مسابقة قوة الملاحظه

ابو الطيب المتنبي

حوار شيق بين الاختين

صبحه

و

مبخوته

(اللي بين قوسين تعليقات عتيجه)

مبخوته: سمعي هالقصيده كفاصل اعلاني ...واذا ما فهمتي شي قوليلي لأنها غلجه:
صبحه : يالله
مبخوته: مالنا كلنا جو يا رسول انا اهوى وقلبك المتبول
مبخوته: كلما عاد من بعثت اليها غار مني وخان فيما يقول
مبخوته:أفسدت بيننا الامانات عيناها وخانت قلوبهن العقول

مبخوته: باكون (فصل مسنجرها ومندمجه مع اللغه)ة

مبخوته: تشتكي ما اشتكيت من طرب الشوق اليها والشوق حيث النحول

مبخوته: >>>>> واذا خامر الهوى قلب صب فعليه من كل عين دليل
مبخوته: زودينا
صبحه: مضارب بني عبس
مبخوته: زودينا من حسنك وجهك ما دام فحسن الوجوه حال تحول
صبحه: انا ما افهم الا زرشت وبيو بيو وبرو برو
بخوته: اششششششش مندمجه
صبحه: اوكي
مبخوته:وصلينا نصلك في هذه الدنيا فإن المقام فيها قليل
مبخوته: من رآها بعينها شاقه القطان فيها كما تشوق الحمول
مبخوته: صحبتني على الفلاة فتاة عادة اللون عندها التبديل
مبخوته: الله عليك يا ابو الطيب
مبخوته :اقولج تعرفين شيقصد بالفتاة
صبحه: لا
صبحه: فتاة ليل؟
مبخوته : ويهج فتاة ليل ...اقري البيت عدل وانتي تعرفين
صبحه: بنية (يكون مغيره الاجابه)ا
مبخوته: هذا المتنبي (وخير يا طير)ا
مبخوته: صحبتني على الفلاة فتاة عادة اللون عندها التبديل
صبحه: اشتبيني اسويله (عفارم عليج زين تسويين فيها)ا
صبحه: اهو المتنبي وانا المبتلي
مبخوته:يقصد الشمس ...أقري البيت وانتي تفهمين
صبحه: الشمس تصحبه في الليل؟
مبخوته:يعني صار اجلح الريال ههههههههههه من لمهايل بلشموس
صبحه: يستاهل
مبخوته: الفلاة = الصحرا
مبخوته: تدرين يتغزل بمنو بهالقصيده
صبحه: بمنو؟
مبخوته: حلب
مبخوته:حلب <<< الشام

مبخوته: هذي آآآآآآآآآخر قصيده كتبها وعقبها مات

مبخوته: كتبها بالطريج وهو رايح حلب ...من مصر(يعني بالمواصلات)ا

صبحه: الله يرحمه اكيد حاشته ضربة شمس

مبخوته: لأ ... اقتلوووه(وانتي ليش متأثره هالكثر)ا

صبحه: ليش؟ من قتله؟؟؟!!!!!

مبخوته: ما سمعتي عن الشاعر اللي قتله شعره

صبحه: لأ

مبخوته: هذا المتنبي

صبحه: قوليلي القصة شوقتيني

مبخوته:الله يسلمنا وياج... المتنبي كان من شعراء بلاط الدوله الحمدانيه

صبحه : طيب

مبخوته: يعني يمدح الامير اللي اهوه سيف الدوله الحمداني

مبخوته: منو اللي كان يغار من المتنبي ....ابو فراس الحمداني شاعر معروف ويصير ولد عمك يا سيف الدوله

صبحه: طيب

مبخوته: المهم سوى سالفه بين المتنبي وسيف الدوله لأنهم كانوا يحبون بعض وكان المتنبي ماكل عليه الجو لأنه افضل منه بالشعر

مبخوته: المهم المتنبي قال قصيده مشهوره يذم فيها ...فسيف الدوله كت على ويه المتنبي ماي مادري عصير مادري بيبسي مادري شنهو وطلع المتنبي بدون ما يستأذن من مجلس سيف الدوله ...اذا تذكرين القصيده اكيد سامعه فيها

صبحه:لأ

مبخوته : اللي يقول فيها: : الخيل والليل والبيداء تعرفني ...والسيف والرمح والقرطاس والقلم

صبحه: اي

مبخوته: انا الذي سألأ الاعمى عن ادبي واسمعت كلماتي من به صمم ... وبدايتها قال كلام يعور القلب : واحر قلباه مممن قلبه شبم ...وممن بحالي وجسمه عنده عدم

صبحه: طيب

مبخوته: مالي اكتم حبا قد برى جسدي ....وتدعى حب سيف الدولة الامم

مبخوته: فعيب الواحد يمدح روحه بمجلس الملوك,,,اضافه الى انه قال اذا رأيت نيوب الليث بارزة ...فلا تظنن ان الليث يبتسم وسيف الدوله حسباله يقصده

مبخوته : عقب ما خلص كت سيف الدوله الماي عليه علىويهه

صبحه: طيب

مبخوته: وطلع غضبان المتنبي من المجلس وهو مو راضي ثم فرض سيف الدوله عليه حصار انه ما يغادر القريه اللي عطاها اياه

مبخوته: انحاش المتنبي اهوه وولده وراويته راحوا مصر عند كافور الاخشيدي

مبخوته: منو كافووو ؟؟؟؟ ؟؟؟؟منو كافووور يا شاطره

صبحه: مو القصاب الي بمصر الجديده؟

مبخوته : تقريبا

صبحه: اشدراني منو كافور ..... كملي القصة مشوقه

مبخوته: كافوررر عبد (كلنا عبيد الله) كان عندحاكم وهالحاكم مات وكافور وصي على ولد الحاكم وولد الحاكم صغير .... فمنو صار يحكم مصر؟؟؟

