عيدكم مبارك

هالبوست بالذات ضروري لي قبل لا يكون لكم لأن معالم العيد اندثرت بهالوقت اللي يطق ويهه شلاله ويسافر واللي يقزرها نوم واللي بوزه شبرين ليــــــــــــــــش يا جماعه مسلمين احنا وللمسلمين عيدان مثل ما قال صلى الله عليه وسلم عيد الفطر والاضحى ولا ننسى انه من اكبر شعائر الاسلام فلازم يكون فرحه لنا ولعيالنا وقد حاولت حصر شعائر الله تعالى بالعيد وهي كالتالي:

1_ صلاة العيد في مصلى العيد

2_ التكبير

3_ حضور الحائض لصلاة العيد

4_ توزيع الحلوى والعيادي

5_ زيارة المرضى وكبار السن في دور العجزه ان امكن

6_ اللباس الجديد

7_ حل الخلافات العائليه

8_ توزيع الهدايا على الاطفال

9_ شهادة النحر

10_ الحرص على فرحة ابنائنا بالعيد حتى تكون لهم صوره ذهنيه جميله تجعلهم يحبونه

11_ الحنه

: )وعيدكم مبارك وكل عام وانتوا بخير

حوسه

تعودت لفترة مو بسيطه اني اشجع الناس بمجالاتي اللي احوس وادور داير مدارها ...هي ثقه بنفسي اقتنصها من نفسي بين فترة والثانيه .....

تعودت ان النجاح اساسه انا ...وان الفشل ليس اساسه الآخرون ......

تعودت ..ان اكون مره ....وريال بنفس الوقت ...اكون حاده كالرجل بلباس انثى ..لعل ذلك يعود لتربيتي ايضا

يتعجب الاخرين ردودي...او بالاحرى ما يتوقعونها من انثى ...اي لو من ريال تقبلوها ...مثل ..لما واحد يمدح واحد ...اقوله لأن رفيجك ......... <<< قوي الرد صح ....بس شسوي تعودت

هل اغير من طبيعتي ؟؟؟؟

او اني مو عالطبيعه ؟؟؟؟

يايتني هزه في الثقه ...وخمول لامحدود ....ونوم مو طبيعي ...وعدم انجاز غير طبيعي اكثر..بأعمالي فقط ...واخاف ان يتسلق لأعمال الاخرين .....

الصراحه ...شعار الفقارى ...

.حفظو هالحجوه

واذا سمعتوا احد يقولها ....ترى يعرفني ...فعلا نحن لا نملك الا الصراحه ولا احد يمتلك الصراحه المطلقه وذلك لكونه انسان يراعي مشاعر الاخرين ويجامل احيانا ....

دايم اسئل نفسي سؤال حلوا....ليش اللي يلعلعون كلا فقارى....ولسنتهم شطولها ...؟؟؟؟

وليش فقارة لكويت من صارت لكويت اهم فقارتها ....متيرتهااهم متيرتها ؟؟؟؟

يعني والله سؤال يحير....عني شخصيا مو ويه تجاره...زوج اختي معطيني جناط لي الحين ما عرفت ابيع وحده ...مادري اشتريهم منه انا ...مع اني مشارفه على دورة التفليس ...وودي اسافر .....

صعب ان الانسان يشتغل اكثر من سنه من غير اي اجازه ....الاجازه لموازنة النفس

حتى الاجازه مو اجازه ....الشاطر يفهمها!!!!!؟

اصعب ما يمر على الواحد انه يكون يشجع يشجع يشجع

واييله يوم يكون محتاج لكلمة تشجيع ....

امي وابوي

سبحان الله في خبال عقلي وفي خبال بالحجي والكلام ...ساعات الانسان يقط عبارات ما يكون قاصدها او امثال مو بمحلها ولا بموضعها ..وفي امثال طبعا ما تنقال كلش ...

طبعا اللي بذكره مواقف تظحكني وتخليني افطس من الظحك مع انها صايره من زمان

الموقف الاول :

الموقف الاول حصل بين امي وابوي ..ابو كان قاعد يتذكر يدتي -متوفيه- وامي كانت متعاطفه معاه وقاعد يقول بعد عمري بصوت حزين : ايييييييه الله يذكرج يا يما بالخير كنتي ميمعتنا ما يدور اسبوع الا انتشاوف اميمعه البعيد والجريب واليران ...والحين الله يالزمان الزين فينا نشوفه مره بالشهر يدور الشهر والشهرين من عيد لي عيد ...

