بالثلاثين كنت يده وقطعني الياس اخر الثلاثين ...بس الزمن تغير ... وهذا انا يدتج ما باجيلي من الدنيا الا انتوا يدج راح ولو ما انتوا جان الله العالم وين انا فيه.....ادعي الكريم اللي عينه ما تنام ...ونبيل لو تلفين الدنيا شمال وينوب ما تلاقين بطيبته.....
تخرج رشا من جدتها ....تذهب الى منزلها ...تجد سيارة نبيل ....تستغرب ...تدخل المنزل بهدوء ...تدخل غرفتها ...ترى نبيل نائم وقد اعطاها ظهره ....تحدث نفسها بصوت عالي ..
رشا: انا بعرف شلووووون هالريال يقدر ينام بجينز
يسقط الريموت كنترول مره اخرى تلتفت رشا ترى نبيل فاتح عينه وقد استدار ناحيتها
رشا: من متى قاعد؟
نبيل يقلدها : انا بعرف شلون هالريال ينام بجينز
تبتسم رشا
نبيل:ليش ما رحتي بيت يدتج ؟؟
رشا: تو الناس .... هقيتك نزلت بحر ما هقيتك كلش بالبيت
نبيل بصوت غير معتاد يتعدل من سريره : يقولون في سرايه
رشا: أي سرايه أي بطيخ الجو شزينه والناس قاعده اتمشى بكل مكان
نبيل بلهجه حاده: الحين منو فينا راعي الطراد انا ولا انتي ؟؟؟
تستغرب رشا : انت ....اكيد ليش هالسؤال؟؟!؟
نبيل: طلعت النتيجة؟؟؟؟
رشا تضيع الصقله: أي نتيجه؟؟
نبيل: نتيجة مستشفى اطفال الانابيب الالماني
رشا: بسم الله الرحمن الرحيم تونا دازين الاوراق اش عايلك ؟؟
نبيل: ما عايلني شي
تبدو رشا مرتبكه تحاول تلهي نفسها بوضع مكياج , يحدثها نبيل مره اخرى : زين انتي متفائله؟؟
تسوي روحها ما اسمعته تقوله: زين دامك ما نزلت بحر اليوم شرايك نروح انا وياك .....يقاطعها نبيل:اشفيييييييييج اتهربين من اسئلتي ....-تزيد حدة نبيل يعلو صوته نسبيا - ردي علي متفائله
ترد رشا بنفس الحده: لألألألألألألأ
ينكسر نبيل امام رشا تضع رشا يدها على فمها ...تقترب رشا منه ...يبتعد هو عنها واقفا ليعطيها ظهره
نبيل بلهجة المنهزم: زقاير قطعتها..... عسل شربت.....اعشاب لهمدت ....ازحير كليت....فرنسا ...امريكا ...علاج صيني ....علاج اردني ....علاج يمني ...شيوخ دين رحت ...اشياء اذكرها ...واشياء ما اذكرها....ادري مو قادر اسعدج ولا احققلج امنية كل مره ....قلت لج من خمس سنين و اكثر من مره شوفي نصيبج بعيد عني ...عيتي تحت كلمة نحاول ...تقاطعه رشا: قلت لك خلنا انتبنى , يقاطعها: انا راااااااااااافض هالفكره و المجتمع رافضها حتى لو ظاهريا متقبلها....اذا انا نفسي مو متقبلها ...
رشا: يقولون في علاج بالسعوديه امجرب و ...., يقاطعها: رشا لاتحاولين تجذبين علي وعلى نفسج اكثر من جذي ...أدري كل هذا من حبج لي....ترى توني ساد التليفون من دكتور عبداللطيف وبلغني انج كنتي عنده وبلغني عن كل شي دار ....- تصعق رشا اكثر- يكمل : رشا انا قررت وابيج تحترمين قراري ورغبتي اني ما احاول اعالج واترك الامر هذا اللي الله مو كاتبلي فيه نصيب .....تصمت رشا ....

تدير وجهها للناحية الاخرى.

...يعم الهدوء و الصمت على الاثنين ...

.وتتخالط الدموع بالانفاس ...

.تدير نفسها بأتجاه نبيل ..