صبحه: كافور

مبخوته: المهم قعد المتنبي عند كافور نيف من الزمن( ركزوا على نيف ترى تعبت مبخوته عليها) ا

صبحه: طيب

مبخوته: يمدح فيه على بو يبي يعطيه منطقه .... شي ما شيات

مبخوته: وهذاك نيدي ما عطاه شي

مبخوته: هههههههه ركزي على نيدي

صبحه: زين

مبخوته: ويبي بنفس الوقت يوصل رساله غير مباشره لسيف الدوله ان كافور احسن منك قعد سنييييييين وبنين وما حصل شي من كافور ....المهم وعسى الله يسلمج يامحفوظة السلامه

صبحه : ويسلم حبايبج

مبخوته : في تلك الاثناء تزوجت حبيبة المتنبي

مبخوته : لالالالا ما تيوزت ... ماتت اللي اهي منو؟؟

صبحه: منو؟

مبخوته: اخت سيف الدوله ...اسمها خوله

صبحه: بل

مبخوته: وقال فيها قصيده مشهوره يقول مطلعها

صبحه: الله يعين قلبه

مبخوته: ليالي بعد الضاعنين شكول ...طوال وليل العاشقين

مبخوته: يبن لي البدر الذي لا اريده ويخفين بدر ما اليه سبيل

مبخوته: ...عقب هالسالفه ...اكتشف سيف الدوله الوشايه اللي كانت من ولد عمه ابو فراس الحمداني ضد المتنبي

صبحه: زين

مبخوته: ودز مرسول للمتنبي يترضاه فيه ويطلب منه شخصيا القدوم لحلب وطبعا المتنبي كانت ضايجه فيه الوسيعه من كافووور لأن ماعطاه مراده ...ونفسيته حدها تعبانه وشيقول بعد لاطار طيرك قول سبيل

صبحه: طيب

مبخوته: المهم نوى انه يسافر حلب

صبحه: ما صدق على الله

مبخوته: وقبل ما يسافر وكانت ليلة عيد.....عيد الاضحيه هقوتي... كتب قصيده مشهوره ...واسمها عيد... يقول بمطلعها : عيد بأي حال عدت يا عيد ...بما مضى ام بأمر فيه تجديد

مبخوته: وسب كافور سببببببببببببببب اليهد فيها قلبه مجحوووون عليه

صبحه: زين

صبحه: بعد اهو ماله صاحب

مبخوته: قال : ولا تشتري العبد الا والعصى معه ...ان العبيد لأنجاس مناكيد...... هذا الطف مسبه قالها

صبحه: والله لسانه طويل

مبخوته: المهم قال هالقصيده وتناقلتها الناس وانحاش ..قب اهوه وولده

صبحه: طيب

مبخوته: كافور كبرت براسه وقال والله لا اوريه ....وطبعا كافور يدري ان المتنبي ما يروح غير حلب

صبحه : زين

مبخوته: عراقي ماكو فايده .... ماله صاحب

صبحه: لووووووول عراقي وعبد مصيبه

مبخوته : المتنبي لعراقي مو كافووور ههههههههه كل ساع بديره

صبحه: ايييييييييي .... عدل مالهم صاحب

مبخوته: المهم هذاك انحاش وهذاك دز وراه اعتقد ثلاث فرق بس علشان يقتلونه .... واثناء الرحله كتب القصيده الاولى اللي قلت لج اياها.... وقبل ما يوصلون حلب واظن هالحجي كان بنجد او العراق لأن غيروا الوجهه المعهوده لحلب ..... صادتهم احد الفرق بالليل .....واهم نايمين ...قدر المتنبي وولد انهم ينحاشون واثناء النحشه قال محمد ولدك يا المتنبي للمتنبي ...ألم تقل في شعرك .....الخيل والليل والبيداء تعرفني ...والسيف والرمح والقرطاس والقلم .... قاله نعم قلت ذلك

لقد أرسلت لتوك إشارة تنبيه!

صبحه: معاج يا غبية كملي

مبخوته: قاله شلون تنحاش عيل ؟؟؟؟؟,,,, جان يرجع المتنبي ويقاتلهم.... كانوا اهم ثلاثه المتنبي وولده وراويته ...والباجي كانوا وايد

صبحه: يعني ولده الخبل قضى عليه

مبخوته: ذبح منهم وايد.... لكن بالنهايه الكثره تغلب الشجاعه.... ومات المتنبي ,,,, الشاعر الكبير الذي خلده التاريخ

صبحه: وولده الخبل؟

مبخوته: وقبره الحين اظن في بغداد او شي جذي المهم في لعراق ...ولده ينطرج عن باب الجمعيه .... كلهم ماتوا

صبحه: عراقين مصرقعين

مبخوته: لا حبيبتي هذي مروءه ومحد يموت الا بيومه

صبحه : يازين السوريين .... يقولون الهربيه ثلثين المرجله

مبخوته: ثاني شي عيب ان الشاعر يقول شي وما يطبقه عندهم قبل ..... اصلح حبابه ؟؟؟

صبحه: تصلحين والله تصلحين

مبخوته: ترى باجر اطلع بالرادو لاتشيشيني

صبحه:تدرين اني خريجة لغة عربية وكل هالسالفة ما اعرف عنها شي

مبخوته: يا حظييييييييييييييييييييييييييييييييييييييييييييييييي

صبحه: بعد شسوي

مبخوته: يمكن لأنج ما حبيتي تخصصج

صبحه: صح

مبخوته: انتي مال علم نفس علم اجتماع مو مال لغه عربيه

مبخوته: صح

صبحه: يالله معوضه الحين ان شاء الله

.