جان تدش امي عالموجه وتقول : قالوها الاولييييين ماتت لحماره وانقطعت لزياره

@@

نعمممممممممممم

هههههههههههههههههههههههههههههههههه

جان يقول لها ابوي: @@ يعني امي حماره

ردت: لا ما اقصد هذا مثل مثل

الوالد: لو سمحتي امثالج الخايسه مو علي ولا على امي

طبعا انا تعالوا شوفوا ويهي

كاااااااااااااااااااااااااااااااااااااااك

..................................................................................

الموقف الثاني :

هم بين امي وابوي ..

ابوي كان شاد الظهر برفيجه دلال بيوت يبي يدورله بيت ...

يقول حق امي : عااااااادل ما يقصر وعاااااااااادل سوى و عاااااااااااادل حط وطبعا عادل كان بارد ثلجه فااااااااج

عادل يابلي مادري شنهو

جان يقول لها اذنات يوم ...عادل يقول لقى بيت بالروضه وبييب خريطته

ردت عليه الوالده:ويييييييييييييييييي انطر يا حمار لين اييك الربيع ..

الوالد :@@ يعني انا حمار

الوالده: ويييييييييي لاتسويها سالفه خو مثل مثل

الوالد : جم مره قايلج امثالج الخايسه هذي مو علي ..

هههههههههههههههههههههههههههههههه ما تتوب

............................................................................

الموقف الثالث :

ولا اقولكم خلوه بالحلقه القادمه

;p

اسأل مجرب 2

اسأل مجرب

ولا تسأل طبيب
..هي عصارة تجارب قديمه ويديده معاها نصائح اكتبها لكم بين فتره والثانيه..مختصه في جميع مجالات الحياة وهي غالبا موجهه للكويتيين ..لأني كويتيه وما اقدر اتحجى عن مجتمع ثاني ما عشت فيه ..اتمنى انكم تستفيدون منها ..وواللي يستفيد منها اتمنى ان يقولي حتى لو بعد فتره ..علشان استانس واحس اني سويت شي مفيد للمجتمع البلوقي

(بعد ان انتهيت من اسئل مجرب الدوامات سأكتب اسأل مجرب للنساء فقط)

1- ديري بالج

اذا وثق فيج ريال وخلاج تكرفين له ..فتأكدي انه محتاجج وما ان يلاقي غيرج من الرجال حتى يستغنى عنج

2- تأكدي

اذا في ريال يحفر لج عند ريال ..فبالنهايه راح يصدقه

3- امر بديهي

اذا كنتي على علاقة بريال وقام يمدحج ...فهذا انذار مبكر بعدم الزواج منج

4- روح بعيد ..وتعال سالم

تبعدي عن راي اسرتج عن اي ابداعات خاصه فيج (شعر -قصه-بلوق-صحافه-هوايه)وخلج واثقه ان كل امرأه عربيه مبدعه كانت معاناتها الأولى من اسرتها

5- عنصريه

اقري الدستور لكويتي عشرين مره ومارسي حقوقج على اساسه مو على اساس ما تقدرين

6- هلاقه

اذا كنت تردين على كل اتهام ينسب لج راح تكونين هيلقيه ...ولكن كوني هيلقيه

7-بالخط العريض

قولي انا امرأه ...واستطيع فعل كل شي ..اذا اردت

8-نحاسه

اذا شفتي مره تقول انا ما احب مجتمع الحريم ..فهي اول وحده راح اتنحيس معاج وهي اول وحده تطبق العيوب اللي اتحجى عنها بمجتمع الحريم

9- لزقة عنزروت

اذا شفتي واحد لازق فيج لزقه ..ترى مو معجب فيج ..يبي يتصيييد عليج

10- شغل مضبوط

اجعلي ثقتج بنفسج هي مفتاح نجاحج ولا تجعلين الاخرين يمنحوج هذه الثقه

11-جرح

اذا كان عندج مبادئ مو عند الريال فسوف يوجهلج جرح في هذه المبادئ

12-شكوى

اذا شكى الريال من احد جدامج ..فتأكدي ان هدفه ليست الشكوى

13- ماينعطى ويه

اذا اعجب فيج الريال لفتره وماعطيتيه ويه ..راح يظل معجب فيج..واذا عطيته ويه راح يروح لغيرج... وهلم جرا