.محاولة ابتلاع ريقها قائلة له : حبي نبيل ...انا بعد قررت ..................يتبع

اسمعها

طاح الريموت

نبيل:طاح الريموت
رشا:صامته
نبيل:اقولج طاح الريموت شيليه انتي اللي شايتته يصمت قليلا ...ادري فيج قاعده
رشا:ودام تدري اني قاعده ليش معطيني ظهرك وتسوي روحك نايم
نبيل:معطيج ظهري لأني من رديت من الديوانيه وانتي معطيتني ظهرج
رشا:لأنك ماحاجيتني
نبيل:مابي ازعجج
رشا:ماتبي تزعجني .....تصرفك هذا يزعجني
نبيل:دزيتي الاوراق
رشا:دزيتهم
نبيل:عيل ليش ما ياتج النومه لي الحين ما باجي شي على صلاة الفير..
رشا :افكر
نبيل: في الاوراق والعلاج صح
رشا:لا ابداااا ....الاوراق دزيتهم ..وارتحت و النتيجه يا بيقولون لنا تعالوا او بيقضبونا الباب
نبيل:زين ممكن تفترين علي وتكملين سالفتج...ما اعرف احاجيج وظهري بظهرج
رشا: مرتاحه جذي ....اقدر اتحجى بدون حرج
نبيل:مني حرج .....بعد 12 سنه يالظالمه
رشا:هذا اللي كنت افكر فيه...ال 12 سنه
نبيل يظحك ويتعدل بنومته بإتجاهها ...يحط ايد عل جتفها ويفرها صوبه بقوه .....:قلت لج تعدلي ماعرف احاجيج جذي ....يعدلها يقربها بأيده يمه ....يخلي راسها يم قلبه ....يقول لها :هم جذي ما تشوفين عيوني ولا تشوفين ويهي ...عدل
رشا:تبتسم ...عدل ...تتقوقع كالجنين
نبيل:شطرى عليج بالظبط سولفي حبيبتي
رشا:طرى علي شلون تيوزنا
نبيل:ويييي الله يذكر ذيج الايام ...تصدقين جنى امس..تذكرين شكلي ذيج الحزه
تطقه رشا على بطنه تقول:ماكان عندك كرش هالكبر...ولا كان عندك حرف ال ام براسك
يحط ايده بشعرها...وانتي ...ماكان شعرج فيه شيب ....وكان كثير معذب صبيان المنطقه ... اشوه انج تحجبتي
رشا:تذكر شكثر عرفنا بعض وتزوجنا
نبيل:ههههههه قصيتي علي ...شهرين
رشا:لا شهرين واسبوع
نبيل: افففف يا دقتكم يالحريم...اصلا عرفتج عشر ايام بس ...وقلت حق ابوي بتزوجها ....والله حدي خام وما افهم الشهرين واسبوع مراسيم الاقناع والشد والجذب ...حمدي ربج ان ابهاتنا ربع
رشا:تذكر انا شقلت حق اهلي عقب هالعشر ايام
نبيل:انتي شغلج كلا طفاقه وينون....اكو وحده تقول حق اهلها بنتحر عقب عشر ايام ....لالالا والله انتي مخلصه
رشا:اتمنى اني اظل مخلصه
يطوف نبيل كلمتها .......ويكمل حديثه
نبيل:ابوي قالي غصبن عليك تشتغل بنات الناس مو لعبه ...وانا كنت ادرس ...والله كليت تبن حزتها
رشا :وانا شكنت اسوي هم كنت ادرس ....تذكر دوامك العصاري مال وزارة الصحه
نبيل:تكفى لا تذكريني ...كنا بالارشيف بمستشفى مبارك ....وكانت الفيران اكبر من الملفات انتي تذكرين يوم تقولين لازم انساعد بعض ....وتشتغلين هم بالصحه تكتبين كروت العصر....حبيت منج هالموقف. مع اني ماكنت موافق عليه بس ابوج شقردي وحبيب ...يومها ..حسيت صج انج تحبيني
رشا:تذكر تاريخ زواجنا صادف الفلنتاين...وصارت زلقه بطيحه ...واحنا ماندري شسالفة الفلنتاين بس مع الخيل يا شقرا
نبيل:14\2\1984 كان عمري 20 ...
رشا : عشرين وثلاث ايام ....وانا عقب ملجتنا بشهر كملت 18 وخلصت الثانويه بعدها بشهرين

نبيل:ولا مهرج تسلفته من ابوي لين ما عطوني اياه الحكومه

رشا:احلى شي المضاعد اللي شريتهم حقي قلتلي يومها ترى نشف ريجي عشان اييبهم حقج وعطيتني يومها 100دينار قلتلي هذا مهرج اللي تعبت فيه وشبكتج...يا حلات دفاشتك

نبيل:تصدقين اذكر اني سويت جذي بس ما اذكر الحجي اللي قلته

رشا:اي انت ما تذكر الا البيزات بس الرومانسيات انا اذكرهم ..ماكو فايده
نبيل:تذكرين عرسنا....والله ما قصروا اهلنا
رشا:كان في حوش بيتنا....وامي يابتلي صنعه سوتلي يلوه.....وقعدنا اسبوع في بيتنا تالي ييت بيتكم ....تذكر اخواني واخوانك يوم يزفونا من بيتنا لي بيتكم
يظحك الاثنان جدا جدا ...تدمع عيناهم من الظحك
نبيل:خو محد عنده سياره كشخه .....اخوي واخوج تهاوشوا منو اللي يسوق السياره ...
رشا: اي اي ههههههه الله و الزفه ....من قطعه 2 لي قطعه 3 ليش لهواش مادري
نبيل:تذكرين يوم وصلنا بيتنا وشافوا الطريج قصير اشسووو ههههههههههههه
رشا :ايييييييييي قامو يفترون بالمنطقه فريج فريج ويطقطقون هرنات ههههههههه واحنا بالسياره ميتيين ظحك

يحل الصمت يعلوا صوت المؤذن ......يجلس نبيل على طرف السرير

رشا اتربع الصوب الثاني

نبيل:ترى اليوم اليمعه ....كثري الدعاء في ساعة استجابه

رشا:قوم تيدد ولا تروح المسيد بالجينز............يتبع