اشكرك شكرا جزيلا على قرائه القصه الطويله وعلى اعطائي من وقتك

سؤال يطرح نفسه واللي يجيب عليه صح له هدية رمزيه مقدمه من قبل الراعي المعنوي لبلوق عتيجه ام مضحي

من هما صبحه ومبخوته ؟؟؟؟

الشرط الأوحد:

نص الإجابه لن تقبل

تعديلات بناء على طلب مشاري

يقول مشاري ان السؤال وايد صعب واني ما لمحت بالمره

من خلال القصه كل وحده عطت معلومات عن نفسها بطريقه او بأخرى

الحوار دار عبر المسنجر وهو حوار حقيقي

وبناء على رغبة مبخوته وبموافقه ومباركه من صبحه تم نشره مع تعديلات بسيطه بنسبة عشره بالاميه او اقل من قبل الناشر

صبحه ومبخوته اصحاب مدونات ..ولهم عدة تعليقات في مدوناتكم

بعض الاحيان لما تكتب صبحه بوست تييب طاري مبخوته والعكس صحيح

اللي متابع بيعرف

واللي مو متابع خل يتابع

ولاتنسون ان اسمها مسابقة قوة الملاحظه

ولا تنسون الهديه

:)ونصف الاجابه لن تقبل:)

زواج + تشره + حجرتي

thx Kazmawy :D

اليوم والله صار شي حلو ومؤثر اليوم ملجوا عيال خالي اثنينهم ...وبنفس اليوم ...

حلو ان الاخوان يملجون بنفس اليوم

والاحلى ان الخوات بعد

لكن الواحد يخاف من العين الله يكافينا الشر

احبهم وااايد ...واحب لهم الخير وبما ان شغلي كلا عالسريع

فشوفوا الطفاقه

عطيتهم هداياهم الخميس اللي طاف قبل لا يملجووون

هههههههههههه

طبعا الحين اللي في باله عطيتهم فلوس

واللي في باله عطيتهم اقلام ولا بواكه ولا بطيخ

عطيتهم كوبانات تصوير مجانا

مو خوش هديه ؟؟؟؟؟

علشان كل واحد وعروسته يروحون يصوروون وكل ما يطالعون الصور يتذكروني

عاد تهقون بيتذكروني ؟؟؟

ما ظنت كل واحد بيطالع ويه مرته وبينسى ويه عتيجه لمجثي

ما عليه

تصدقون ...بروتوكول الهدايه ما يعجبني

وعلى قولة خواتي عتيجه الامريكيه ...انا مو امريكيه ..بس الهديه اذا وديتها من غير نفس ما اعتبرها هديه ..يعني اودي هديه لأن فلان ولا فلانه يايبتلي هديه ....هذا ما تعتبر عندي هديه

كلكم بتقولونلي عدل كلامج

بس في منكم صعب انهم يطبقون

او ساعات الوحده مديونه ولا فقيره ولا شي ما عندها فلوس تضطر انها اتسلف علشان تييب هديه واذا ما تسلفت ما تروح

هااااااااه ليييييييييش؟؟؟ شنو هلبروتوكول لكويتي السخيف

يعني ماظنتي الناس عليها قاصر ومعتازين هديتي

ولا اظن اني بحاجه لهدايا المجاملات اللي تيي من غير نفس

اذا ولدت وحده لالالالالالالالازم استقبال ...مو علشان الياهل ..ولا علشان سلامتها علشان الهدايا ..صحيح بروتوكول الاستقبال شي زيين ..لكن الوحده علشان تفرح واتباشر بالناس ابطلعتها من لنفاس مو علشان فلانه تقط عليها خاتم والثانيه مضعد ...اللي يبي يهدي يهدي من غير مناسبه

او يهدي سواء في حفل او استقبال ولا مافي

مابي اكثر حدي اظن الفكره وصلت

وترى انا ما استحي

عاااااااااااااادي ادش على ناس ومابيدي هديه شنو يعني ..؟؟؟!!!!

او هداياي تكون بسيطه او مو بسيطه على كيفي وعلى نفسيتي وعلى مخباتي

مافي اي مشكله ان شا الله

التشره ...

ترى من تشره...تكره

اليوم بنت خالي تشرهت علي لييييييييي الستار

لا تدقين ولا تسألين ولا مسج ولا حتى اشوفج ولا لاولاولاولاولاو وعيالي نسوا ويهج وانا زعلانه عليج

قلت لها انا ما ادق ..وقاطعه اوكي

انتي دقي...ولا استحيت منج من كثر ما تدقين راح ادق انا من نفسي

انا مشغوله وحدي اليمعات ..واذا عندي شي باليمعات احاول ادوس على نفسي وأوصلكم ساعات الساعه تسع او عشر وانتي يمعت حمولتج يوم الخميس شذنبي بالله ...

طبعا اهي قصدها امرها بروحي

واطلع معاها ..ونروح يميع ..وانا الصراحه الوقت اللي فيه فاضيه حق بيتي ..امي وابوي فقط

يمكن اهي في قلبها شرهه علي

لأنها تحبني

بس نصيحه

اذا جد تحب احد لا اتشره عليه

بالمناسبه عندي خاله طبعها طبعا من الله التشره

لأني طبع ما يزول ..لأن اليبل (يزول)والطبع ما يزول

وأقلمت نفسي معاها على هالطبع يعني اول ما تتصل فيني وادري انها بتشره

اشيل السماعه واقول لها شدعوااااااااا شدعوااااااااااا يا حافظ ام حصه يعني ما تدقين ولا تسألين الا اذا طرى على بالج شي

خدوهم بالصوت لا يغلبكوا هذي سياستي معاها

كل ما صار شي قبل ما اتشره اهي اتشره عليها وافتكيت الحمد الله

وخالت ابوي كل ما تشوفني اتشره على ابوي

صراحه يحق لها

وانا اقول لها لا والله صاجه عيل في واحد ما يروح حق خالته الا بالمناسبات ..عندج اياه انا اراويج فيه لوووووووول

وابوي يقولي يعني الحين ابيج عووون صايرتلي فرعون

اقول ..معاها حق المره ما اقدر انصرك عليها ولاتنسى ان خالاتكم امهاتكم يعني امك الحين مو موجوده خالتك موجوده وبرها من بر الام ..يالله راونا برك لأمك

:P

بس جد يا حلوين يا شاطرين اذا تحبون احد لا اتشرهووون عليه ترى التشره ينفر البني آدم ...مثل ما نفر ابوي من خالته..