14-الحقراان

اذا تحرش فيج واحد حقريه ..عشان يعرف انه صغير

15-الغضب

اذا بدى الريال يحاسبج ..معناته انه غضبان منج

16-المعامله

اذا كسر خاطرج ريال وحاولتي تعاملينه معامله خاصه ...فبيغدر فيج لامحاله..عامليه عادي

17- الطلاق

اذا ياج ريال مطلق مرتين او اكثر ..فغالبا ما يكون العيب فيه..لأن المره سهله مو صعبه

18- معصب

اذا كان الريال معصب حقريه ...ولاتسألينه شفيك ترى بيعصب زياده

19- الزواج

اذا حبج ريال لاتييبيله طاري الزواج ..بل ابرزيله مواضع ثقتج بنفسج ..واذا يبيج بياخذج

20-دزي مسج

اذا زعل عليج ريال ..راضيه بس مو وجها لوجه لأن غالبا راح يثير موضوع الزعل مره ثانيه وتصير زعله ثانيه

21-متغير

اذا تغير عليج ريال ..فالسبب هو ريال

22-دايما غلط

اذا طلعتي اللي بقلبج حق ريال فراح يغلطج واذا طلعتي حق مره فهم راح تغلطج ..

(طبعا هذا ليس وضع عام ..ولكن اسئل امجرب)

خسران الذات

جواب مطرب امينه جاوب عليه دايفر ومشاري ..كان المطرب الله يرحمه حمد السليم

ولقيت لكم اياها

http://www.q6of.com/music/other/ajmal-song-q8-zaman/3.ram

اليوم رايحيين انا وابوي نترس سياييرنا ..بعد الساعه ثنتين بالليل تقريبا - والله فراغه-المهم ولا مسكين الهندي ترسلي وانا مبطله الدريشه اهذر مع ابوي على الناحيه الاخرى راح يترس للوالد عاد مسكين بردان ودايخ جان يدعم المونده -العامود-ويفتر وعادي يكمل جان اقول للوالد مسكين ما شفته دعم المونده قعد يتظحوك ...ههههههه والله السالفه تظحك وحسب لنا لفلوس غلط والحاله حاله بس والله كسر خاطري ...والاخ الثاني لكويتي صاك الدريشه ومجابل التلفزيون مادري اللاب توب ..والله شغله ..مع ان العاده ما تلاقيه بمحطة البانزين مادري شيايبه ..الظاهر متهاوش مع المره

والله يا جماعه ترى اعتمادنا على غيرنا زاد ..ليش بالبحرين البحرينيين يصبون بانزين ..عادي شفيها يعني بدال ما تصير طالب تطالب بالاعانه وترفع اعلام تهدد وتندد وتدخل مجلس الامه بالموضوع ... صب بانزين ...اشتغل ببيتزا صج ان هليام الاقي شباب وبنات ..بس احس انها هبه وراحت ...واللي يقول مو مضرين لذلك ..لا والله مضطرين ونص لما نقيس هذا الموضوع على حجم البلد ومصلحته ..راح نشوف ان ضروره ان شبابنا وشابتنا يشتغلون بكل مكان وموعيب ...واول طلعه الشباب والبنات اللي يشتغلون بمكدونلدز اول اثنينه اشتغلوا بنت وولد صقر المعوشرجي-وكيل مطاعم ماكدونالدز-وهذا تشجيع للشباب والبنات ولا صقر مو بحاجه ..لعمل الكويتيين ...

المهم مادري شياب طاري هالسالفه ..