ويفشل بعض الاحيان ..

داري

داري وما ادراك ماداري

ودي احطها هنيه بس مستحيه الصراحه ..يعني شكلها جداجدا كسيف

على بو بعدلها

وعلى بو ان فهد قالي ابدي من الثلاجه ..قلت يالله من الصلاجه من الثلاجه

ترى الصلاجه بدليه هههههههههه

المهم

شلت كل الكتب والاوراق ولسلال والجناط اللي عالثلاجه

وحطيتهم عالقاع

واحوووس واحوووس شبدي فيه عقب الثلاجه شبدي فيه عقب الثلاجه قلت ماكو الا التواليت ..(التسريحه) يالله فوقه ......

تالي قبل ما اخلص بديت بالكتب ولا الاقي هدوم شتويه هاه ليش ما حطيتهم بجانط

نص ساعه ولا العفسه تحيط بالمكان

هدوم بالارص واوراق وكتابات شغلاات اطلعت من ورى القنفه

والله يا الانتيكات اللي عندي

اول كامره

اول موبايل وثاني وثالث

بيجر

تلفزيون

كلا شغلي قديم

عتيييييييج

داري صارت ادثر

لكن والله بقلبي اني اسنعها

يوم الاربعاء ..وما ادراك ما يوم الاربعاء اهوه يوم الوعد ...وبما ان فهد مرتب فأكيد يذكر ..اني قلت له يوم الاربعاء

وللأسف ان ام نبيل معاي ..كانت تبي تسويلي شغيل

وانا بالطريج ادعي اقول ان شا الله فهد ما يمرنا اليوم

ام نبيل تقولي لالالا بو سعود ما ينسى ..لأن مرتب ويعرف المواعيد

المهم وصلت

فهد مو هنيه حمدالله

الساعه ثمان بالتايم ولا ..هاللي فوق راسي ...ألسلالالالالالام عليكم

ع : هي هي هي ..وعليكم السلام

ف:شلونج شخبارج عساج طيبه

:Dزينه

ام نبيل الملقوفه نطت ...فهد تعال شوف دار عتيجه واللي يسلمك ...الله يهديك يا فهد حتى الخدم مو مخليتهم يدشونها قايله انا بعدلها بروحي

ف: شصاير شمسويه ؟؟؟

ام نبيل : كتب وهدوووم وجرايد ومجلات و كل ما يطري على بالك على فراشها ...وعالأرض

ف: لالا اهي نيتها صحيحه لكن بدايتها غلط

انا طبعا استانست

وقعد يشرحلي مره ثانيه شلون ابدي صح

الأوراق

الملابس

استغلال الاماكن اللي ما اعتقد اني بستغلها

وعلمني من وين اشتري الارفف ..وقالي اهم شي تشوفيلي العناصر اللي مسويه دثره بدارج وتكتبليلي اياها على ورقه ..علشان نعرف شنو نوفر لها لتنظيمها ونعرف نحطها بمكانها الصحيح

وحطي سلتين ...سله للهدوم الوصخه وسله للهدوم النظيفه وانتي ترتبين ..وقسمي تواليتج قسمين قسم للشغلات لصغيره والدقيقه وقسم للشغلات الكبيره والثقيله ...

طبعا ركز وايد على كتابة محتويات داري ...علشان نعرف اننظمها يميع والوعد الاربعا الياي ان شا الله

شفتوا شلون ترتيب الغرفه يبيله قلب وبال وفكر وكل شي اكتشفت هالشي يوم شرعت في ترتيب حجرتي وبروحي ...وفعلا اقتنعت بكلامه ترتيب الحياة يبدأ من ترتيب الحجره ...ويبي يشوف صورتها بعد لأني راويته صورتها وهي عفسه وما علق :)اكتفى بالابتسامه الدائمه

عاش بو سعود ..والله ما قصر معاي :)

و الوعد وين عند باب العماره

عند باب العماره الوعيد وين

..............................................................................................

ترقبواااااااااااااااااااااااااااا

البوست القادم

وعلى شاشة بلووووق عتيجه

ولأول مره

واعتقد

آخر مره

القصص الهادفه

بالطريقه الحواريه الادبيه

بين الاختين

صبحه

و

مبخوته

في

قصة

شاعر الشعراء

(أبو الطيب المتنبي)

انتظرونا.......ولكم منا المزيد

فهد .....مع التحيه :)

حياتي مبعثره غير مرتبه افكر وافكر وافكر .....اليوم نص تفكيري بنفسي

سبحان الله بطلعتي من المكتب ولا بدخلة فهد

فهد جد جد اخوي ووايد احترمه واحبه لأنه نقي ومايشيل وفوق هذا مرتب

فهد: يعني اذا حضرت الشياطين ذهبت الملائكه

عتيجه: لا والله ابد ؟؟ انا كنت مترخصه وثاني شي انت قاعد اتحجى بالتليفون

فهد: اخليك ...اذا مادليت دق علي اوكي ...سدينااااه

فهد انسان منظم يشتغل اكثر من شغله وبأكثر من مكان ومشرف على 15 مكان مهم جدا و و و و ما شا الله عليه