قريت عباره لسيدنا عيسى عليه السلام وايد اعجبتني

'ماذا يكسب الإنسان إذا فاز بكل شيء وخسر نفسه'

فكيف يخسر الانسان نفسه ....انا اشوف عندما يثق به الاخرون ويخون ثقتهم به ...وعندما يحبه الاخرون ويغدر بهم ...وعندما يصدق معه الاخرون ويكذب معهم ...وعندما يوصلونه الاخرون ويتجاهلهم ..او ينكرهم

فكيف يخسر الانسان نفسه في نظركم ؟؟؟

العرس

رحت للفيحا ادور
موتري كلا يفور
شفتلي طفل صغير ....بالشبه يشبه امينه
دان وادانه ودانا صوبت قلبي امينه
الشاطر يقولي منو اللي كان يغني اغناية امينه ؟؟؟
....
ادري بتقولون لي داثره بس والله انا وامي اليوم قاعدين نغنيها ...مادري شسالفه الفيحا ويا المطريبين ملوت قبل ...عايشه المرطه كانت تقول حبيبي ساكن الفيحا وقلبي ساكن وياه ...وطبعا القصيده ما كانت حبيبي ساكن الفيحا كانت حبيبي ساكن الدسمه ...بس اهي اصرت ان تغنيها حبيبي ساكن الفيحا ...عشان اهي ساكنه بالفيحا ...الله يرحمها
ياحلو مطربات قبل ..مو مهم الشكل مو مهم الجسم مو مهم الا الصوت ...والاداء ...يعني اكو احلى من غناوي عايشه المرطى اللي لي الحين يغنونا بلعروس ....احلى سامريه ..حتى السامري النقازي كان فله والله ..ولا نقدر نستغنى عن غناوي عوده المهنا ...يا صاجه وياصاجه ...ولا ام زايد ..ولا صنعه والله يعني كان فنهم له طعم خاص ..انا بسأل سؤال ليش الحين ما قمنا نشوف سامريات يديده ...كلا يغنون القديم...وقصايدهم الحين اللي مادري شلون قايله ...انا بالبيت وقلبي ينطرج برا ..ومن شفت ويهج وقلبي يطقطق ..ما اعرف ايش
ولا لعروس اللهم يا كافي ماكو غنايه سنعه يحطونها ماكو شيلة طار مثل الاوادم حتى هب السعد استغنوا عنها الله يزيد النعمه يحطون غناية حق مادري منهو ...عاد الصراحه انا اعتبر هب السعد غناية فلكلوريه واعتبرها شي اساسي بالعرس حالها حال الكوشه والعشا ...

...
والصراحه بس آسفه يعني في حركه ما كانت بعرفنا ..مادري شلون دشت علينا ...شكو رياييل غرب يدشون مع الريال على مرته ...ربعه بالدوام وربعه بالدوانيه ومادري شنهو وكل واحد قبل ما ينزل من الكوشه يصور مرته وينزل وطبعا المره بأحلى وابهى صورها ولابسه خرجه يعني بتغطى وييها ولا ايدينها ولا الباجي ...احنا يالللي قاعدين عالمدرج نطالع وييها وايدها ووشعرها ومكياجها من هالخرجه ....والسالفه الاطين لما يرقصون ...شكوووووووو لا ومال الدي جي يحط لهم غناية ..ويقول عاشوا الشباب ...عفوا يعني هذا اللي قاعد يصير بعروسنا ...بس ترى يفشل ومو حلو ...وعمرنا ما كنا جذي وللأستزاده كل واحد ووحده يروحون يسألون يدانهم ...
عروس قبل كان الحريم يحتفلون ببيت اهل العروس ...والرياييل يحتفلون ببيت اهل المعرس ...ويسوون يلوه عالمره ويغنون ويرقصون ويدششونها بدار تالي الرياييل يزفون المعرس لي بيت اهل العروس ويدششونه بنفس الدار يدش ويصلي <<< طبعا الحين اقص ايدي, ويحط ايده على راس مرته ويدعي ..وعقب اسبوع ينتقلون بين الزوجيه او ثلاث ايام على حسب ... وفي ناس الدشه تصير في بيت اهل المعرس ...وفي ناس في بيت المعرس نفسه ...وكانوا يحطون المره على زوليه وهي مغطيه ومتزينه والريال يصير داخل الحجره ويسحبون الزوليه اللي اهي قاعده عليها ....يعني مستحيه ههههههههه هالحركه احبها تونس وتظحك ...الحين الله بالخير توكله الكيكه ...وتشربه العصير واخر شي ترقصله ههههههههههههه سبحان الله طبعا هذا كلا مافيه شي ..لكن الشغله اللي تبط جبدي دشة الراييل الغرب وترقصهم جنهم حريم ...

بس ما قلتولي ...منو اللي يغني امينه ؟؟؟