وغالبا ما الاقيه مبتسم

يظحك

يسولف

وما اذكر مره شفته ما له خلق نفسه

عتيجه: عيل راح اقعد خمس دقايق فقط

فهد : الله يعافيج قعدي خمس دقايق ونص

عتيجه: ولا يهمك ونص بعد زياده

عتيجه: فهد حلوووا المجلس

فهد : وخير يا طير بيعيدون الانتخابات 29 شنو يعني

محمد يدش عرض مع ان كان عالكمبيوتر مندمج

انت كل شي عندك بالحياة بسيط ...وماعندك اي مشاكل

جان يقوم فهد ويقلب اقلاص عالمكتب فيه حجاله ماي

وتصير بقعة ماي صغيره عالمكتب

جان يقول ماي انكت اقدر اتصرف تصرفين الأول وهو السائد

اقول وااااااااااااااااااااااااااااااي يا جمااااااااااااااااااااااااااعه انكت ماي تعالوااااااااااااااااااااااااا مشو الماااااااااااااااااااااي خربتوا المكتب

واقدر اير لكلنكس

ويره

وامش الماي من غير حتى ما احاجي نفسي عدل ولا لأ؟؟؟؟؟؟؟؟!!!!!!

عتيجه داشه عرض

فهد!!!!

فهد : خير اخيتييي

عتيجه: انت انسان منظم للنخاع ما شا الله عليك ..ومنظم حياتك وحاولت اني انظم حياتي ما قدرت

ممكن تعلمني او تنظمها لي مره وحده

فهد: رتبي دارج؟؟!!!!

عتيجه:حاولت بس ماني عارفه شلون ارتبها بصراحه

فهد :انتي نوعيتج تحطيت لسوييج والبوك برا الجنطه ولا داخل الجنطه

عتيجه:بالجنطه

فهد : اوكي حلو ..عندج ثلاجه بدارج

عتيجه: عندي وما تشتغل صارلي ست شهور اذا مو اكثر قايله بصلحها وما صلحتها

فهد: واكيد فوقها اغراض الدنيا والدين

عتيجه : ايييييييييييي

فهد: نظفي ثلاجتج وحطي في بالج ان جنطتج وسويجج على الثلاجه وهي نظيفه بالكامل ...وييبي ارفف بلاستك ...للأوراق فقط

باليراره الأولى حطي اوراقج الخاصه ..شهادات ..كفالات اوراق خاصه

باليراره الثانيه حطي اوراق شغلج

باليراره الثالثه حطي اوراق هوايتج

بالرابعه حطي قرائاتج الجانبيه اللي تقرينهم بالشهر مره مثلا

والكبت قسميه ثلاث اقسام ...القسم اللي يم باب الطلعه خليه للشغلات العمليه اللي كل يوم تلبسينها

القسم الثاني لملابس البيت

القسم الثالث للملابس الفورمل الرسميه والرزه

وقولي للخدامه اذا يت لاتحط ملابسج بالكبت خل تخليهم على لفراش

وييبي اجنده

وعطيني جدول حياتج وامري لله ارتبلج حياتج وبدون روتين :)

عتيجه : اوكي كتبت كل اللي قلته وان شا الله يوم الاربعا اييبلك جدولي اليومي واكون منفذه كل اللي قلته بس ما قلت لي وسيارتي ..ترى حدها لويه وجنها سيارة عزوبي ؟؟؟؟

وسيارتج دخليها القراج وحطي جيسين معاج جيس سنع وجيس عادي

الجيس السنع حطي فيه كل شي مهم بالسياره

والجيس اللي مو سنع قطي فيه كل شي ما تبينه

وترى حطي في بالج ان ترتيب الحياة يبدأ من البيت

ولا تصيرين عمليه وااايد ترى ماني قادر اطلع من عمليتي وغيري من نفسج

يعني ليش ما تهتمين اببشرتج؟؟؟!!!!

عتيجه : :D

فهد: وليش ما تلعبين رياضه

عتيجه: شدراك؟؟؟

فهد : لأن الأولى نفسج انت ليش كلا ناسيه روحج جددي من نفسج غيري نوعية لبسج هالشغلات كلها تجدد الحياة

عتيجه: يصير خير

فهد: يوم الاربعا يبين كل شي

عتيجه : اي والله يوم الاربعا ان شا الله ...وعلى فكره ترى محمد يبيله مثلي واكثر بعد

فهد: محمد يبيله اخصائي نفسي ..

محمد يخمط اوراق من مادري وين : يقول وييييييه يبيلي اكثر من عتيجه

فهد: ادري ان شغلكم ماشي عدل لأنكم اثنينكم لويه وعفسه ففاهمين بعض

مدة الحوار 20 دقيقه :) مو خمس دقايق اضافه الى اني ما كتبت كل شي دار :)كتبت الشي الاكثر افاده

هذا حواري دار اليوم بيني وبين فهد ...حسيت اني راح اطبقه صج ...وحسيت انه في فايده لكم من جذي قلته ...ويوم الاربعا يبين كل شي

والوعد وين؟؟؟ عند باب العماره

عند باب العماره؟؟ الوعد وين

انا متعبه

ارجو المعذره

الساعه ثلاث الفجر

و 54 دقيقه

عيني متعبه

جسمي منهك

ماني قادره انام

..........................................

لا استطيع انجاز اعمالي!!!!!؟؟

لماذا انجز اعمال غيري واعمالي لم تنتهي؟؟

لماذا خارج البيت فقط انا محل ثناء؟؟

لماذا اشعر بالوحده عندما اريد ان اشكي؟؟

لماذا عندما تنتهي المتصله الشاكيه من الكلام تقولي تصبحين على خير وما تسألني ...صوتج متغير؟؟؟

لماذا ويهي يقول للناس اشكو لي طلعوا اللي بقلبكم؟؟

لماذا لا يوجد مساحه لنفسي مع نفسي

لماذا يحكم علي اهلي ان مساحتي لهم ...لهم فقط؟؟ولا مساحه لنفسي؟؟

لماذا السعاده في عيون البعض امرأه مع زوج؟؟

لماذا انشغلاتي اصبحت تفاهات غير مهمه ؟؟؟

لماذا عندما اتعلق بشيء اتعلق به لآخر نفس ...او حتى يتخلى عني؟؟

لماذا عندما اسولف عن انشغالاتي ارى عيون ..لا تأبه لي؟؟وارى مقاطعات من الجميع ...لأن موضوعي تافه؟؟

لماذا انا الفاصل الفكاهي في حياة الكثيريين ممن حولي

وبعض المدونين؟؟؟

لماذا افقد التقدير ؟؟؟ وخاصة في منزلي؟؟

ليييييييييييييش انا طوفه هبيطه في بيتي وبرا يحسبولي الف حساب؟؟؟؟

وليش اهلي ما يبون احد حتى برا يحسبلي نص حساب؟؟؟؟

ليش دايما سيارتي اتغسل آآخر سياره؟؟؟

ليش لما انزل تحت القاهم مو حاطيلي ريوق؟؟؟

ليش داري تظل يوم ويومين ما تنخم؟؟؟

ليش هدومي ما اتغسل الا بالشهر مره او مرتين؟؟؟

ليش دايم اطق السدر واتحمل اغلب مسؤوليات البيت؟؟

ليش اروح المرور والداخليه وحق الخدم و الوزارات والهيئات و و و و و ووانا ابتسم؟؟

ليش ابوي يحبني وااااايد؟؟؟ ويحس انه متملكني؟؟؟

ليش امي تبيني مثل لاعب الاحتياط وتهيئني لحياة زوجيه بس مهي عارفه شلون؟؟؟

ليش غالبا اوضع بمكان قيادي بالخارج؟؟؟

ليش الرياييل يحبوني اكثر من الحريم؟؟؟

ليش انا احب امي وابوي واااايد ويهمني زعلهم او حتى خاطرهم لو ما تحجوا؟؟؟

ليش ما ودي اكلف على احد؟؟؟

ليش ما احب احد يخدمني حتى اعز الناس على قلبي؟؟

ليش محاولاتي لأرضاء غيري تسببلي ضغط نفسي؟؟؟

ليش هليام عدادي ما ينزل عن ال 140؟؟؟

ليش غالبا محد يقول كلمة مشكور مجازا؟؟

ليش محد يقولك يا مبدع الا بالنت؟؟

ليش انا حساسه وااايد؟؟؟

ليش احس بغصه بقلبي؟؟

ليش آخر بوست كتبته طلع من غير نفس؟؟

ليش صار في هجره من لبلوقات ؟؟؟

ليش الريال اذا غلط غلطه كبيره يزغرونها واذا المره غلطت غلطه زغيره يكبرونها؟؟؟

ليش الابو آآآخر المطاف ينفذ كلام ولده؟؟؟

ليش الام تخاف من ولدها؟؟؟ وتقول ما اخاف منه بس اتحاشاه

ليش الخيانه صارت اببيزه بديرتنا؟؟؟ولا تقولون لي الامبرياليه الصهيونيه

ليش صار قدر الآدمي بسيارته؟؟؟

ليش صار قدر الريال ابشهداته؟؟؟

ليش صار قدر المره بجمالها؟؟؟اقصد شكلها النهائي بعد المكياج

ليش المره المثقفه صارت امعقده؟؟؟

ليش المره اللي تحاجج صارت ملسونه؟؟؟

ليش الدين صار عدد لدروس اللي يروحلهم البني آآدم؟؟؟

ليش المسايد فاضيه حزة صلاة الفير؟؟؟

ليش صوت الصلاة ما قام يصدح مثل قبل؟؟؟

ليش الوحده اذا تقدم لها ولد عايله ومنصب نست مبادئها ؟؟؟؟

ليش مااحب اجذب؟؟؟مع العلم اني ممكن اجذب استغفر الله

ليش ما احب الخش والدس؟؟؟

ليش احب اكون سيده؟؟

ليش ما اعرف اسوي شي من ورى احد؟؟؟

ليش احب اشرك اسرتي في كل صغيره وكبيره بحياتي؟؟؟

ليش احب الشعور العائلي؟؟؟

وليش احب اكيف حياتي عالاستقلاليه؟؟

ليش هنودنا مطيحيين الميانه معاي؟؟؟

ليش اللي يبيعون بجمعيتنا مطيحيين الميانه معاي ؟؟؟

ليش صديقتي الحميمه ام مضحي؟؟؟

ليش اذا تظايج عزيز علي اتظايج حتى لومادري شالسالفه؟؟

ليش ما احب احس اني عاجزه عن فعل اي شي؟؟

ليش آآخر وحده افكر فيها عتيجه؟؟؟

ليش لما ودي ابجي ما اقدر ؟؟؟

بنفجر ......

استغفر الله يا ربي

لا اله الا انت سبحانك اني كنت من الظالمين

انا مو قد السوق !!!!!

اليوم الله وكيلكم رايحه السوق مع اختي ومو رايحه سوق سوق لا رايحه سوق كلا خامات وطاقات انا جد داشته من قبل بس عاد اول مره ألوي جذي الصراحه راسي افتر

اختي تحاجي راعي المحل عن الخامات وانا لأن مو اهتمامي ولأني مو صوب هالسوالف احس جنهم يتحجوون سانسكريتي

اختي:عندك شيفون ستان كافالي

الريال: لا عندي بربربربر

اختي:ويييييه هذا قديم ال بربربربر

الريال : لا والله جديد .. المر مر مر اهوه اللي قديم

طبعا انا كنت اسمعهم جذي و اذا شي مو من ضمن اهتماماتك تحس كأن تفاهه

وكل ماتقولي عتوج نقيلي خام اقول لها هذا

خو انا شعرفني

تقولي هذا قديم دارت عليه سنتين

زين هذا

هذا اعتج

هاه شسوي ما افهم بهالسوااااااااااااااااالف

يعني خام حلو قديم ولا يديد بقول حلو شدراني

لبسي كلا فورمل

او عملي حدى

يعني لا البس حراير

ولاشيفونات

حدي نيسووو وقطن و جينز

تقول حق راعي المحل مابي ايطالي يتسلل عطني كوري الكوري احسن

وتسند علي الحجي تقولي صح عتيجه

(طبعا انا مادري شالسالفه)

اقول لها والله شوفي هذا له مميزات وهذا له مميزات

الايطالي يتميز انه طايح والكوري يتميز انه طايح بس مو وايد <<<<< يكون صايده الحركه

ويقوم الريال يطلعلي ايطالي وكوري يقولي شوفي ماكو فرق

وانا اسوي روحي فاهمه اقوله لايمكن

صدقني غير

يوم لمستهم ولا ماكو فرق

: ) عاد طبعي ما احب اتفلسف زايد

جان اقوله اي صح شرق آسيا بدى يغزو اوربا

!!!!@@طبعا الريال مايدري شالسالفه

عاد الحين بختار حق روحي خام

جان اختار خام حق قميص مادري شلون قايل جان تقولي اختي وييييييييييه هذا من سنةالف وحطبه وحتى شوفي مابقى منه الا لونين

<<< يعني تحسون خبرة سوقه

بس عاد اللي براسي براسي قلت ابيه

شبسوي فيه مادري قلت نفنوف

ولا اي شي ثاني

ولا قميص ...

قلت حق اختي مقاسي ومقاسج ما يفرق وايد سويلي اي شي على كيفج مالي خلق لويه مخايطه

حدي عليوي اللي يم بيتنا غير جذي انسي

وما شا الله كل ما دشت محل قال ماما انا ما يجذب عليج انتي زبوووون

اقول لها انتي ماكو محل مو زبونه عنده

؟؟؟مادري تشتري كل يوم ولا شالسالفه

دشت محل جان تقول هالمحل اول مره اشتري منه قلت زيييييييييييييين جان تقولي ايه لأن يديد

طقتني البوهه!!!!

عقب ما خلصنا من جولة الخامات نشف اقصى ريجي انا مو متعوده على هالشكل الاماكن اللي اشتري منها اعرفها

جان تقولي يالله الحين خلنا ندور اكسسوارات

شحححححححححححححححححححقه

جان تقولي حق القمصان

@@

بععععععد

لأ تكفين

واللي يسلمج

آآآآآآآآه يا قلبي

المهم رحنا حق هندي

بط اقصى جبدي

لقينا اكسسوار بروش واحد سماوي عجبها ماكو الا اللي عارضينه عالكارتون برا

جان تقوله مو مشكله عطني اياه

وانا فيني نوووم مالي خلق دخت

شلعه جان يطير دبوسه

جان اقوله انت ليش دفاشه

مافهم شقلت

المهم جان يعطيها سعر غالي وينازرها جنها تطر منه جان اقول لها خلي يولي والله على شينه قوات عينه هم شالع دبوسه هم صكج بسعر خل نطلع سليمه تصكه وتصك محله فوقه

ونحوس نحوس نحوس

وانا مابي احوس بالشمس عاد

المهم الحين بقعد ولا الكراسي كلها دريوليه ورياييل وين اقعد يعني

على راس الحامل

لقيتلي صبه

وحماليه ماما تبي عربانه

كلها جياس خامات احط عربانه ليش بعد

ماما تبي عربانه

ما باجي الا يحطوني انا بالعربانه ويدزوني بالسوق

نفس قبل ابوي لما كان يوديني معاه الفرضه

شوي الا اختي يايتني

تقولي ما رد الجلب عالقصاب

قلت لها شقصدج

جان تقول ماكو غيره الهندي الخايس اللي مساع

والله يحسبون روحهم بدبي مالت عليهم

شايفين روحهم ويزفوون

قلت لها كيفج روحيله بس لو يموت ما راح ادش محله

صدقيني في زبونه بتدفع اكثر منج

قالت خلاص امشي هناك

قعدت انطرها برا الدكان

طلعت ايد ورى وايد جدام

جان تقولي انا بقول حق راعي المحل هذا ما يستحي على ويهه قلت لها شقالج اسكتت وادري اسككت لأني انا حدي فاصله وممكن ارتكب جرم

وانا اذا مو نايمه افصل فصله مو طبيعيه

ركبت السياره وقلت لها انتي سوقي وركبت المظلات وجفست رويلاتي ورديت اببيتي وتحممت وصليت الظهر وكاني قاعده اكتب الحين

بس صج سليمه تصكهم هلهنود شايخييين

يقولون هذيله كلهم يايين من دبي

من جذي شايخيين

والله قبل كنت احبهم لأنهم خضوعين ولي الحين حرام

بس بط جبدي

اما من ناحية اختي بالله المستعان ان شا الله

انا ما احب اخيط لأني احس ان الموضوع ياخذ من وقتي اللي المفروض اسوي شغلات اهم فيها

والله استغرب عالناس اللي مثل اختي

صج اذا ماكو مقاقه حق هدوم وهالسوالف اصير متملله

بس والله اختارت خامات حلوه حق شغلات حلوه وبعد جبدي كل ما يعبجها خام تقولي عتيجه ما تبينه اقول لها تسليمن

عاد صج اختي هذي الله يوفجها راح افقدها لا تزوجت

لأني اهي اللي ما شا الله تظبط الاحتفالت

كل شي ...ورياله

وبالنهايه اختي واحبها عسى الله يوفقها

ويوفق الجميع

ادعولها بالتوفيج

اشارات

اشارات:

غبت عن لبلوق يوم ولقيت 16 كومنت
لقيت ناس تهاجم وناس بصفي
لقيت في ناس لهم اكثر من رد
لقيت نجرة حلوه بين ريما ومشاري وطبعا هالشي يديد لأنهم مو متعودين على هالنجره

الله لا يخليني منهم

ماتدرون شنو شعوري

حسيت ان في ناس بس ودها اكتب شي

حسيت اني محبوبه

حسيت بأهميتي بلبلوق وخاصة ان وجدت متابعين لتعقاتي بالكومن الثاني

ريما نجرتج ويا مشاري تذكرني بنجرتي مع كظماوي

:)

اي غياب عن لبلوق بسبب الانشغال

مو كسل :)

احزنتني نونو -نون النساء-عندما كتبت نهايه

احزنني آخر ما كتبت ام حمود-صباحك سكر-ومسني من الداخل

احزنتني ناديه لما شالت اغراضها من المدونه

وغيرهم الكثير

:)

عندما تنتهك الخصوصية!!!!

الخصوصيه

ما ذا لو تطفل البعض عليها؟؟؟؟

ما ذا لو اكتشفت خصوصية البعض مصادفه؟؟؟؟

ماذا لو زرت مكان واكتشفت مصادفه ان لأخيك بيت به زوجه اخرى ؟؟؟

ماذا لو وجدت احدهم يفتش في تليفونك الخاص وفي وضع مريب ومن غير اذن؟؟؟

ماذا لو سرق ايميلك- موبايلك-لابتوبك؟؟؟؟؟

لكل فرد منا خصوصيه طالما سعى لأن يحافظ عليها

لا يطلع عليها احد

او القليل منا من يطلع عليها المقربين

ولا يطلعهم عليها كلها

لطالما سعيت لأن احافظ على خصوصيتي مثلي مثل غيري من البشر

ولطالما سعيت لأن احافظ على خصوصيات الناس قدر المستطاع

اسماء

صفاة

اطباع

ارقام هواتف

وحتى اشياء تافهه بالنسبه لهم ولكنها عندي مهمه

الى درجه تكاد تكون ممله لدى مجتمعنا الكويتي الذي من عادته الجديده وليست القديمه ان تنتهك الخصوصيه علانيه

كأن اكون متحفظه على وضع اجتماعي

مطلق

عازب

نرى الكثير من الكويتين يسولفون اشكره

والله فلان مرته روسيه

وفلان مرته ايرانيه

انتوا شكووووو

وبالمقابل تلاقيهم ما يحبون احد يتكلم عنهم بنفس الطريقه

نفوس مريضه

او كوني لا أسئل اسئله لأي كان من الاشخاص

الزملاء وحتى الاصدقاء بغير حدود موضوع الحوار

اتبع قاعده ذاتيه ..ليست من فيلسوف ولا من كاتب معروف

الانسان الذي امامك يريدك ان تراه كما يقول لك وكما يفعل لك

اي بلكويتي لو ابي اقولك اي شي عن روحي راح اقولك بدون ما تسأل

اذن السؤال ماله داعي

اي معلومه تعطيها للناس فهي ستصبح لألسنة الناس

كأن تقول احداهم في مجلس انا مطلقه وطليقي اذاني من مخفر لي مخفر

فلاتستطيع هي ان تحاسب اي انسان يقول فلانه مطلقه وطليقها اذاها من مخفر لي مخفر

ولكن من العيب ان عرفت مصادفه عن موضوع طلاقها ان اتكلم به

او حتى اشير لها شخصيا بمعرفتي عنه

وما ذا استفيد؟؟؟؟؟!!!!!!!!!

بلاغة شف ولا يعني انا ادري وانا شاطر

من السهل تتبع الناس

وتتبع خصوصياتهم

من السهل ملاحقة اي زميل

زميله

صديق

صديقه

اخ

اخت

ام

اب

او حتى انسان ليس لنا علاقة مباشره فيه

او ليس لنا علاقه فيه نهائيا

ولا يوجد ما يمنعنا قانونا ولكن

اين خصوصيته

من السهل ان اضع مدونه جديده

ومن الاسهل ان اكذب في مدونتي ولكن لماذااااااااااا؟؟؟؟

اكذب على من؟؟

ولمن؟؟

وما مصلحتي من ذلك

أأمارس مرضي هنا وهناك

ولنفرض اكذب

انتوا شكوووووو

انا في مدونتي كما اريد انا

لا كما يريد البعض

او كما يريد المجتمع

بالمناسبه ...لدينا قانون كويتي يحمي ويكفل الحفاظ على الحياة الخاصه

اي حسابات

سجل وظيفي

تليفونات

مسجات

رسائل

وحتى ايميلات

كما اتمنى ان يكون مدونات

يمكن كلامي مو مفهوم عدل لكن اتمنى ان الفكره تكون وصلت للجميع

حافظوا على خصوصياتكم

وعلى خصوصيات غيركم

علشان ما تطيحون او تطيحون غيركم بأحساس الكبت

عندما تنتهك الخصوصيه

وليعذرني من سأل عني في مدونتي هنا لأني لا استطيع الا ان اكون عتيجه

وسلامتكم